Ижкар+17 °C
26 -тӥ куарусён 2020 Кӧснунал
18+

Удмурт веросъёсты аудиоформатэн поттыны кутскизы Удмуртиын

  • 91
  • 0
Ижкар / Удмуртия
Удмурт веросъёсты аудиоформатэн поттыны кутскизы Удмуртиын
Туспуктэм: vk.com (Ӟабыльна)

Удмуртиын удмурт кылын веросъёсты аудиоформатэн гожтыны кутскизы. Со борды «Ӟабыльна» ӵектос басьтӥськиз. Со сярысь ивортодэтъя «Удмуртия» агентстволэн корреспондентэзлы ӵектосэз лэсьтӥсь Полина Куликова вераз.

Та дыре ӵектосэ пыриськисьёс усьтэм источникъёсысь, ӵемысь егит писательёслэсь, веросъёссэс лыдӟо. Кызьы вера Полина Куликова, соос тодмо авторъёслэн бадӟымгес произведениоссы борды но шумпотыса басьтӥськысалзы, но со понна авторской эрикрадъёсты радъяны кулэ.

Удмурт кылын гожтэм веросъёс туж трос! Но, жаляса верано, ваньзэ соосты лыдӟыны уг луы. Пӧртэм мугъёсъя. Кылсярысь, вань сыӵе арбери, кудӥз нимаське авторской право. Соин ик ми утчаськом гожъясьёсты, кудъёсыз дась ужъёссэс сётыны. <…> Книгаос трос, милям но мылкыдмы бадӟым! Малпасько, азьланяз льӧль малпанмы быдэсмоз но школа программаысь произведениосты но аудиоформатэн кылзыны луоз
Полина Куликова, «Ӟабыльна» ӵектосэз кылдытӥсь

Туннэ нуналлы ньыль произведениосты лыдӟыса гожтӥзы ини. Полина Куликовалэн кылъёсызъя, кылзӥсьёссы сокем трос ӧвӧл на, но ужъёссэс вить-куать пол ке но кылзо ке, соос понна со бадӟым шумпотон луэ ини, озьыен ужзэс сюлэмзэс поныса юнме уг быдэсто.

Верало, со туж тунсыко, туж кулэ вал шуыса. Оскисько, азьланяз милям кылзӥсьёсмы тросгес луозы. Малы ке шуоно со ук кыӵе ке но кырӟан, подкаст кадь ик, но тон тодматӥськиськод удмурт произведениосын. Со туж умой ук!
Полина Куликова, «Ӟабыльна» ӵектосэз кылдытӥсь

Ӵектосэз кылдытӥсьлы таӵе малпан школаын дышетскыкуз лыктӥз вал ини. Котькуд ар со йырзэ тӥялляз, кызьы дышетсконлы трос дыр быдтытэк витьёс октыны. Туала вакытэ ваньмыз вань интернетын, ӟуч литературая произведениосты аудиоформатэн кылзыны луэ. Нош удмурт литературая сыӵе луонлык ӧй вал. Озьы удмурт аудиоверосъёс поттонъя «Ӟабыльна» завод кылдӥз, шуэ Полина Куликова. Малы завод?

Завод - со сыӵе инты, кытын ваньмыз герӟаськемын.Одӥгез цех ӧз ке ужа, мукетыз но дугдоз. Милям но озьы ик, гожъясьёс ӧз ке луэ - уз луы мае лыдӟыны, мае лыдӟыны ӧз ке луы - уз луэ кылзӥсьёс но лыдӟисьёс. Соин ик, та сӧзнэтын котькудӥз валтӥсь
Полина Куликова, «Ӟабыльна» ӵектосэз кылдытӥсь

Ӵектослэн ас логотипез но вань ини. Сое суредась Николай Пронев малпаз. Суред вылын наушникъёсын арлыдо пиосмурт суредамын.

Нырысь кема малпаськимы, мар луоз суредын. Келямы солы примеръёс. Соку ик пӧрмытӥз. Малпасько, табере «Ӟабыльна» мӧйы песятаен ассоциироваться кариськоз, кудӥз улоназ троссэ адӟиз ини. Но адӟиськомы со наушникен шуыса, нош наушник - со туала маке. Озьыен, со - песятай, кудӥз туала улонлэсь бере уг кыльы, но со вакытэ ик котьку дась визьмо дэмланзэ сётыны. Асьме литературной произведениосмы кадь ик
Полина Куликова, «Ӟабыльна» ӵектосэз кылдытӥсь

Пусъём, веросъёсты лыдӟонэ вань мылкыд карисьёс пыриськыны быгато. Со понна ӵектосэз кылдытӥсьёслы вазиськоно но мылкыдды сярысь верано. Нош куараен гожтэм удмурт веросъёсын чӧлсконпусъя тодматскыны луэ. 

Тодэ вайытом, Ижкарысь 82 номеро нылпи садын удмурт улон-вылонлы сӥзем музей усьтӥзы



Наверх
Вниз