Ижкар+20 °C
9 -тӥ гудырикошкон 2020 Воскресенье
16+

Одӥг сюрслэсь трос быдэ вуымтэосты гужемлы уже интыязы Удмуртиын

  • 57
  • 0
Ижкар / Россия
Одӥг сюрслэсь трос быдэ вуымтэосты гужемлы уже интыязы Удмуртиын
Туспуктэм: Григорий Фомин

Ар кутсконысен Удмуртиысь калыкез уже интыянъя центръёсы 1 сюрс 200-лэсь быдэ вуымтэос вазиськизы. Соос пӧлысь 1 сюрслэсь тросэзлы тупась вакансиос шедьтӥзы ни, мукетъёсыныз ӧнерчиос ужало на. Со сярысь улосвыл тӧролэн но кивалтэтлэн пресс-службазы ивортэ.

2020-тӥ арысен быдэ вуымтэосты нимысьтыз дышетскемез но быгатонлыкъёсты кулэ кариськем ужан интыосы гинэ кутыны яра, кылсярысь, подсобной ужась, сяська мерттӥсь но утялтӥсь, почтальон, курьер но мукет со выллем.

Тазалыклы но сӥбурлыко (нравственной) азинсконлы изъян вайыны быгатӥсь ужъёсы пиналъёсты басьтыны уг яра. Сыӵе ужъёс пӧлын шудон бизнес, уй клубын ужан, кудӟытӥсь юонъёсты, тамакез поттон, нуон-ваён но вузан но мукет.

16 ареслэсь бадӟым быдэ вуымтэос ужъя тупанкылэз ас кожазы юнматыны быгато. Капчи ужъёсты быдэсъяны тупанкылэз 14-16 аресъем пиналъёсын но гожтыны луэ, но соку солэн анаез яке атаез но опекая ёзэсъёс солы лэзён гожтыны кулэ.

Со дыре ик быдэ вуымтэосты уже кутӥсьёс ужан дыр сярысь тодыны кулэ: 16 аресозь пиналъёс арняяз 24 часозь гинэ ужаны быгато, 16-18 аресъемъёс – 35 часозь. Дышетскон дыръязы ужась быдэ вуымтэослэн ужан дырзы кык поллы кулэсме.

Нуналаз ужан дыр сярысь верано ке, со троссэ таӵе луыны быгатэ: 15-15 аресъемъёслэн – 4 час, 15-16 аресъемъёслэн – 5 час, 16-18 аресъемъёслэн – 7 час. Дышетскон вакытэ ужан смена 14-16 аресъемъёс понна 2,5 часозь кулэсме, 16-18 аресъемъёс понна – 4 часозь

Быдэ вуымтэ мурт ужамез понна толэзьлы юнматэм тужгес пичи уждунлэсь ӧжыт коньдон басьтыны уг быгаты, ужан дырзэ лыдэ басьтыса. 2020-тӥ арын Удмуртиын со 14 сюрс манет пала.

Ватсалом, ужаны мылкыд карись быдэ вуымтэос уж утчаса асьсэ арысьтызы яке ёросысьтызы калыкез уже интыянъя центре, Удмуртиысь егитъёсын ужанъя центре яке администрациосысь егитъёсын ужанъя ёзэтъёсы вазиськыны быгато. Озьы ик вакансиосты Удмуртиысь калыкез уже интыянъя кун ёзэслэн порталэз пыр шедьтыны луэ. 



Наверх
Вниз