26 -тӥ коньывуон 2020 Вордӥськон
18+

Быдӟым Атыкай оже пыриськем чугун сюрес вылын ужасьёслы синпель пус пуктозы Ижкарын

  • 110
  • 0
Ижкар / Удмуртия
Быдӟым Атыкай оже пыриськем чугун сюрес вылын ужасьёслы синпель пус пуктозы Ижкарын
Туспуктэм: vk.com (Администрация Ижевска)

Ижкарын Быдӟым Атыкай оже пыриськем чугун сюрес вылын ужасьёслы синпель пус пуктозы. Со сярысь кар администрацилэн пресс-службаез ивортэ.

Ижкар администрациысь историяя но лулчеберетъя синпелетъёсты утёнлы, ульчаослы, пролкаослы но дугдылонниослы ним сётонлы но воштонлы юрттонъя ӧри Горьковской чугун сюреслэн кивалтӥсезлэн воштӥсезлэн Александр Лапшинлэн ӵектонэз понна дурбасьтӥз.

Синпель пусэз Гагарин нимо ульчаысь Алексей Титов нимо сквере пуктозы

Буре ваён огъет фронтын ожмаськем но уженызы Вормонэз матэктытэм адямиослы гажамез но тау каремез возьматон луоз. Быдӟым Атыкай ож аръёсы улосчиосмы вакчи дыр ӵоже Ижкар – Балезино чугун сюресэз лэсьтӥзы. Уже 40 сюрслэсь трос адями пыриськиз. Соос 3 миллион кубометр музъем ужъёсты быдэстӥзы, сюреслы 95 иськеме нюлэсъёсты коразы.

Эскизъя пичи вырйылын гырлыен гырлыжугонни пуктозы, солэн паллян палаз - Быдӟым Атыкай ож вакытысь паровозлэн кузэн питранъёсыз, паллян палаз - ож аръёсты гожтэмен стела. Котырысьтыз интывылэз брусчаткаен шобыртозы, вож будосъёс мерттозы, тыл, пуконъёс, жагтыронниос пуктозы.

Ужъёсты 1-тӥ гудырикошконозь – Чугун сюрес лэсьтӥсьёслэн нуналзы дорозь – быдэстыны чаклало.

Кызьы верамын ивортонын, «Уж данлыкъя кар» («Город трудовой доблести») дано ним басьтон вожвылъяськонэ пыриськись Ижкар понна синпель пусэз пуктон уката пусйымон луэ.

Тодэ вайытом, 22-тӥ инвожое Ижкарын, быдэс Россиын сямен ик, «Буре ваён сюсьтыл» («Свеча памяти») ужрад ортчоз



Наверх
Вниз