Ижкар+19 °C
7 -тӥ пӧсьтолэзь 2020 Пуксён
16+

Удмурт пиналъёслы Башкириысь «Усточикар» лагерь туэ уз луы

  • 126
  • 0
Татышлы / Россия
Удмурт пиналъёслы Башкириысь «Усточикар» лагерь туэ уз луы
Туспуктэм: vk.com (Усточикар 2013-2019)

Башкириын удмурт пиналъёс понна арлы быдэ радъяськись «Усточикар» улосвылкуспо лагерь туэ уз луы. Со сярысь ивортодэтъя «Удмуртия» агентстволэн корреспондентэзлы Башкириысь удмуртъёслэн Историяя но лулчеберетъя центренызы кивалтӥсь Ирина Самигулова вераз.

Лагерь смена уз луы, малы ке шуоно милям ёросамы (Башкириысь Татышлы ёросын – ред.) коронавирусэн висисьёсмы туж-туж трос. Быдэс ёрос администрацимы карантинын. Эшшо ик лагерьмы но ёросамы интыяськемын. Нош смена улосвылкуспо, соин ик кышкыт ортчытыны, нылпиослы кышкытлык бадӟым
Ирина Самигулова, Башкириысь удмуртъёслэн Историяя но лулчеберетъя центренызы кивалтӥсь

Ирина Самигуловалэн верамезъя, лагерез, югдур тупатскиз ке, вуоно арын радъялозы. Программазы вожвылъяськонэз но ортчиз ини. Со сяна, 2021-тӥ арын пиналъёслы улон условиос но умойгес луозы.

Лагерьын ялан тупатъян ужъёс мыно, трос выльдо. Озьыен, вуоно арлы условиос но умойгес луозы на
Ирина Самигулова, Башкириысь удмуртъёслэн Историяя но лулчеберетъя центренызы кивалтӥсь

Кивалтӥсь пусъе, лагерь понна ёрос тӧрозы Рушан Гараев зол дурбасьтэ, юрттэт сётэ. Туэ но лагерез ортчытыны ёрослэсь 50 сюрс манет тыр грантсэ утӥзы вал. Со сяна, элькунзы арлы быдэ 75-80 сюрс манет висъя, озьы ик Эшъяськон юртсы юрттӥське. Туэ лагерь ортчымтэ понна коньдон нокытчы уз ышы, со вуоно арын сменаез радъяны мыноз.

Тодэ вайытом, кылем арын лагере 90 нылъёс но пиос пыриськизы вал. Удмуртиын нылпи лагерьёсты пӧсьтолэзе усьтыны чаклало



Наверх
Вниз