Ижкар+32 °C
10 -тӥ пӧсьтолэзь 2020 Удмуртарня
16+

Бадӟым удмурт диктантэз гожтыны нимысьтыз площадкаос туэ уз луэ

  • 849
  • 0
Ижкар / Удмуртия
Бадӟым удмурт диктантэз гожтыны нимысьтыз площадкаос туэ уз луэ
Туспуктэм: Григорий Фомин

2020-тӥ арын 4-тӥ оштолэзе Удмуртиын Бадӟым удмурт диктантэз гожтон понна нимысьтыз площадкаос уз луэ. Со сярысь ивортодэтъя «Удмуртия» агентстволы ужрадэз радъясьёс ивортӥзы.

Диктантэз «Мынам Удмуртие» радио но телевидение пыр лыдӟем улсын гожтыны луоз. Удмурт кылын шонер гожъяськыны быгатэмез эскерон ужрад Ижкар дыръя 13 часын кутскоз.

Со сяна, радъясьёс удмурт кылэн герӟаськем викторинае онлайн амалэн пыриськыны ӵекто. Соосты Бадӟым удмурт диктантлы юромо кылдытэм сайтысь шедьтыны луоз. Удмуртиысь йӧскалык политикая министерствоысь валтӥсь ӧнерчи Елизавета Ложкина верамъя, вотэсабам 1-тӥ оштолэзе ужаны кутскыны кулэ.

Тестъёс луозы отын ӟуч но удмурт кылын. Удмурт кылэз валасьтэм адямиос но удмурт кылэн но солэн историеныз тодматскыны быгатозы со юанъёс пыр. <…> Усьтэмын со луоз кык-куинь нунал, ачиз тестэз. Со кык-куинь нунал куспын кыӵе ке но дырез бырйыса, адями онлайн быгатоз эскерыны аслэсьтыз тодон-валанзэ
Елизавета Ложкина, Удмуртиысь йӧскалык политикая министерствоысь валтӥсь ӧнерчи

Солэн верамезъя, викторина но диктант ог-огенызы герӟаськемын ӧвӧл. Адями кыказ ик пыриськыны быгатоз яке одӥгзэ гинэ быдэстыны. Викторинаын басьтэм баллъёс диктантлэн йылпумъянъёсыз вылын нокызьы уз шӧдӥське.

Удмурт кылын шонер гожъяськыны быгатэмез эскерон ужрад нырысетӥ удмурт нылкышно кылбурчилэн Ашальчи Окилэн вордскем нуналаз ортчоз. Диктантлы текстэз Удмуртиысь калык гожъясь Вячеслав Ар-Серги гожтоз. Туэ ужрад Удмуртилэн кунлыкезлы 100 ар тырмонлы сӥземын

Тодэ вайытом, кылем арын диктантэз 110-лэсь трос площадкаосын гожтӥзы.

Ватсалом, 2020-тӥ арын «Бадӟым удмурт диктант» акция укмысэтӥзэ ортчоз ни. Сое «Мынам Удмуртие» телерадиокомпания, Удмуртиысь йӧскалык политикая министерство, Удмурт кун университетысь Удмурт кылосбуръя финно-угороведениея но журналистикая институт но «Удмурт Кенеш» огазеяськон радъяло. 



Наверх
Вниз