Ижкар+20 °C
9 -тӥ гудырикошкон 2020 Воскресенье
16+

Удмурт кылын выль ӝӧквыл шудон лэсьтӥзы Удмуртиын

  • 88
  • 0
Ижкар / Удмуртия
Удмурт кылын выль ӝӧквыл шудон лэсьтӥзы Удмуртиын
Туспуктэм: vk.com (Chukinder)

Удмуртиын удмурт кылын ӝӧквыл шудонъёсты кылдытӥсь Chukinder (чукиндэр) огин выль шудон кылдытӥз – «Удмурт эрудит». Солэн пуштросэз, аспӧртэмлыкез но кулэлыкез сярысь ивортодэтъя «Удмуртия» агентстволы огазеяськонлэн ёзчиез, шудонэз огез кылдытӥсь Лукерья Шихова вераз.

Та туж ӟеч шудон удмурт кылэз волятыны, тодэ вайыны, кыӵе кылъёс вообще удмурт кылын вань, тросэз вераськонысьтымы вунэмын ни ке но. Угось валтӥсез татын - со вормон. Нош вормемед потэ ке, йырад куке но туж кемалась пичи дыръяд мамаеныд огпол ке но верам кылъёс но лыкто вылэм! Сэре малпаса пукиськод: сыӵе кыл вань-а, ӧвӧл-а, яке мон сое ачим али малпай?
Лукерья Шихова, «Удмурт эрудит» ӝӧквыл шудонэз огез кылдытӥсь

Озьы шудон дыръя тодэ ваем кыл йырысь кема уз поты ни, шуэ Лукерья Шихова. Нош эшшо татын бадӟым инты басьтэ кылъёсты шонер гожтон, кылсярысь, шудонэз эскерисьёслэн «йӧны» яке «ены» гожтон пумысен юанъёссы кылдӥзы. Сыӵе дыръя адямиос вотэсысь утчаськыны кутско, кыллюкамзы вань ке, отын бугыръясько.

Удмурт кылъёслэсь гожъяськемзэс ӵемысь асьмеос ум тодӥське яке сураськом. Соин малпасько, та шудон удмурт кылэз дышетыны кутскемъёслы но туж ӟеч материал. Но тани ми асьмеос кылмес умой тодыса но, та шудон бере туж зол йырмес ужатыса потӥськом. <…> Тестировщикъёсмы шуо, та шудон борды удмурт кыллюкам кузьмано. Малпасько, со туж ӟеч ӵектон. Котьку но эскерем потэ, вань-а сыӵе кыл, нош кызьы со гожтӥське
Лукерья Шихова, «Удмурт эрудит» ӝӧквыл шудонэз огез кылдытӥсь

«Удмурт эрудит» - кроссворд выллем шудон, но юанъёстэк. Шудӥсьёс азьын пул, отын одӥг кузь кыл. Котькуд шудӥсьлэн кияз быдэн тямыс фишка (буква), кудъёсызлэсь со пул вылысь кыл борды итыса, выль кыл пӧрмытыны кулэ. Озьы огез бӧрсьы мукетыз. Кылъёс понна шудӥсь баллъёс басьтэ. Кинлэн тросгес люкаське, со ик ворме.

Тазьы учконо ке, туж капчи кадь, но зэмзэ ке, куддыр йыр пуштыны дась, малы ке шуоно вакчи кылъёс гинэ йыре лыкто: лы, пу, ву кадь. Но соосын трос балл уд люка. Кузьгес ке кылъёсыд, соку шудон ӟечгес мынэ. Ӝыны гужем та шудонэз ми эшъёсынымы эскерыса улӥськом ни. Со куспын кӧня ке воштӥськонъёс но пыртыны вуимы. Кылсярысь, ӟуч «Эрудитын» быдэн 7 фишкаен шудо ке, удмурт кыллы со ӧжыт, соин ик ми 8 фишкаен шудӥськом
Лукерья Шихова, «Удмурт эрудит» ӝӧквыл шудонэз огез кылдытӥсь

Ижкарысь «Кванториум» нылпи технопарк куремъя, выль шудонэз кылдытон борды Chukinder огин куартолэзе басьтӥськиз. Малпало вал, туж ӝог лэсьтозы шуыса, но озьы вылымтэ.

Нырысь ик ми Гриша Григорьевен (программист – ред.) ужам, курим сое удмурт кыллюкамысь букваослэсь кутӥськемзэс лыдъяны. Тани шуом, согласнойёс пӧлысь Н, К, Т букваос, пе, тужгес но трос кутӥсько, соин ик соос милям шудонамы быдэн куать фишка, нош тани удмурт Ӝ, Ӧ, Ӵ, Ӥ, Ӟ букваосмы асьмелэн ӧжыт кутӥсько, соин ик кин ке соосын быгатэ ке кыл малпаны-бичаны шудон доска вылэ, солы 15 балл сётӥське
Лукерья Шихова, «Удмурт эрудит» ӝӧквыл шудонэз огез кылдытӥсь

Лукерья Шиховалэн верамезъя, «Удмурт эрудит» шудонэз гудырикошконысен вань мылкыд карисьёс басьтыны быгатозы ни.

Тодэ вайытом, Chukinder огин та дырлы куинь шудон поттӥз ни: «Вожодыр», «Ӟеч Перепеч» но кык пумо «Тодад возь». Нялтас вераса, таяз толалтэ Ижкарын «Вожодыр» ӝӧквыл шудонъя турнир ортчиз, йылпумъян люкетсэ вожояськон вакытлы тупатӥзы



Наверх
Вниз