Ижкар+9 °C
24 -тӥ куарусён 2020 Покчиарня
18+

Ижкарлы уж данлыкъя кар ним сётон понна куара бичан кутскиз Удмуртиын

  • 778
  • 0
Ижкар / Удмуртия
Ижкарлы уж данлыкъя кар ним сётон понна куара бичан кутскиз Удмуртиын
Туспуктэм: Руслан Нуриахметов

Ижкарлы уж данлыкъя кар ним сётон понна куара люкан кутскиз. 5-тӥ южтолэзе «Аксион» заводын кичӧлтонлы дурбасьтонъя мер штаблэн нырысетӥ пумиськонэз ортчиз. Со сярысь Удмуртиысь тӧролэн но кивалтэтлэн пресс-службазы ивортэ.

Мер штаблэн пумкылъянэзъя, Удмуртиын улӥсьёслэсь кинюртэмъёссэс бичан куартолэзёзь мыноз. Куара сётон центръёс лулчеберетъя ужъюртъёс, промышленной предприятиос, «Огъя Россия» партилэн приёмнойёсыз, каръёслэн но ёросъёслэн администрациоссы луозы.

Веранэз ик ӧвӧл, Ижкар сыӵе дано ним басьтонэз заслужить кариз, уката пусйымон, со Вормонлы 75 ар тырмон но карез кылдытэм дырысен 260 ар тырмон аре луиз ке
Александр Бречалов, Удмуртилэн тӧроез

Быдӟым Атыкай ож аръёсы Удмуртия фронтлы ыбылӥськон тӥрлык поттонын валтӥсь инты басьтӥз. Ожлэсь азьвыл Ижкарын 2 сюрслэсь кӧня ке тросгес винтовкаос лэсьтылӥзы ке, 1942-тӥ арын толшоре уй-нуналскын одӥг стрелковой но одӥг авиационной дивизилы тырмымон пыӵал тӥрлык поттӥзы. Ижкарысь заводъёс фронтэ 12 миллионлэсь трос ыбылӥськон тӥрлык келязы. Удмуртия эвакуировать карем 30 заводъёсын но фабрикаосын ужасьёсты интыяз. Со сяна, ож аръёсы Ижын 20 госпитальёс ужазы.

Фронтэ кошкем воргоронъёсты цехъёсын пенсионеръёс воштӥзы. Нылкышноос воргорон ужез ужазы. Арлыдоосын одӥг радын 10-15 аресъем пиналъёс ужазы. Сое вунэтыны уг яра. Со асьмелэн ветеранъёс, фронт мышкын ужамъёс, элькун азьын долгмы
Владимир Ярыгин, ыбылӥськон тӥрлык кылдытӥсь

Туннэ Ижкарын 648 адями улэ. Соос, озьы ик палэнэ кошкемъёс, вордскем карзылы дурбасьтозы шуыса оскемзэ вераз карлэн тӧроез Олег Бекмеметьев.

Милям ужпуммы – куара люкан ужез радъян: предприятиосын, коньдэт чотын ужась ужъюртъёсын, студентъёс пӧлын, лулчеберетъя, спортъя юртъёсын, вузкарон но шутэтскон центръёсын. Аслэсьтыз кинюртэмзэ пуктыны мылкыд карем адями медаз утча, кытын сое лэсьтыны луоз. Ваньмыз артэ но валамон луыны кулэ
Олег Бекмеметьев, Ижкарлэн тӧроез

ВАТСАН

2020-тӥ арын 1-тӥ южтолэзе Россилэн азьмуртэз Владимир Путин «О почётном звании Российской Федерации «Город трудовой доблести» федерал катэз кинюртӥз. Со нимез Быдӟым Атыкай ож дыръя геройлыко ужам, ожгар но граждан продукциез дугдылытэк поттэм каръёс басьтыны быгато. Солы инъет азинлыко ужам предприятиослы яке нимаз адямиослы сётэм кун данъетъёс, заводъёслы сётэм киысь кие выжись Горд знамя, озьы ик 1941-1945 аръёсы карын улӥсьёслэн геройлыко ужамзы луыны быгато.  
Ним сётон сярысь ӵектонэн интыысь аскивалтон ёзэсъёсы кунмуртъёс яке мер огазеяськонъёс вазиськыны быгато. Собере сое улосвыл тӧрлыкъёслы сётозы, соос ини «Город трудовой доблести» ним сётыны куронэн азьмуртлы вазиськозы. Собере гинэ азьмуртлэн косэтэзъя (указ) карлы дано ним сётыны быгатозы. Катӵектосъя, со Тулыслэн но Ужлэн праздниксы азьын луоз. «Город трудовой доблести» ним басьтэм карын солэн кунпусэныз но Росси азьмуртлэн косэтэныз стела пуктозы, озьы ик 1-тӥ куартолэзе (Тулыслэн но Ужлэн праздниксы), 9-тӥ куартолэзе (Вормон нунал) но Карлэн нуналаз бадӟым ужрадъёс но салютъёс радъясько.


Наверх
Вниз