Ижкар+20 °C
9 -тӥ гудырикошкон 2020 Воскресенье
16+

«Выль» элькун шулдыръяськон Удмуртиын туэ уз луы

  • 78
  • 0
Ижкар / Удмуртия
«Выль» элькун шулдыръяськон Удмуртиын туэ уз луы
Туспуктэм: Руслан Нуриахметов

Вавож ёросын Гербер элькун праздник интые ортчытыны чаклам «Выль» шулдыръяськон туэ озьы ик уз луы. Ужрад Удмуртилэн кунлыкезлы 100 ар тырмонэз пусъёнлэн бадӟым люкетэз луыны кулэ вал, но радъясьёс санитар эмчиослэсь вань куронъёссэс быдэстыны уз быгатэ. Со сярысь улосвылысь йӧскалык политикая министр Лариса Буранова вераз, ивортэ удысэтлэн пресс-службаез.

Жаляса верано, таяз арын бадӟым элькун праздник уз луы. Радъясьёс Роспотребнадзорлэсь ужрадъёсты ортчытонъя вань куронъёссэ быдэстыны уз быгатэ, озьыен, ми калыкез кышкытлыклэсь утён пумысен гарантия сётыны уг быгатэ. Адямилэн улонэз но тазалыкез – валтӥсь дунлык. Озьы ке но, интыосын шулдыръяськонъёс луыны быгато. «Выль» йылолъёсысь но адямиослэн улонысьтызы уг кошкы. Та пумкылъян соглаштэмын. Со «Удмурт Кенеш» огазеяськонэн, Вавож ёрослэн адмнистрациеныз валче кутэмын
Лариса Буранова, Удмуртиысь йӧскалык политикая министр

Озьы ик со 2021-тӥ арын Гербер элькун шулдыръяськонэз Вавож ёросын ик ортчытозы шуыса ватсаз.

30-тӥ пӧсьтолэзьысен элькунын физкультурая, спортъя, егитъёс понна бадӟым ужрадъёсты ортчытъяны лэзизы ни. Но вань сюбегатонъёсты палэнтон сярысь вераськыны вазь на. Соин ик Удмуртилэн кунлыкезлы 100 ар тырмонэз пусъён ужрадъёсты кык амалэн дасяло – онлайн но оффлайн.

Котырес дырпус паськыт пусйиськоз 3-4 шуркынмонэ. Солэсь концепцизэ дасяло озьы, праздник учкисьёстэк но ортчыны быгатоз шуыса. Ужрадэз ӝог гинэ оффлайн яке онлайн амалэ выжтыны мед луоз.

Озьы ик Удмуртилэн кунлыкезлы 100 ар тырмон улсын Россиысь калыкъёслэн конгрессы ортчоз. Эпидемиологи югдур умой луиз ке, отчы кунысьтымы улосвылъёсысь куноос пыриськозы. Но озьы ик сое онлайн амалэн но радъяны быгатозы, соку эшшо тросгес пыриськисьёс но экспертъёс ватсаськыны быгатозы. Конгресс куарусён пумын ортчоз.

Тодэ вайытом, Гербер шулдыръяськон 20-тӥ инвожое Вавож ёросын ортчыны кулэ вал. Коронавирус инфекци вӧлмонэн сэрен ужрадэз гудырикошконлы выжтыны но «Выль» праздникез сямен радъяны пумкылъян кутӥзы вал. 



Наверх
Вниз