Ижкар+19 °C
7 -тӥ пӧсьтолэзь 2020 Пуксён
16+

56 миллион манетлэсь трос коньдон утӥзы Удмуртиысь ӵектосъёс Азьмуртлэн грантъёсъя фондысьтыз

  • 123
  • 0
Ижкар / Удмуртия
56 миллион манетлэсь трос коньдон утӥзы Удмуртиысь ӵектосъёс Азьмуртлэн грантъёсъя фондысьтыз
Туспуктэм: Анжелика Тихонова

Удмуртиысь 58 ӵектосъёс Азьмуртлэн грантъёсъя фондэныз 2020-тӥ арын ортчытэм кыкетӥ конкурсын вормисе потӥзы. Соос оглом 56 миллион 67 сюрс 174 манет утӥзы. Вормисьёслэн лыдметсы вожвылъяськонлэн нимлыко сайтаз шараямын.

«Удмурт Кенеш» огазеяськонлэн «Шудор» ӵектосэз 1 миллион 833 сюрс 513 манет утӥз. Со коньдонэз Сьӧлта ёросысь Зямай (Малый Жайгил) гуртын калмез удмуртъёслэсь музей-усадьбазэс кылдытыны чаклало. Ӵектосэз быдэсъян борды туэ пӧсьтолэзе басьтӥськозы, йылпумъяны вуоно арын инвожоозь чакламын.

369 сюрс 36 манет Глазкарысь ватсаса тодон-валан сётонъя «Лингвистический центр» огазеяськонлэн удмурт лулчеберетъя «Звон Италмаса» - #ИталмасFest нылпи фестиваль ортчытонъя ӵектосэз утӥз. Фестиваль туэ коньывуонысен 2021-тӥ арын южтолэзёзь 17 номеро школаын мыноз. Со улсын отын удмурт калыклэн йылолъёсызлы сӥзем пӧртэм ужрадъёс ортчозы, нош Центр англи но удмурт кылъёсты дышетонъя кыккылолыко занятиос нуоз.

Азьвыл 17 номеро школаын арлы быдэ «Зарни италмас» («Золотой италмас») фестиваль ортчытъязы. 2016-тӥ арын 57 пыриськисез вал ке, 2018-тӥ арын 300 луиз ни

Кыкетӥ вожвылъяськонэ 26 тулыспалысен 6-тӥ оштолэзёзь быдэс кунысь котькулэсь трос ӵектосъёс вуизы – 11 сюрс 85. Со пӧлысь 2 сюрс 402-ез 4 миллиард 600 миллион манет тыр юрттэт басьтозы.

Тодэ вайытом, 2020-тӥ арын ортчем нырысетӥ вожвылъяськонын Удмуртиысь 44 ӵектосъёс 35 миллион 200 сюрс манет утӥзы.



Наверх
Вниз