Ижкар+19 °C
7 -тӥ пӧсьтолэзь 2020 Пуксён
16+

Улосвыл анай капитал сётъялозы Удмуртиын 2021-тӥ арысен

  • 58
  • 0
Ижкар / Удмуртия
Улосвыл анай капитал сётъялозы Удмуртиын 2021-тӥ арысен
Туспуктэм: Руслан Нуриахметов

2021-тӥ арысен Удмуртиын куинетӥ но со бӧрсьы вордскем нылпи понна «улосвыл анай капитал» сётъялозы. Одӥг пол висъяськись 240 сюрс манетэз семья ипотекая нырысетӥ тыриськонэз сётыны яке нимаз корка пуктонэ кутыны быгатоз. Со сярысь улосвыл тӧролэн но кивалтэтлэн пресс-службазы ивортэ.

Со понна 75 миллион манет висъямын луоз. 2021-тӥ арын ини улон интызэс умоятыны кулэ карись трос нылпиё 300 семьяос со юрттэтэз басьтыны быгатозы. 2020-тӥ ар ӵоже со тыронэз сётъяны кулэ луись эрикрадо ужкагазъёсты дасяны чакламын
Татьяна Чуракова, Удмуртиысь мерлыко политикая но ужъя министр

Пусъём, кыкетӥ но со бӧрсьы нылпизы вордскем понна юрттэтэз Удмуртиысь семьяос Росси азьмуртэн кичӧлтэм «Демография» йӧскалык ӵектос улсын но басьто. Сое 2018-тӥ арысь 1-тӥ толшор бере вордскем но пиналлы куинь аресозь тырмытозь сётъяло.

2019-тӥ арын 9 сюрс 964 манетъем юрттэтэз 6 сюрс 400-лэсь трос семьяос басьтӥзы, со понна 554 миллион манет висъязы. Таяз арын тыриськонэз басьтыны быгатӥсь семьяослэн лыдзы 7 сюрс 500-озь вуиз. Соослы 350 миллион манет сётӥзы ни.

Со дыре ик 2020-тӥ ар пумозь улосвыл юрттэт ужа: 2017-тӥ арысь 31-тӥ толсурозь вордскем нылпиосын семьяослы 5 сюрс манет тыро.

Со сяна, улосвыл тӧролэн Александр Бречаловлэн кичӧлтэмезъя 2020-тӥ арын трос нылпиё семьяослы ватсаса юрттэт чакламын. 1-тӥ южтолэзьысен ваньмысьтыз сыӵе семьяосысь школае ветлӥсь пиналъёс дунтэк сиськыны быгато, азьвыл начар улӥсь трос нылпиё семьяос понна гинэ чакламын вал. Озьы 34 сюрс 500-лэсь трос пиналъёслэн школаын дунтэк пӧсь сиён сиыны луонлыклы кылдӥз. Таяз арын солы элькун коньдэтын ватсаса 64 миллион 100 сюрс манет висъязы.

Таяз арын со луонлыкез 27-тӥ оштолэзёзь, астэ ачид нимаз висъян режим ялытозь, гинэ кутыны быгатӥм. Но туннэ школаын сиськон интые пиналъёс сиён-юонэн бичетъёс басьто. Куарусёнысен дышем радлыкъя ужаны кутскомы ни шуыса малпасько, ми солы дасяськиськом

Озьы ик 1-тӥ южтолэзьысен трос нылпиё семьялэн табышысьтыз ипотека понна тыриськонэз куштӥзы. Со ватсаса 1 сюрс 100 семьялы мерлыко юрттэт басьтыны луонлык кылдытӥз, со пӧлын дышетскисьёслы мер транспортын дунтэк ветлон но 6,5 аресозь пиналъёслы дунтэк эмъюм басьтон.

Со сяна, 2020-тӥ ар кутсконысен ваньмызлэн трос нылпиё семьяослэн одӥг транспортлы вытлэсь ӝынызэ гинэ тырыны луонлыксы вань.

Удмуртиын 24 сюрс котыр трос нылпиё семьяос, со пӧлысь 70 процент палаез ёрмыса улӥсен лыдъямын но кунлэсь юрттэт басьто


Наверх
Вниз