Ижкар+22 °C
8 -тӥ гудырикошкон 2020 Кӧснунал
16+

«Нуллы маскаез шонер!» акци ортчиз таяз арняе Удмуртиысь 14 ёросъёсын

  • 199
  • 0
Ижкар / Удмуртия
«Нуллы маскаез шонер!» акци ортчиз таяз арняе Удмуртиысь 14 ёросъёсын
Туспуктэм: udmurt.ru

Удмуртиысь ёросъёсын «Нуллы маскаез шонер!» («Носи маску правильно!») акци азьланьтӥське. Таяз арняе со Грак, Якшур-Бӧдья, Вавож, Сьӧлта, Сюмси, Можга, Балезино, Камбарка, Дэри, Дэбес, Кияса, Ува, Кизнер но Сарапул ёросъёсын ортчиз, ивортэ элькун кивалтэтлэн но тӧролэн пресс-службазы.

Кияса черкогуртын вузкарон площадьын но Первомайской посёлокысь магазин дорын калыклы 500 маскаос люкылӥзы. Волонтёръёслэсь ужзэс ёрос лыдӟетъюртын ужасьёс быдэстӥзы. Библиотекалэн кивалтӥсез Елена Михайлова тросэз чакласько, калыко интыосын маскаос нулло шуыса пусйиз.

Туж умой, волонтёръёслэсь дунтэк маска басьтӥ шуыса. Мынам маскаосы ӵапак быризы, мон сюлмаськисько но аптекае басьтыны мынӥсько вал ини
Галина Николаевна, Киясаын улӥсь

Сюмси черкогуртын волонтёръёс Юлия Бахматова но Елизавета Жуйкова 1 сюрс 500 маскаос сётъязы. Нылашъёслэсь тыршемзэс гуртоос дунъязы.

Ува ёросысь волонтёръёс тужгес трос калык ветлоно интыосын ужазы, маскаос но ивортонэн флаеръёс люкылӥзы.

Красногорск черкогуртын маскаосты куинь арня сётъяло ини. Волонтёръёс урамъёс кузя ветло, озьы ик бадӟым магазинъёс дорын сыло.

Жаляса верано, милям туннэ тросэз мер интыосын ветлон куронъёсты уг быдэсъяло но маскаос уг нулло
Надежда Захарова, Красногорскысь волонтёр

Кизнерысь волонтёръёс покчиарняе кык площадкаын ужазы. Котькуд адямилы маска но сое шонер нуллон сярысь памятка сётӥзы.

Дэри ёросын маскаосты 24 волонтёръёс люкылӥзы.

Удмуртиын акци ужаны кутскем дырысен 57 сюрслэсь трос маскаос сётъязы ини

Тодэ вайытом, кемалась ӧвӧл,маскаос Ижкарын но люкылӥзы



Наверх
Вниз