Ижкар+19 °C
2 -тӥ пӧсьтолэзь 2020 Покчиарня
16+

Песянайлэн нуналэзлы сӥзем крезьгуро ужрадэн ортчизы Грак ёросысь лулчеберет удысын ужасьёс гуртысь урамъёстӥ

  • 250
  • 0
Грак / Удмуртия
Песянайлэн нуналэзлы сӥзем крезьгуро ужрадэн ортчизы Грак ёросысь лулчеберет удысын ужасьёс гуртысь урамъёстӥ
Туспуктэм: vk.com (Татьяна Овсянникова)

26-тӥ куартолэзе Грак ёросысь Вуж Эгра гуртысь Лулчеберет юртын ужасьёс гуртысьтызы арлыдо нылкышноосты Песянайлэн нуналэныз ӟечкыласа, кырӟаса урамъёс кузя «Пою для Вас» акциен ортчизы. Со сярысь ивортодэтъя «Удмуртия» агентстволэн корреспондентэзлы Лулчеберет юртэн кивалтӥсь Татьяна Овсянникова вераз.

Солэн кылъёсызъя, азьвыл та нуналэ клубысьтызы «Эгра кенакъёс» ансамбле, «Пумиськон» клубе потасьёсын люкасько но италмас бусые ветло вал. Нош туэ чер вӧлмонэн шугъяськытӥсь югдур кылдэмен пумиськонлэсь возиськоно луиз, но песянайёсты ӟечкылатэк кельтэмзы ӧз поты.

9-тӥ Маез тазьы ортчытӥм вал ини. Гурт калык ик куриз вал, ми, пе, потом капка азямы, тӥ ортче, шулдыр луоз. Сэре пуким, пуким малпаськыса но, мар-о бон, люкаськыны уг яра ӵош, нош ӟечкылам потэ. Тӥни озьы… Азьвыл ӧм вералэ, тросгес потысалзы, дыр, песяйёсмы но. Толон ӝыт кенешыса, туннэ ӵукна тӥни сигналить карыса, жингыръяса, потӥзы. Ми тодмо кырӟанъёсмес быдэстӥм, «Вож куаро кызьпуос» кырӟанмес ярато песяйёс, соегес кырӟам. Быдэс гуртмес ортчим
Татьяна Овсянникова, Вуж Эгра гуртысь Лулчеберет юртлэн кивалтӥсез

Гуртысь песянайёсты ӟечкыланы куинь кузя потӥзы: ачиз Татьяна Овсянникова, Ирина Атаманова но аккомпаниаторзы Галина Спиридонова.

Песянайёс кырӟасьёсты шумпотыса, синвуаськыса пумитазы.

Кырӟаны кутскиськом, бӧрдо. Мӧзмизы ини, клубе люкаськемзы потэ. Азьлогес ик верало вал ини, ку, пе, быроз ини та вирус, клубе люкаськем потэ. Ӵем потало вал клубе, ӵем пырало вал. Няньлы но пото, милям лавка клубын бере, чай юыны чаляк гинэ пыро вал ини. Нош али пырыны ум лэзиське
Татьяна Овсянникова, Вуж Эгра гуртысь Лулчеберет юртлэн кивалтӥсез

Песянайёс бадӟым тау каризы лулчеберетъя юртын ужасьёслы, таӵе шуныт кылъёс шер гинэ кылоно шуыса пусйизы.

Тодэ вайытом, куартолэзь пумозь Удмуртиын улӥсьёс йӧскалык дӥськутэн нылпиосын туспуктэмъёсъя «Дети России – 2020» вожвылъяськонын куара сётонэ пыриськыны быгато.



Наверх
Вниз