Ижкар+19 °C
7 -тӥ пӧсьтолэзь 2020 Пуксён
16+

«Шундыкар» лагере мынон понна куриськонъёс кутыны кутскизы Удмуртиын

  • 75
  • 0
Ижкар / Удмуртия
«Шундыкар» лагере мынон понна куриськонъёс кутыны кутскизы Удмуртиын
Туспуктэм: vk.com (ШУНДЫКАР-2020)

Удмуртиын 2020-тӥ арын удмурт быгатонлыко пиналъёслы «Шундыкар» лагере мынон понна куриськонъёсты кутыны кутскизы. Со сярысь «Шунды» огазеяськонлэн «ВКонтакте» мерлыко вотэсысь огиназ ивортэмын.

Туэ «Шундыкар» 22-31 гудырикошконэ Ижкар вӧзысь «Берёзка» лагерьын радъяськоз. Отчы удмурт кылын вераськись, быгатонлыко 18 аресозь удмурт пиналъёсты кутозы.

Пиналъёс понна таӵе отрядъёс ужалозы:

Суредаськон (8-тӥ-11-тӥ классъёс). Татчы сюрон понна радъясьёслы куинь суред келяно: «Мон дорын» темалы пейзаж, натюрморт но портрет. Озьы ик гожтэтын пусъёно, кыӵе тодон-валан басьтэмды потэ «Шундыкар» лагерьын.

Литература (8-тӥ-11-тӥ классъёс). Улонысь тужгес но усто, кельшымон, синмаськымон учыр сярысь кылбур яке верос гожтоно.

Фольклор (5-тӥ-8-тӥ классъёс). Удмурт калык кырӟанэз яке эктонэз видеое гожтыса келяно (умой, кырӟан но, эктон но быдэстэмын луизы ке). Одно ик кытысь но кинлэсь соосты шедьтӥды, эскериды пусъёно.

Эстрада (8-тӥ-11-тӥ классъёс). Фонограмма чузъяськем улсын кык пӧртэм кырӟан быдэстоно, одӥгез удмурт кылын луыны кулэ, мукетыз — мылкыдъя. 

Крезьгурчиос (7-тӥ-11-тӥ классъёс). Куриськонэз 12-тӥ пӧсьтолэзёзь келяно. Крезьгуро инструментэн (электрогитараен, акустической гитараен, бас-гитараен, барабанэн, синтезаторен, арганэн, крезен но мукетъёсыныз) кык кырӟан быдэстыны дасяськоно. Соос пӧртэм стильёсын луыны быгато. 18-тӥ пӧсьтолэзе 10 часлы Ижкаре Эшъяськон юртэ ӧнерчиосын пумиськыны лыктоно (адресэз: Орджоникидзе урам, 33а номеро юрт).

Журналистика (7-тӥ-11-тӥ классъёс). «Малы мон кулэ шедьыны «Шундыкар» лагере «Журналистика» отрядэ» темалы эссе гожтоно. Ачид сярысь вераса, видео лэсьтоно (3 минутозь).

Видеоискусство (7-тӥ-11-тӥ классъёс). «Мар мон понна эрик?» темалы 2 минутъем видео лэсьтоно.

Театр (7-тӥ-11-тӥ классъёс). Удмурт кылын удмуртъёслэн историенызы герӟаськем басня, кылбур, сценка лыдӟемдэс видеое гожтыса келяно.

Пуэн ужан (6-тӥ-11-тӥ классъёс). Пулэсь кыӵе ке арбери лэсьтэмдэс возьматӥсь видео келяно, бордаз пулэсь вӧлэм туспуктэмъёссэс ватсано.

Информационной технологиос (8-тӥ-11-тӥ классъёс). Удмурт кылын компьютерной шудон яке мобильной приложение малпано, со сярысь гожтоно.

Со сяна, таӵе логической задачаосты быдэстоно:
1. 4 курег 4 нунал куспын пуза 4 курегпуз. Кӧня курегпуз пузалоз 8 сыӵе ик курег 8 нунал куспын?
2. Турист ортчиз 1 иськем лымшор пала, собере 1 иськем шундыпуксён пала, бӧрысь 1 иськем — уйпала но вуиз сюрес вылэ потон интыяз ик. Кӧня сыӵе интыос вань асьме музъеммы вылын?
3. Ӝӧк вылын сылэ эмъюмъёсын 10 банка. 9-аз таблеткаослэн секталазы быдэн 1 грамм, нош огаз — 1,1 грамм. Вань весъёс. Кызьы, одӥг пол гинэ мертаса, секытгес таблеткаосын банкаез шедьтыны луэ? Банкаысь таблеткаосты поттылыны яра.

Дӥськут дизайн (7-тӥ-11-тӥ классъёс). «Дӥськут — утись но ивор вӧлмытӥсь оболочка» темалы 10 эскиз быдэстоно. Адямилэсь аспӧртэмлыксэ возьматӥсь но со вакытэ ик сое кышкытлыклэсь утись дӥськут малпано. Эскизъёсы удмурт шӧм пыртоно.

Со сяна, «Шундыкаре» сюрыны вань мылкыд карисьёс «Удмурт шаер 100 ар ортчыса…» темая удмурт кылын эссе гожтыны кулэ

Ужъёсты 2-тӥ гудырикошконозь udmshundy@mail.ru электрон почтае яке Удмуртиысь Калыкъёслэн эшъяськон юртазы (426063, Ижкар, Орджоникидзе урам, 33а номер юрт, 204-тӥ кабинет) удмурт егитъёслэн «Шунды» огазеяськонзылы шуыса келяно. 

Вожвылъяськонлы йылпумъянъёсты 9-тӥ гудырикошконэ «Шунды» огазеяськонлэн вотэсбамаз но «ВКонтакте» мерлыко вотэсысь «Шундыкар-2020» но «УМОО "Шунды"» огинъёсаз поттозы, со сяна, соосты удмурт элькун газетъёсын печатлалозы.

Куронъёсын пыр-почгес тодматскыны чӧлсконпусъя луэ.

Тодэ вайытом, Башкириын «Усточикар» лагерь туэ уз луы



Наверх
Вниз