Ижкар+19 °C
7 -тӥ пӧсьтолэзь 2020 Пуксён
16+

Геннадий Красильниковлэн вордӥськем нуналэзлы сӥзем флешмоб ортчытозы Удмуртиын

  • 78
  • 0
Ижкар / Удмуртия
Геннадий Красильниковлэн вордӥськем нуналэзлы сӥзем флешмоб ортчытозы Удмуртиын
Туспуктэм: culture.ru

7-тӥ пӧсьтолэзе, тодмо удмурт гожъяськисьлэн Геннадий Красильниковлэн вордӥськем нуналаз, Удмуртиын солэн творчествоезлы сӥзем «Читаем Красильникова» флешмоб ортчытозы. Со сярысь ивортодэтъя «Удмуртия» агентстволэн корреспондентэзлы ужрадэз радъясь, Красильниковлэн Ижкарысь музей-квартираеныз кивалтӥсь, кылосбур тодосъя кандидат Мария Ившина ивортӥз.

Флешмобе пыриськон понна Геннадий Красильниковлэн произведениосысьтыз удмурт яке ӟуч кылын люкетъёссэ лыдӟыса видео гожтоно но 7-тӥ пӧсьтолэзе ужез музейлэн «ВКонтакте» мерлыко вотэсысь огиназ поттоно.

Куд-огезлэн Геннадий Красильниковез лыдӟемзы но ӧвӧл ук. Соин ми малпам таӵе флешмоб ортчытыны. <…> Лыдӟыны кыӵе ке повестьысь яке романысь, яке веросысь люкетсэ яралоз. Кыӵе ке но яратоно интызэ яке кыӵе ке но туж чебер пейзаж сярысь. Адямиослэн яке выльысь ваньзэ лыдӟыны, яке воксё но тодматскыны Красильниковлэн вань книгаосыныз мылкыдзы мед луоз
Мария Ившина, Геннадий Красильниковлэн Ижкарысь музей-квартираеныз кивалтӥсь

Ужрадэ вань мылкыд карисьёсты пыриськыны ӧтё.

Мария Ившиналэн верамезъя, Геннадий Красильниковлэн музей-квартираяз ужасьёслы таӵе флешмоб ортчытыны Александр Пушкинлэн вордӥськем нуналаз радъям флешмобзы мылкыд сётӥз. Соку лыдӟисьёс ужрадэ туж мыло-кыдо пыриськизы. Ужъюртлэн мерлыко вотэсысь бамаз ог 17 ужъёс вуизы.

Тодэ вайытом, кемалась ик ӧвӧл Ижкарын Литературая «Будӥсь писательлэн ӝок сьӧраз» VII элькун вожвылъяськонлы йылпумъянъёс лэсьтӥзы.



Наверх
Вниз