Ижкар+9 °C
18 -тӥ оштолэзь 2021 Воскресенье
18+

Удмуртиысь тодмо адямиослэн пӧртэм аръёсы сётэм интервьюосынызы книга потӥз Ижкарын

  • 789
  • 0
Ижкар / Удмуртия
Удмуртиысь тодмо адямиослэн пӧртэм аръёсы сётэм интервьюосынызы книга потӥз Ижкарын
Туспуктэм: vk.com (Удмуртия Книжное-Издательство)

«Удмуртия» книгапоттонниын шаерысьтымы тодмо адямиосын пӧртэм аръёсы гожтэм интервьюосын «Гурезьлэсь ӝуждалазэ тодэмед ке потэ…» книга потӥз. Бичетлэн но ваче вераськонъёслэн авторзы Людмила Вахрушева ивортодэтъя «Удмуртия» агентстволэн корреспондентэзлы куд-ог геройёсыз сярысь вераз.

Книгае 1999-2007 аръёсы «Удмуртия» кун телерадиокомпанилэн радиоэфираз чузъяськем пӧртэм удысысь, пӧртэм арлыдъем адямиосын 21 интервьюос пыризы.

Соку мон удмурт радиоын «Лёгетъёс» но «Кузё» нимаськись радиосузьетъёсыз дасялляй. Соос толэзьлы быдэ, арнялы быдэ но куд-огез, поталлязы. Туж трос соос мынам люкаськизы. Пӧлысьтызы геройёсме бырйыса, таӵе книга потӥз
Людмила Вахрушева, «Гурезьлэсь ӝуждалазэ тодэмед ке потэ…» книгалэн авторез

Людмила Вахрушевалэн геройёсыз тодосчиос, дышетӥсьёс, кивалтӥсьёс, фермеръёс, журналистъёс, эмчиос, спортсменъёс но мукет удысын тыршисьёс луылӥзы. Авторлэн верамезъя, радиосузъетъёс улсын соос, адямилэсь пуштроссэ усьтэм сяна, со вакытэ улон-вылон сярысь вераськыны тыршизы.

Бугырес 90-тӥ аръёс ортчемын, нош вылезлы оскон инъет кылдымтэ на. Совето Союз вакытэ будэм, солэн дунъетъёсыз вылын кыдам адямилы выль улонэ пырыны секыт вал, тросэзлэн адямиослэн осконзы быриз-а мар-а, шуод, нош кулэ вал сыӵе геройёс, кудъёсыз ке асьсэлы оскыса, пӧртэм удысъёсын, номыр шоры учкытэк, мар ке но лэсьтыны тыршизы. Вылезлы оскон пыӵатӥзы. Тӥни сыӵе мылкыдъёсын пумиськылӥсько вал мон со адямиосын
Людмила Вахрушева, «Гурезьлэсь ӝуждалазэ тодэмед ке потэ…» книгалэн авторез

Книгае Быдӟым Атыкай ожысь ветеранэн, 1960-1970 аръёсы Удмуртиысь тазалыкез утёнъя министрен Капиталина Митрошинаен интервью пыриз. Людмила Вахрушевалэн кылъёсызъя, со сярысь тодонлыкез мукет интыысь шедьтыны уз луы ни.

Озьы ик книгаысь тодмо тодосчиен, профессорен, 1960-1970 аръёсы Ижысь эм академиен кивалтӥсен Георгий Даниловен ваче вераськонэн тодматскыны луоз. Кызьы пусъе книгалэн авторез, со солэн берпуметӥ интервьюез.

Лыдӟисьлы тунсыко луоз Афган оже пыриськем удмурт журналистлэн Валерий Глезденёвлэн анаеныз Марфа Глезденёваен вераськон но.

Солэн туж узыр вераськон кылыз. Огшоры удмурт кышномурт сюлэмзэ усьтэ, мӧзме улонысь кошкем пиез сярысь, сыӵе сюлэмез позыртӥсь радиоверан шуыны луоз сое
Людмила Вахрушева, «Гурезьлэсь ӝуждалазэ тодэмед ке потэ…» книгалэн авторез

Книгае Россиысь но Удмуртиысь дано тренерен Виктор Кузнецовен вераськон но пыриз. Жаляса верано, 2017-тӥ арын со улонысь кошкиз. Журналистэн пумиськонын со сӧсыр муртъёсты спортэ кыскыны кутскемез, соослэсь футболэн шудыны мылкыдзэс ӝутэмез но мукетыз сярысь мадиз.

Со шаерысьтымы сӧсыръёслэсь спортсэс азинтыны туж бадӟым кужымзэ сётӥз, туж бадӟым уж лэсьтӥз. Оскон сётӥз сӧсыръёслы
Людмила Вахрушева, «Гурезьлэсь ӝуждалазэ тодэмед ке потэ…» книгалэн авторез

Автор пусъе, мар ке но улонын лэсьтэмед потэ ке, мар ке но карыны, кытчы ке но тубыны, ӵабъяськыны кулэ. Книгалэн «Гурезьлэсь ӝуждалазэ тодэмед ке потэ…» нимыз но адями тэк пукыны кулэ ӧвӧл, мар ке но лэсьтыны кулэ улонын шуыса вера.

Книга 250 экземплярен потӥз, сое книгапоттониысь шедьтыны луоз. 

Тодэ вайытом, Удмуртилэн кунлыкезлы 100 ар тырмонлы сӥзьыса, элькунысь йӧскалык политикая министерство но ивортодэтъя «Удмуртия» агентство ваче вылысь «Удмуртилэн ошмесъёсыз» («Родники Удмуртии») ӵектос малпазы. Отын котькуд адями ачиз яке ӵыжы-выжыез сярысь вераны быгатэ.



Наверх
Вниз