Ижкар+19 °C
6 -тӥ пӧсьтолэзь 2020 Вордӥськон
16+

Совето Союзлэн Героезлы Нина Ульяненколы буре ваён пул усьтӥзы Удмурт кун университетын

  • 66
  • 0
Ижкар / Удмуртия
Совето Союзлэн Героезлы Нина Ульяненколы буре ваён пул усьтӥзы Удмурт кун университетын

22-тӥ инвожое Удмурт кун университетлэн кыкетӥ дышетон юртаз Совето Союзлэн Героезлы Нина Ульяненколы буре ваён пул усьтӥзы. Ужрадэ ивортодэтъя «Удмуртия» агентстволэн корреспондентэз но вуылӥз.

Нина Ульяненко Саратовысь авиаци техникумын дышетскиз. 1940-тӥ арын нырысьсэ омыре ӝутскиз. Быдӟым Атыкай ож аръёсы тушмонэн Сталинград палан жугиськиз, Крымез, Уйпал Кавказэз, Белоруссиез, Польшаез но Восточной Пруссиез мозмытонэ пыриськиз. Ожмаськыса Берлинозь вуиз. Ож аръёс ӵоже «уй ведӥн» 900-лэсь трос пол ожгар лобӟонъёсы потаз.

Быдӟым Атыкай ож бере ни, 1957-тӥ арын, Нина Ульяненко Дышетӥсьёсты дасянъя удмурт кун институтэз (али УдГУ – ред.) йылпумъяз. Дышетсконнилэн историяз со гинэ Совето Союзлэн Героез нимен пусъемын. Соин ик ужрадэз радъясьёс пусйизы, ожгар лётчица сярысь тодонъёсты утён – соослэн долгзы. Буре ваён пулэз 9-тӥ куартолэзе усьтыны чаклало вал, но выль коронавирус инфекци вӧлмонэн сэрен малпанзэс соку быдэстыны ӧз быгатэ.

Ми понна туж бадӟым дан, пединститутэз йылпумъясьёс пӧлын Совето Союзлэн Героез вань шуыса. Очной амалэн дышетскись студентъёс пӧлысь 437 пала адями ожъёсы пыриськиз. 212 мурт ожгар данъетъёсын пусъемын, 79 адямилэн кыклэсь трос данъетэз. Соин ик Вормонэ ватсэт, историез утён – со милям миссиямы, университетлэн миссиез. Война сярысь тодэ ваёнъёсты утён понна ми ваньзэ лэсьтомы
Галина Мерзлякова, Удмурт кун университетлэн кивалтӥсез

Буре ваён пулэз усьтон – со университетлэн Историяя но социологияя институтэзлэн ӵектосэз. Ӵапак истори факультетэз йылпумъяз Нина Ульяненко.

Тодэ вайытом, 2020-тӥ арын 8-тӥ куартолэзе Нина Ульяненколы буре ваён пулэз Ижкарын Пастухов нимо ульчаысь 13 юрт вылын усьтӥзы.  



Наверх
Вниз