Ижкар+19 °C
7 -тӥ пӧсьтолэзь 2020 Пуксён
16+

«Удмурт Кенеш» огазеяськонлэн исполкомез ортчиз Ижкарын

  • 80
  • 0
Ижкар / Удмуртия
«Удмурт Кенеш» огазеяськонлэн исполкомез ортчиз Ижкарын
Туспуктэм: vk.com (УДМУРТ КЕНЕШ official)

18-тӥ инвожое Ижкарысь Кызьпу арамаын «Удмурт Кенешлэн» исполкомез ортчиз. Со сярысь огазеяськонлэн пресс-службаез ивортэ.

Кенешчиос сяна, ужрадэ Кун Думаысь депутат Алексей Загребин, Удмуртиысь йӧскалык политикая министр Лариса Буранова, Ижкар администрацилэн тӧроезлэн воштӥсез Дмитрий Чистяков но лулчеберетъя министерствоысь муниципал кылдытэтъёсын кусып возись ёзэтлэн кивалтӥсез Зинаида Никитина пыриськизы.

Нырысетӥ юан Кызьпу арама пумысен ӝутӥзы. Сое умоятон-утялтон сярысь вераськонъёс кемалась мыно ини. Дмитрий Чистяков кар кивалтӥсьёс югдурез чакласа возё шуыса оскытӥз.

Ми валаськом, удмуртъёслэн та туж кулэ интызы. Соин ик малпасько, азьпалан но ӵошен кариськыса ужаломы, Кызьпу арамаез одно ик выльдомы
Дмитрий Чистяков, Ижкар администрацилэн тӧроезлэн воштӥсез

Озьы ик Дмитрий Чистяков Россилэн нуналэзлы но Ижкарлэн нуналэзлы афишаосты, рекламаосты кык кылын лэсьтымтэ пумысен но валэктонъёс сётӥз. Солэн кылъёсызъя, удмурт кыл юри поттытэк кельтэмын ӧй вал. Ужпумъёс пуктэмын вал, но праздник азьын огыр-бугыр луэмен, сыӵе янгыш луиз. Кар администрацилэн тӧроезлэн воштӥсез кылзэ сётӥз, азьпалан сыӵе учыръёс уз луэ ни шуыса.

Пумиськонын мукет ужпумъёсты но ӝутӥзы. Кылсярысь, Удмуртилэн кунлыкезлы 100 ар тырмонэз пусъён сярысь вераськизы. Со улсын ортчоно ужрадъёсын йӧскалык политикая министр Лариса Буранова тодматӥз. Министр пусйиз, пандемиен сэрен туж тросэз малпам ужрадъёс уз ортче шуыса. Озьы ке но, та нуналъёсы «Выль» шулдыръяськонлы дасяськонъёс мыно. Вуоно арняе оргкомитет ужаны кутскоз. 

Чаклам ужрадъёс улсын Кузебай Гердлэсь, Трокай Борисовлэсь но Иосиф Наговицынлэсь синпелетъёссэс тупатъялозы. Ужез шуркынмонозь йылпумъяны чаклало.

Лулчеберетъя министерствоысь муниципал кылдытэтъёсын кусып возись ёзэтлэн кивалтӥсез Зинаида Никитина Кузебай Герд нимо йӧскалык музейлы но коньдон висъяськоз шуыса пусйиз. Музейлы, кунлыклы сямен ик, туэ 100 ар тырмоз. Лэсьтӥськон ужъёс йӧскалык библиотекаын но азьланьтӥсько. Озьы ик али малпасько, кельтоно-а лыдӟетъюртлы Ленинлэсь нимзэ яке ӧвӧл. Кенешчиос ужъюртлы Владимир Короленколэсь нимзэ сётыны дэмлазы. Со уго гожъяськись но вал, элькунмы понна но трос лэсьтӥз.

Тупатъян ужъёс ёросъёсын но мыно. Лулчеберетъя юртъёсты тупатъяло, кытын ке выльёссэ пукто.

Тодэ вайытом, Удмуртилэн кунлыкезлы 100 ар тырмонлы ужрадъёс элькунамы вань санитар куронъёсты быдэсъяса ортчозы



Наверх
Вниз