Ижкар+19 °C
7 -тӥ пӧсьтолэзь 2020 Пуксён
16+

Сюресъёсты но инфраструктураез лэсьтон ласянь вуоно арын бадӟым саклык Дэри ёрослы висъялозы

  • 45
  • 0
Дэри / Удмуртия
Сюресъёсты но инфраструктураез лэсьтон ласянь вуоно арын бадӟым саклык Дэри ёрослы висъялозы
Туспуктэм: Удмуртиысь тӧролэн но кивалтэтлэн пресс-службазы

Сюресъёсты но инфраструктураез лэсьтон ласянь 2021-тӥ арын бадӟым саклык Дэри ёрослы висъялозы. Со сярысь элькунлэн тӧроез Александр Бречалов 30-тӥ инвожое ёросэ вуылыкуз вераз, ивортэ улосвыл тӧролэн но кивалтэтлэн пресс-службазы.

Дэри ёрос – со милям висёнмы. Аръёсын музъем кесэгъёс вандылӥзы, коттеджъёс пуктӥськизы. Калыклы инфраструктура, сюресъёс лэсьтыны оскытӥзы. Чагыр эстӥськон, ву поттон но мукетыз сярысь уг ни вераськы. Валамон, адямиослэн лекъяськонзы люкаське
Александр Бречалов, Удмуртилэн тӧроез

Солэн верамезъя, югдурез воштон понна ёрослэн кылем ар пумын быръем тӧроеныз, командаен ар пала ужало ини. Нырысь ик вераськон сюресъёс сярысь.

Татын тужгес урод сюресъёс. Соин ик милям 2021-тӥ арын оглом 200 миллион манетлэсь трослы сюресъёсты тупатъянъя чакланъёсмы вань. Кызьы ми 2018-тӥ арын Глазкарын спецоперация лэсьтӥм, кызьы 2020-тӥ арын Воткаын трос коньдон кутӥськом, озьы вуоно арын Дэри ёрослы саклык висъяськоз. Сюресъёсты, тротуаръёсты, югдытонэз, выжон интыосты тупатыны кулэ
Александр Бречалов, Удмуртилэн тӧроез

Дэри ёрослэн тӧроез Константин Русинов верамъя, вань сюресъёсты эскеризы. Тупатъян ужъёсын лыдметлэн кутсконаз сюресъёс, кудъёсызъя тужгес трос ӝожтӥськонъёс вуизы но кытӥ тужгес трос транспорт ветлэ.

Таяз арын Дэриын Октябрьской ульчаын выль сюрес но тротуаръёс лэсьтэмын – 1,7 иськем 12 миллион манет тыр. Собере ми Прудовой ульчаез лэсьтӥськомы – 1,1 иськем 9 миллион 500 сюрс манет тыр. Азьвыл аръёсы со палан ик Чкалов нимо ульча но Садовой ульчалэн люкетэз лэсьтэмын вал. Озьыен, таяз арын тупатъян ужъёсты ортчытэм бере, черкогуртамы улӥсьёс понна шӧдскымон пайдалык луоз
Константин Русинов, Дэри ёрослэн тӧроез

Удмуртилэн тӧроез озьы ик пусйиз, вуоно арын сюресъёсты тупатъян улсын, со пӧлын «Кышкыттэм но ӟечлыко автомобиль сюресъёс» йӧскалык ӵектосъя, ёрослэн пӧртэм интыосызлы саклык висъялозы.

Ёрос кивалтӥсьёсын но министръёсын кенешон дыръя Александр Бречалов 2022-тӥ арлы ужанрадлыкез выльысь учкыны но ужъёсты 2021-тӥ арын быдэстыны луонлыкъёс шедьтыны куриз.  

Тодэ вайытом, 2021-тӥ арын Дэри ёросын «Кышкыттэм но ӟечлыко автомобиль сюресъёс» йӧскалык ӵектос улсын 27 иськемлэсь трос сюресъёсты тупатъяны чакламын вал. 



Наверх
Вниз