Ижкар+22 °C
8 -тӥ гудырикошкон 2020 Кӧснунал
16+

Ижкарын ожгар лётчицалы Нина Ульяненколы буре ваён пул усьтӥзы

  • 200
  • 0
Ижкар / Удмуртия
Ижкарын ожгар лётчицалы Нина Ульяненколы буре ваён пул усьтӥзы
Туспуктэм: Руслан Нуриахметов

Ижкарысь Пастухов нимо ульчаысь 13 номеро юрт вылын Совето Союзлэн Героезлы, ожгар лётчицалы Нина Ульяненколы буре ваён пул усьтӥзы.

Сое «Журналистъёс быдӟым ожын» («Журналисты на великой войне») ужрад улсын юнматӥзы. Ӵектосэз «Удмуртская правда» газетын кутскизы, собере солы тросэз ёрос редакциос дурбасьтӥзы. Соос отын ужам фронтовикъёс сярысь веранъёсты печатлало.

Акция вордскиз со адямиос сярысь веран понна: кин ожлэсь азьвыл кошкиз, ож дыръя ужаз, ож бере редакциосын ужам фронтовикъёс
Александр Валов, Удмуртиысь печатья но калыке ивортодэт вӧлмытонъя агентстволэн кивалтӥсез

Нина Ульяненко – Удмуртилэн но Вотка карлэн дано кунмуртэз. Солэсь нимзэ Воткаысь 6 номеро школа нуллэ. Батырлыко ожмаськемез понна Горд Знамя (кык пол), Отечественной войналэн I но II степенё, Горд Кизили орденъёсын но медальёсын пусйизы. «Удмуртская правда» газетын корреспондент луыса Нина Ульяненко 1948-1951 аръёсы ужаз.

Куке тодӥськод, тынад коллективад Совето Союзлэн Героез ужаз шуыса… Совето Союзлэн Героез гинэ ӧвӧл, легендарной адями – «ночная ведьма». Со нылъёс, кудъёсыз капчи самолётъёсын лобаны ӧз кышкалэ но фашистъёсты туж зол кышкатъязы
Энвиль Касимов, «Удмуртская правда» газетлэн редакторез

ВАТСАН

Нина Захаровна Ульяненко Воткаын 1923-тӥ арын 17-тӥ толсуре вордскиз. Пинал дырысеныз ик инбам сярысь малпаськиз: 9-тӥ классын дышетскыкуз аэроклубе гожтӥськиз, 17 аресаз нырысьсэ омыре ӝутскиз. 1942-тӥ ар кутсконын Нина Ульяненко штурманъёслэсь курсъёссэс йылпумъяз, нош куартолэзе ини уй бомбардировщикъёс пӧлын лобаны кутскиз. Со Донын, Владикавказын, Таманьын, Кубаньын, Крымын, Белоруссиын ожмаськиз, Куке совето войскоос кунгожез потӥзы, Европаысь кунъёсты мозмытонэ пыриськиз. 1945-тӥ арын тулыспаллы Нина Ульяненко штурман сямен 388 пол ожгар лобӟонъёсы потаз, лётчик сямен – 530. 905-тӥ ползэ лобӟонэз со Берлин вылэ тупаз. 1945-тӥ арын гвардиысь лейтенантлы Нина Ульяненколы Совето Союзлэн Героез ним Ленин орденэн но «Зарни Кизили» медален ӵош сётӥзы.


Наверх
Вниз