Ижкар+19 °C
7 -тӥ пӧсьтолэзь 2020 Пуксён
16+

Удмуртилэн тӧроез «Удмурт Кенешлэн» азьветлӥсьёсыныз выль ӵектосъёс сярысь вераськиз

  • 139
  • 0
Ижкар / Удмуртия
Удмуртилэн тӧроез «Удмурт Кенешлэн» азьветлӥсьёсыныз выль ӵектосъёс сярысь вераськиз
Туспуктэм: Удмуртиысь тӧролэн но кивалтэтлэн пресс-службазы

Удмуртилэн тӧроез Александр Бречалов видеоконфенци амалэн радъям кенешонын «Удмурт Кенеш» огазеяськонлэн азьветлӥсьёсыныз выль ӵектосъёс сярысь вераськиз. Со сярысь улосвыл тӧролэн но кивалтэтлэн пресс-службазы ивортэ.

Али тросэн кылдӥсь ӵектосъёс пумысен вераськонъёсты радъян сяме пыриз ини. Соос та дыре кулэ, пуштросо но туала луо. Куд-огезлы мон мерлыко вотэсъёсын дурбасьтӥ, кылсярысь, туж чебер «Чеберай» ӵектослы, кылъя онлайн-ӵектосъёслы, нылпиослы «Шундыкар», «Тулкым» сменаослы. Туж умой, соос егитъёслы, семьяослы чакламын шуыса, соослы туж бадӟым кулэяськон. Шумпотӥсько, та пумиськонъёсын ӝутэм ужпумъёс, ваньмыз ӧвӧл ке но, сэрттэмын-пертчемын луо
Александр Бречалов, Удмуртилэн тӧроез

Озьы одӥгаз пумиськонын Ижкарысь Кузебай Герд нимо йӧскалык гимназилэсь юртсэ тупатъян но тӥрлык басьтон сярысь вераськизы вал. Та дырлы дышетсконниын актовой залэн но пырон азьзэ выльдӥзы ни, выль укноос пуктӥзы, мультимедийной арбериос но мебель басьтӥзы ни. Гужем ӵоже липетсэ тупатъян ужъёсты быдэстозы.

Таяз радэ улосвыллэн тӧроезлы нылкышно творчествоя «Чеберай» марафон сярысь рос-прос веразы. Кылем арын ӵектос Росси азьмуртлэн грантъёсъя фондысьтыз 2 миллион 560 сюрс манет утӥз. Туннэ со Удмуртиын одӥгез тужгес яркытэз но бадӟымез йӧскалык ӵектос.

Марафон улсын удмурт блогеръёс понна «Инстачеберай» вожвылъяськон ортчиз. Отчы Удмуртиысь 120 блогеръёс пыриськизы, озьы ик Италиысь но Финляндиысь. 22 ёросъёсын киужъёслэсь коньдон поттонъя, блог нуонъя, чебер дӥсяськонъя 105 мастер-классъёс радъязы. «Чеберай» вожвылъяськонлэн быръён люкетъёсаз 220 адями пыриськиз, 72-ез полуфиналэ потӥзы. Йылпумъян люкетаз 20 нылкышноос пыриськозы. Конкурслэн финалэз туэ 20-тӥ шуркынмонэ ортчоз.

Али ӵектослэн командаез «Cheberai» журнал кылдытон бордын ужа. Отчы «Чеберай» вожвылъяськонлэн полуфиналисткаосызлэн мастер-классъёссы, туала удмурт мода пырозы.

Пӧсьтолэзе пиналъёс понна «Чеберинка» ӵектос ужаны кутскоз. Чеберлыкъя но устолыкъя конкурслэн нырысетӥ кастингез гудырикошконэ ортчоз. Азьланяз чеберлыкъя но стилья йӧскалык школа, киужъёсъя йӧскалык школа но йӧскалык шоурум кылдытыны малпанъёс вань. 2021-тӥ арын марафонэз выль сямен радъяны чаклало, со семьяен творчестволы сӥземын луоз.

Александр Бречалов «Чеберай» марафонэн «Признание» элькун премия понна вожвылъяськонэ пыриськыны ӵектӥз

Озьы ик асьсэлэн ӵектосъёссы сярысь «Удмурт Кенешлэн» ёрос ёзэтъёсыз веразы. Глазовын Быдӟым Атыкай ожысь ветеранъёслы сӥзем синпелетъёсты но стелаосты тупатъяло. Дэриын журналистлы но гожъясьлы Эрик Батуевлы сӥзем лыдӟонъёс радъяло. Удмурт кун университетын удмурт дышетскисьёс понна визьбур многоборье ортчыто.

Тодэ вайытом, 11-тӥ инвожое Александр Бречалов Удмуртиысь йӧскалык огазеяськонъёслэн азьветлӥсьёсынызы пумиськылӥз. Соку асьсэлэн ӵектосъёсынызы удмурт егитъёслэн огазеяськонъёссы тодматӥзы. 



Наверх
Вниз