Ижкар-11 °C
22 -тӥ толшор 2021 Удмуртарня
18+

Истори тодосъя доктор Маргарита Иванова улонысь кошкиз

  • 230
  • 0
Ижкар / Удмуртия
Истори тодосъя доктор Маргарита Иванова улонысь кошкиз

12-тӥ куартолэзе улонысь кошкиз истори тодосъя доктор, Удмурт Элькунысь тодос удысысь дано ужась, археолог, Удмуртилэн кун премиезлэн лауреатэз Маргарита Иванова. Со сярысь «Удмурт Кенеш» огазеяськонлэн «ВКонтакте» мерлыко вотэсысь бамаз ивортэмын.

Маргарита Григорьевна верантэм трос тыршиз удмурт калыклэсь шор дауръёсысь историзэ но культуразэ эскеронлы, усьтонлы. Гожтэм ужъёсызъя асьмеос тодӥськом, кызьы улӥллям вашкала выжыосмы Чупчи котырын
«Удмурт Кенеш» огазеяськонлэн пресс-службаез

Солэн нимыз люконтэм герӟаськемын Иднакарен. Вашкала карлэсь историзэ кыре поттыса но эскерыса, со наукае бадӟым пытьы кельтӥз. Прикамьеысь такем бадӟым памятникез шедьтыса но узыр материалъёс люкаса, Маргарита Григорьевна удмурт лулчеберетлы но, историлы но выль шокчон но утчаськон сюрес сётӥз, верамын Вань удмуртъёслэн огазеяськонзылэн ивораз.

«Удмурт Кенешлэн» тӧроез Татьяна Ишматова но огазеяськонлэн ёзчиосыз Маргарита Григорьевна Ивановалэн ӵыжы-выжыосызлы, матысь адямиосызлы но ӵош ужам эшъёсызлы мур куректэмзэс верало. Соос борды ивортодэтъя «Удмуртия» агентстволэн редакциез но итӥське.

Профессорлэн ӵыжы-выжыосызлы но ӵош ужась эшъёсызлы куректэмзэ вераз Удмуртиысь Кун Кенешлэн тӧроез Владимир Невоструев но.

«Бадӟым сюлэмо адями, со тодос но эскерон уженыз, дышетӥсь но публицист сямен Удмуртиез но быдэс кунмес азинтон понна дунъянтэм трос лэсьтӥз. Маргарита Григорьевналэн бадӟым ужезлы луыса Удмуртиын Россиысь финн-угор калыкъёслэн шор дауръёсысь культуразыя нырысетӥез «Иднакар» музей-заповедник кылдӥз, калык киужъёсты улӟытон кутскизы, удмурт калыклэн аспӧртэм лулчеберетэныз но историеныз тунсыкъяськон будӥз. Вордскем музъемзэ яратон но гажан мылкыдзэ со вань улонэтӥз нуиз, вуоно поколениослы туж шер пумиськылӥсь кылёсбур кельтӥз. Маргарита Григорьевна сярысь сайкыт тодэ ваёнъёс сюлэмъёсамы пыраклы кылёзы», - верамын Кун Кенешлэн тӧроезлэн телеграммаяз. 

Маргарита Григорьевнаен люкиськон 14-тӥ куартолэзе 10 часысен 11 часозь Ижкарысь «Небеса сервис» огазеяськонын (Воткинское шоссе урам, 67) ортчоз.

ВАТСАН

Маргарита Григорьевна Иванова 1945-тӥ арын 20-тӥ шуркынмонэ Можга ёросысь Вылӥ Кватчи гуртын дышетӥсьлэн семьяяз вордӥськиз. 1963-тӥ арын Можгаысь педучилищеез йылпумъяз. Бӧрысь кык ар ӵоже вордскем гуртысьтыз школаын покчи классъёсты дышетӥсь луыса ужаз. 1965-1969 аръёсы Дышетӥсьёсты дасянъя удмурт институтын (али УдГУ) историяя факультетын тодон-валан люказ. Собере Удмуртиысь шаертодонъя элькун музейын революци дорозь вакытлэн историезъя ёзэтын ужаз. 1970-1973 аръёс Москваысь Совето Союзлэн тодосъя академиезлэн археологияя институтаз аспирантураын «Хозяйство северных удмуртов во второй половине IX - начале XIII веков» темая кандидат диссертацизэ дасяз но 1975-тӥ арын утиз. 1973-тӥ арысен Удмуртиысь история, кылъя но литературая институтын археологияя но этнографияя ёзэтын тодосъя валтӥсь ӧнерчи луыса ужаз, 1980-тӥ арысен – археологияя ёзэтэн кивалтӥсь. Маргарита Григорьевна удмуртъёслэн вашкала историзыя 200-лэсь трос публикациос поттӥз. Тодосчи удмурт калыклэсь шор дауръёсы улэм-вылэмзэ, лулчеберетсэ эскериз. 
Тодос удысэ бадӟым ватсэт IX-XIII дауръёсы Иднакарлы сӥзем ужъёсыз пыртӥзы. Трос аръёс ӵоже раскопкаос ортчытъяса, куд-ог шедьтосъёсты эскерыны Россиысь тодосъя центръёсысь ӧнерчиосты кыскыса, люкам материалъёсыз тодосчиослы удмуртъёслэн историзы но лулчеберетсы шоры мукет синмын учкыны луонлык усьтӥзы. Солэн всесоюзной, улосвыл конференциосын, озьы ик Сыктывкарын (1985-тӥ арын), Дебреценын (1990-тӥ арын), Оулуын (1993-тӥ арын), Ювяскюлеын (1995-тӥ арын) калыккуспо конгрессъёсын докладъёсыз эскерисьёсты пумтэм тунсыкъятӥзы. Маргарита Григорьевналэн кичӧлтэмезъя Иднакарлы - вашкала удмурт карлы - музей инлык сётӥзы.


Наверх
Вниз