Ижкар+19 °C
2 -тӥ пӧсьтолэзь 2020 Покчиарня
16+

Выльысь улӟытэм гуртъёслэн фестивальзылы нимсуред бырйизы Удмуртиын

  • 94
  • 0
Мувыр / Удмуртия
Выльысь улӟытэм гуртъёслэн фестивальзылы нимсуред бырйизы Удмуртиын
Туспуктэм: vk.com (Минсельхоз УР)

Удмуртиын выльысь улӟытэм гуртъёслэн «Деревня – душа России» нырысетӥ фестивальзылэн нимсуредэз (логотипез) тодмо луиз. Со сярысь элькунысь гурт возёсъя но сиён-юонъя министерстволэн пресс-службаез ивортэ.

Нимсуред лэсьтонъя вожвылъяськонын Казаньысь 23 аресъем Ильмир Мусин вормиз. Егит пи мерлыко вотэсъёсын менеджер луыса Казаньысь огаз IT-компаниын тырше.

Удмуртиын выльысь улӟытэм гуртъёслэсь фестивальзэс ортчытон но солы нимсуред кылдытонъя вожвылъяськон ялэм сярысь иворъёсысь тодӥ – со выллем ужрадъёс сярысь азьвыл нокытысь ӧй кылылы. Соин ик со мыным туж тунсыко потӥз, вожвылъяськонэ пыриськыны малпай
Ильмир Мусин, выльысь улӟытэм гуртъёслэн фестивальзылы нимсуред кылдытӥсь

Авторен ӵектэм нимсуредын коркаослэн липетъёссы но сюлэм суредамын. Со Россиысь гуртъёсты, вордӥськем палъёсты яратэмез возьматӥсь пус луэ. Суредлэн котькуд люкетэз выльысь улӟытонлэсь азинскемзэ возьматэ. Нош ог-огзы вӧзын сылӥсь корка липетъёс пичи дыр сярысь тодэ ваё, куке быдэс гурт одӥг бадӟым семья кадь потэ вал.

Тодэ вайытом, вожвылъяськонэ 13 муртлэсь 19 ужъёс вуизы. Фестиваль Эгра ёросысь Мувыр гуртын 25-тӥ пӧсьтолэзе ортчоз. Али радъясьёс ужрадлэн программаез бордын ужало – Лоза шур дурын ярмарка, элькунысь творчествоя коллективъёслэн концертсы, ёрос газетъёсын но ёросъёслэн гуртъёссэс но фермер возёсъёссэс азинтонъя тужгес усто практикаосынызы тодматон бордын. 



Наверх
Вниз