Ижкар+20 °C
9 -тӥ гудырикошкон 2020 Воскресенье
16+

Куарусёнэ Можгаын блогерлэн «Яркыт» школаез усьтӥськоз

  • 89
  • 0
Можга / Удмуртия
Куарусёнэ Можгаын блогерлэн «Яркыт» школаез усьтӥськоз
Туспуктэм: vk.com (Лиза Кибардина)

2020-тӥ арын куарусёнэ Можгаын блогеръёслэн школазы ужаны кутскоз. «Школа блогера «Яркыт» ӵектосэз гожтӥз но кичӧлтонъёсъя «Атмосфера» элькун проектлэсь 300 сюрс манет грант утӥз карысь 3 номеро школаын 10-тӥ классын дышетскись (табере 11-тӥ классэ выжиз ни) Елизавета Кибардина. Ивортодэтъя «Удмуртия» агентстволы нылаш вераз, малы солэн сыӵе ӵектос гожтыны мылкыдэз кылдӥз но марлы дышетозы школаын.

Дышетскон ар кутсконын мон эскерон уж ортчытӥ: тунсыко-а карысьтымы но ёросысьтымы егитъёслы удмурт лулчеберет, пырисько-а соос отчы. Валай, ужпум туж лэчыт сылэ шуыса – удмурт кыл улонысьтымы быре
Елизавета Кибардина, ӵектосэз кылдытӥсь

Блогеръёслэн школаязы Можга карысь но Можга ёросысь удмурт кылэз тодӥсь яке валась 14-25 аресъем егитъёсты возьмало. Соосты видео лэсьтыны, мерлыко вотэсын ужаны но медиа ӧрен герӟаськем мукет быгатонлыкъёслы дышетозы. Куинь толэзь ӵоже 150 адямилы тодон-валан сётыны малпало. Елизавета Кибардина соос пыр удмурт кылэз, лулчеберетэз вӧлмытыны оске. Школае куриськонъёсты матысь дыре кутыны кутскозы.

Егитъёсын Ижкарысь ӧнерчиос ужалозы, соосын вераськемын ни, пусйиз ӵектосэз кылдытӥсь. Утэм грантэн озьы ик кулэ техника, арбериос, кузьымъёс басьтозы.

Ми «100 по 100» вожвылъяськон ортчытом – элькунлэн кунлыкезлы 100 ар тырмонлы сӥзем 100 секундъем 100 ролик лэсьтом. Устооссэ роликъёсты кузьымъёсын пусъём
Елизавета Кибардина, ӵектосэз кылдытӥсь

«Яркыт» школаын дышетскисьёслэсь ӟуч но удмурт кылын быдэстэм ужъёссэс мерлыко вотэсъёсысь адӟыны луоз.

Елизавета Кибардиналэн верамезъя, али со удмурт кылын уг ке но вераськы, калык лулчеберет солы туж тунсыко потэ. Азьланяз но удмуртлыкез утёнэн герӟаськем ӵектосъёс гожъяны малпа. 

Тодэ вайытом, гудырикошкон пумысен Удмуртиын 7-11 классъёсын дышетскисьёс понна Ӵектосъёс кылдытонъя школа ортчоз.  



Наверх
Вниз