Ижкар+19 °C
14 -тӥ гудырикошкон 2020 Удмуртарня
16+

Удмуртилэсь палэнын улӥсь удмуртъёсын ужанъя кенеш кылдытӥзы Ижкарын

  • 781
  • 0
Ижкар / Удмуртия
Удмуртилэсь палэнын улӥсь удмуртъёсын ужанъя кенеш кылдытӥзы Ижкарын
Туспуктэм: Анжелика Тихонова

Удмуртиысь йӧскалык политикая министерство бордын элькунмылэсь палэнын улӥсь удмуртъёсын ужанъя координаци кенеш кылдытӥзы. 5-тӥ южтолэзе министрлэн Лариса Бурановалэн кивалтэмез улсын ортчем нырысетӥ пумиськонэ ивортодэтъя «Удмуртия» агентстволэн корреспондентэз но вуылӥз.

Пумиськонын кенеше пыртоно муртъёс но азьланяз ужан план пумысен вераськизы.

Координаци кенеше дышетонъя но тодосъя, физкультурая, спортъя но егитъёсын ужан политикая, йӧскалык политикая, лулчеберетъя министерствоосысь, печатья но калыке ивортодэт вӧлмытонъя агентствоысь, «Удмурт Кенеш» огазеяськонысь, Калыкъёслэн эшъяськон юртысьтызы но Башкириысь, Татарстанысь, Пермь шаерысь удмуртъёслэн лулчеберетъя йӧскалык центръёсынызы кивалтӥсьёс пыризы 

Удмурт Элькунын сяна, удмуртъёс тужгес но трос Татарстанын, Башкортостанын, Пермь шаерын, Киров улосвылын лыдъясько. Отын быдэс удмурт гуртъёс вань, кытын школаосын удмурт кыллы дышето, пӧртэм клубъёс, удмурт сямен кырӟась-эктӥсь коллективъёс ужало. Озьы ке но, министрлэн кылъёсызъя, соослы али Удмуртиын азинскись ужан амалъёсъя ивор, визьнод сётӥсьёс уг тырмо.

Соин ик ми пуктӥськом сыӵе ужпум, <…> быдэс Удмурт Элькунысь, пӧртэм удысысь ӧнерчиос мед быгатысалзы пайдаё ужаны со диаспораосын - удмуртъёсын, кудъёсыз палэнын уло
Лариса Буранова, Удмуртиысь йӧскалык политикая министр

Министрлэн кылъёсызъя, кылем арын толсуре ортчем «Удмурт диаспора: туннэ югдурзы, шугъяськонъёссы но соосты сэрттон-пертчон амалъёс» форуме котькуд улосвылысь удмурт делегациос люкаськизы. Ӵапак отын ӧнерчиос чаклазы, мар соос понна нырысетӥ интыын, кыӵе юрттэт сётыны кулэ. Ӵектонъёссэс лыдэ басьтыса, соосын котыр ласянь ужан понна план кылдытӥзы.

Со планъя туэ Марий Элын, Комиын, Пермь шаерын, Томск, Киров, Свердловск улосвылъёсын удмурт лулчеберетлэн нуналъёсыз ортчозы. Удмуртилэсь палэнын улӥсь удмуртъёс понна мастер-классъёс, элькунмылэн кунлыкезлы 100 ар тырмонлы сӥзем ужрадъёс радъялозы. Отчы Удмуртиысь быдэс делегациен вуылозы.

Дышетӥсьёс но мынозы, пӧртэм ӧнерчиос мынозы, ДПИ (декоративно-прикладной искусство - ред.) отын луоз, кыӵе ке но творчествоя коллектив одно ик милемын ӵош потоз. Кылбурчиосын, пӧртэм авторъёсын пумиськонъёс ортчозы. Сыӵе комплексной программа луоз
Лариса Буранова, Удмуртиысь йӧскалык политикая министр

Удмурт лулчеберетлы сӥзем нуналъёс сяна, быдэс Удмурт Элькунлэн нуналъёсыз но радъяськозы. Ужрадъёс Башкортостанын, Татарстанын но Санкт-Петербургын ортчозы. Лариса Бурановалэн кылъёсызъя, соос элькунмылэн кунлыкезлы 100 ар тырмонлы сӥзем ужанрадлыке пыртэмын, соя отын мерлыкез но экономикаез азинтонъя ужрадъёс, вузкарон ярмаркаос ужалозы, кытчы элькунысьтымы пӧртэм вуз поттӥсьёс но пӧртэм коллективъёс пыриськозы. 



Наверх
Вниз