Ижкар+26 °C
12 -тӥ пӧсьтолэзь 2020 Воскресенье
16+

Удмурт кылын сюан ортчытон: вань-а сыӵе луонлык Удмуртиын

  • 785
  • 0
Ижкар / Удмуртия
Удмурт кылын сюан ортчытон: вань-а сыӵе луонлык Удмуртиын
Туспуктэм: vk.com (Администрация Малопургинского района)

Луэ-а Удмуртиысь ЗАГС-ёсын гожтӥськонэз удмурт кылын ортчытыны но сюанэз удмурт кылын шудыны? Вань-а солы кулэяськон? Та юанъёслы валэктонъёс Ижкарысь Калыкъёслэн эшъяськон юртсылэн пресс-службаез утчаз.

ЗАГС ёзэтъёсысь ӧнерчиосын кенешыса тодмо луиз, гожтӥськонэз ортчытыны мылкыд карисьёс шер пумисько.

Озьы ке но, кемалась ик ӧвӧл, 21-тӥ тулыспалэ - Анай кыллэн калыккуспо нуналаз, Пичи Пурга ёросысь ЗАГС-ын егитъёслы гожтӥськонэз удмурт кылын ортчытӥзы. Ёрослэн тӧроез Сергей Юрин но егитъёслы ӟечкыланзэ удмурт кылын гожтӥз.

Мылкыд карисьёслы гожтӥськонэз удмурт кылын радъяны дась луэмзэс мукет ёросъёсысь ЗАГС-ёсын ужасьёс но веразы. Кылсярысь, Юкаменск, Яр, Дэбес ёросъёсын, вазиськисьёс луизы ке, нимысьтыз ӧнерчиосты шедьтозы но ужрадэз удмурт кылын ортчытозы шуыса оскытӥзы. Алнаш ёросысь ӧнерчиос но луонлык вань шуыса пусйизы, но кылем арын одӥг но сыӵе курон вылымтэ. Дэри, Сюмси но Якшур-Бӧдья ёросъёсысь ЗАГС ёзэтъёсын ужасьёс юанлы абдразы, сыӵе вазиськисьёссы ӧвӧл шуыса веразы. Нош Грак ёросысь ЗАГС-ын, кивалтӥсьсы удмурт ке но, удмурт кылын ужрадъёс уг ортчыто, но ӧнерчиос гожтӥськонэз удмурт шӧмо ортчытыны дась луэмзэс пусйизы.

Удмуртиысь Калыкъёслэн эшъяськон юртысьтызы ӧнерчиос Ижкарысь ужрадъёсты радъясен Оксана Бисарен но вераськизы, 2007-тӥ арысен со сюанъёсты нуэ, ог 30 процентсэ - удмурт кылын. Солэн верамезъя, туала сюанъёс азьло аръёсы гуртъёсын ортчись сюанъёслэсь трослы висъясько.

Удмурт сюан туннэ – со одно ик удмурт кылын, йӧскалык дӥсьёсын, удмурт кырӟанъёсын но эктонъёсын, но Европа стилен. Сямъёсты выль кенэз басьтыку яке кыкетӥ нуналаз гинэ чаклало на
Оксана Бисар, ужрадъёсты нуись

Солэн верамезъя, сюанын со удмурт шудонъёсты ортчытэ, соос семьяослы ог-огенызы тодматскыны юртто. Соку удмурт кырӟанъёс но эктонъёс шулдыръяськонэ туж умой тупало. Но ӵемысь сюанъёсты удмурт но ӟуч кылъёсын нуоно луэ, ваньзы мед валалозы шуыса. 

Сюанъёсты быдэсак удмурт кылын гуртъёсын гинэ ортчыто. Но вань висъяськисьёс но – огпол Киров улосвылысь Малмыж карын сюанэз удмурт кылын нуи, выль кензы ӟуч семьяысь вал ке но. Сыӵе сюанъёс Ижкарын но луыло, но шер – мынам практикаям соос вить вал
Оксана Бисар, ужрадъёсты нуись

Калык сямъёсты сюанэ анай-атайёссы пыртыны тыршо, удмурт дӥсь дӥсяло, арган шудэм улсын кырӟанъёс куро, асьсэос кырӟало, вера Оксана Бисар. Но туала сямъёстэк но уг луы, кылсярысь, выль кен сяська керттэтсэ одно ик куштэ.

Озьы ик ужрадъёсты нуись пусъе, берло дыре егитъёс ЗАГС-ын сӥё-дано гожтӥськонлэсь куштӥсько. Со интые соос инкуазе яке мукет чебер интые потыса гожтӥськон ортчытыны тыршо, отын сокем чурыт куронъёс уг луо ини. Соку ужрад нокыӵе шугъяськонъёстэк удмурт кылын но ортчыны быгатэ.

Ватсалом, кызьы веразы ивортодэтъя «Удмуртия» агентстволы Можга ёрос администрациысь ЗАГС ёзэтын ужасьёс, соос егитъёслы гожтӥськонзэс удмурт кылын ортчытыны ӵекто шуыса. Озьы Удмуртилэн кунлыкезлы 100 ар тырмонэз пусйыны малпазы.

Сӥё-дано гожтӥськон сценарие пыртэмын чебересь туала крезьгуръёс но аранжировкаос. Озьы ик ми шумпотыса лыдэ басьтом асьсэлэсь егитъёслэсь ӵектонъёссэс но куронъёссэс. Вань луонлык ортчытыны Удмурт коркан Бадӟым Сибы гуртын, кытын вань вӧсям ошмес но мылкыдъёсты быдэсъяны юрттӥсь выж
Можга ёрос администрациысь ЗАГС ёзэт

Тодэ вайытом, Удмуртиысь йӧскалык музей 100 ар тырмонэзлы туспуктэмъёсъя вожвылъяськон ялӥз. Солэн огез номинациез - «Из Арсенала с любовью», отчы Арсенал вӧзын сюанысь яке яратон сярысь фотосессиысь туспуктэмъёсты келяны луэ.



Наверх
Вниз