100 лет государственности Удмуртии
Ижкар+15 °C
28 -тӥ куартолэзь 2020 Покчиарня
16+

Удмуртилэн тӧроез Можга ёросысь Адамовъёслы «Анай-атайлэн данэз» пусъёс сётӥз

  • 341
  • 0
Можга / Удмуртия
Удмуртилэн тӧроез Можга ёросысь Адамовъёслы «Анай-атайлэн данэз» пусъёс сётӥз
Туспуктэм: Удмуртиысь тӧролэн но кивалтэтлэн пресс-службазы

Удмуртилэн тӧроез Александр Бречалов Можгае но Можга ёросэ ужъя ветлыкуз, Семьялэн калыккуспо нуналэз азьын Адамовъёслэн семьязылы «Анай-атайлэн данэз» («Родительская слава») пусъёс сётӥз. Со сярысь элькун тӧролэн но кивалтэтлэн пресс-службазы ивортэ.

1-тӥ инвожое Лариса но Виктор Адамовъёс марӟан сюанзэс пусъёзы. Соос 30 ар ӵоже ӵош уло ини, вить пиналзэс будэтӥзы – куинь пизэс но кык нылзэс.

Лариса Адамова вань улонзэ Можга ёросысь Ломеслуд гуртысь нылпи садын визьнодасьлэн юрттӥсез луыса ужаз. Виктор Адамов – «Россия» огазеяськонын пудо вордӥсь.

Элькунамы кутэм сюбегатонъёсын сэрен бадӟым ӝӧк сьӧрын чай юыса, кенешыса пукыны ӧз кылды, но улосвыл тӧроен кузьмам чай юон сервиз семьяязы кема аръёслы синпельлы кылёз. Со сяна, сюбегатонъёсты куштэм бере, Адамовъёс быдэс бадӟым семьяенызы цирке вуылозы.

Али куд-ог сюбегатонъёс ужало на. Но, озьы-а, тазьы-а, асьмеос огсыр улонэ берытскомы. Соин тӥледлы сертификатъёс кузьмаськом. Цирк усьтӥськиз ке, быръе программа, нуналзэ но лыктэ возьматонэз учкыны
Александр Бречалов, Удмуртилэн тӧроез

Элькунлэн тӧроез Адамовъёслы вить пиналзэс рос-прос визьнодамзы понна тау кариз. Бадӟымъёсыз ас семьяоссэс кылдытӥзы ини, покчиосыз – дышетсконын но спортын быгатонлыкъёссэс возьмато. Кылсярысь, бадӟымез Елена нылзы Ижкарысь вузкаронъя но экономикая техникумез «товаровед» ӧнеръя быдтӥз. Бадӟымез Александр пизы эм удысын шоръёзо дышетскем басьтӥз, али тылпу кысӥсь луыса тырше. Шоретӥез Наталья нылзы Можгаысь дышетӥсьёсты дасянъя колледжын нырысетӥ курсэз йылпумъя. Нош покчиосыз пиналъёссы – Артём но Диана – школаын дышетско, школа, спортъя, творчествоя ужрадъёсы мыло-кыдо пырисько.

Лариса Яковлевна но Виктор Васильевич куинь полэс песянай-песятай но ини. Соос улосвыл тӧролы саклык висъямез понна тау каризы но «Анай-атайлэн данэз» пусъёсэс юртазы тужгес адӟиськись интые понозы шуыса пусйизы.

Удмуртиын «Анай-атайлэн данэз» пусэз 2013-тӥ арын юнматӥзы. Соин вить но солэсь трос нылпиосты йӧно будэтэм анай-атайёсты но куинь но солэсь трос нылпиосты йӧно будэтэм огназы атайёсты пусъё. Та дырозь данъетэз трос нылпиё 135 семьяос но огназы кылем 19 атайёс басьтӥзы. 2020-тӥ арын пусэз трос нылпиё 19 анай-атайёслы сётозы

Тодэ вайытом, Можгае вуылыкуз Александр Бречалов «Можга» йӧ дворецез лэсьтон ужъёсты эскериз, Можга ёросысь «Заря» гурт возёс-колхозлэн выль ӵектосэныз тодматскиз.



Наверх
Вниз