Ижкар-2 °C
30 -тӥ коньывуон 2020 Удмуртарня
18+

Быдӟым Вормон Нунал: кызьы ортчоз праздник Удмуртиын

  • 247
  • 0
Ижкар / Удмуртия
Быдӟым Вормон Нунал: кызьы ортчоз праздник Удмуртиын
Туспуктэм: udmurt.ru

9-тӥ куартолэзе Удмуртия быдэс кунэн ӵош Быдӟым Атыкай ожын Вормонлы 75 ар тырмонэз пусъёз. Астэ ачид нимаз висъянэн режим шоры учкытэк, элькунын праздник ужрадъёс ортчозы, но тросэз выль сямен радъяськозы. Со сярысь элькун тӧролэн но кивалтэтлэн пресс-службазы ивортэ.

9 часысен 17 часозь «Вахта памяти у мемориалов» акци ортчоз. Отчы нырысьсэ ветеранъёслэн мер огазеяськонъёсысьтызы, кужымо ёзэсъёслэн ыстэм муртъёссы пыриськозы, пиналъёслы Буре ваён вахтаын та вакытэ сылыны уг яра. Ужрад кышкытлыклэсь утиськонъя вань куронъёсты быдэстыса ортчоз.

9 часысен 23 час 59 минутозь онлайн амалэн «Эстафета мира» ӵошатскон мыноз. Ужрадлэн сайтаз гожтӥськем но ас номерзэс басьтэмъёс нимаз бызьылозы но результатсэс пусъёзы.

10 часын «Голоса Победы» акци кутскоз. Элькунысь каръёсын но ёрос центръёсын громкоговорительёс пыр ож вакытысь кырӟанъёс чузъяськозы, светодиодной экранъёсын ож аръёсысь хрониказ, Москваын но Ижкарын азьло аръёсы ортчем парадъёсты, соос пӧлын 1945-тӥ арын Парадэз но, возьматозы.

Ижкарын ужрад «День Победы» кырӟанэн кутскоз. Со удмурт кылын чузъяськоз. Композициез элькун филармониысь кык коллективъёс «Наш День Победы» акци улсын гожтӥзы

Со сяна, Ижкар кузя тямыс машинаос ветлозы, отысь Вормон кырӟанъёс но ӟечкыланъёс чузъяськозы.

Озьы ик 10 часысен 19 часозь «Звонок ветерану» акци радъяськоз. «Вормонлэн волонтёръёсыз» Удмуртиын улӥсь Быдӟым Атыкай ожысь вань ветеранъёслы (247 адямилы) жингыртозы но Вормон Нуналэн ӟечкылалозы. Со вакытэ ик «Мы вместе» ӵектослэн волонтёръёсыз «Вамродные!» акци улсын озьы ик ожысь вань ветеранъёсты ӟечкылалозы но сиён-юонэн бичетъёс но сяськаос кузьмалозы. 

11 часын «Бессмертный полк онлайн» акциез возьматон кутскоз. Со Россиысь медиаэкранъёсын, пӧртэм online-платформаосын, 2020.polkrf.ru порталын чакламын. Акцие пыриськон понна куриськон келяны но ветеран сярысь ивор сётыны 9-тӥ куартолэзе 16 часозь луэ на. Акци сярысь пыр-почгес чӧлсконпусъя тодыны луэ. Быдэс Россиетӥ виртуальной шествие 2 миллионлэсь трос адями пыриськоз.

Ижкарын, Можгаын, Грак но Кизнер ёросъёсын ветеранъёслэн коркаоссы дорын парадъёс ортчозы. 

Ижкарын кужымо ёзэсъёсын тыршисьёс Алексей Михайлович Рыловез сӥлы карозы. Со Совето армиын рядовой луыса службазэ нуиз. 1943-тӥ арысен Калининград фронтысь частьёсын ожмаськиз. Ож сюрессэ автомат ротаысен кутскиз. 1944-тӥ арын пӧсьтолэзе Псков но Остров вискысь тушмонъёслэсь обороназэс пазьгем но каръёсты мӧзмытэм бере, бур кизэ зол сӧсыртӥз. Ньыль толэзь госпитальын эмъяськыса, улосчимы нош ик фронтэ берытскиз. Огаз разведкаын сое нош ик зол сӧсыртӥзы, озьы Вормон Нуналэз госпитальын пумитаз. Эмъяськонэз 1945-1946 аръёсы ортчиз, со вакытэ ӵыжы-выжыосызлы ивортэк ышемез сярысь ужкагаз вуиз. Ож бере Алексей Михайлович фельдшеръёслы школаез но Ижкарысь эм институтэз йылпумъяз, 7 номеро медсанчастьын терапевт луыса ужаз. Трос аръёс ӵоже Удмуртиысь тазалыкез утёнъя министерство бордын ужась граждан оборонаысь эм службалэн ужаз мыло-кыдо пыриськиз. Отечественной войналэн I степенё орденэныз, «За отвагу», «За Победу над Германией в Великой Отечественной войне 1941-1945 гг» медальёсын пусъемын.

10 часысен 19 часозь ветеранъёслэн азбаръёсазы агитбригадаослэн концертъёссы азьланьтӥськозы

19 часын - Минут ӵоже чус улон.

19 час 1 минутэ Удмуртиын улӥсьёс ветеранъёссылэн патретъёсынызы балконъёсазы потозы, укнооссэс усьтозы но ӵошен «День Победы» кырӟанэз быдэстозы.

21 час 50 минутэ «Фонарики Победы» акци луоз. Элькунамы улӥсьёс укнооссы доры султозы но одӥг дыре фонарикъёссэс ӝуатозы, озьы Быдӟым Вормонэз дурем ветеранъёслы подвигзы понна тау карозы.

Тодэ вайытом, Вормон Нуналлы сӥзем салютэз мукет нуналлы выжтӥзы



Наверх
Вниз