Ижкар-1 °C
22 -тӥ коньывуон 2020 Покчиарня
18+

«Удмуртия» книгапоттоннилэн книгаосыз Рязаньын ортчем улосвылкуспо фестивальын данъетъёс басьтӥзы

  • 103
  • 0
Рязань / Россия
«Удмуртия» книгапоттоннилэн книгаосыз Рязаньын ортчем улосвылкуспо фестивальын данъетъёс басьтӥзы
Туспуктэм: Юрий Кузнецов

«Удмуртия» издательстволэн «Удмуртская народная кухня» но «Секреты удмуртских мастеров» книгаосыз йӧскалык книгая «Читающий мир» улосвылкуспо фестивальын дипломъёс басьтӥзы. Ужрад 16-19 куарусёнэ Рязаньысь Горький нимо лыдӟетъюртын ортчиз. Со сярысь ивортодэтъя «Удмуртия» агентстволэн корреспондентэзлы «Удмуртия» книгапоттоннилэн кивалтӥсез Юрий Кузнецов вераз.

Книгаосты фестиваль улсын ортчем но Сергей Есенинлы вордӥськем дырысеныз 125 ар тырмонлы сӥзем «Книга года» вожвылъяськонлэн данъетъёсыныз пусйизы. Отчы туэ Россиысь 28 улосвылъёсысь 70 издательствоослэн 186 книгаоссы пыриськизы.

Тужгес бадӟым данъет «Удмуртская народная кухня» книгамы басьтӥз. Солы нимысьтыз диплом, нимысьтыз статуэтка сётӥзы. Со милям «Лучше издание, вносящее вклад в диалог культур» номинациын вормиз. Со сяна, «Лучшая книга о России» номинациын диплом «Секреты удмуртских мастеров» книгамы басьтӥз
Юрий Кузнецов, «Удмуртия» книгапоттоннилэн кивалтӥсез

Пусъём, фестиваль туэ 25-тӥзэ ортчиз. Отчы Россиысь 31 улосвылъёсысь но мукет укмыс кунъёсысь 80 издательствоос люкаськылӥзы.

Юрий Кузнецовлэн кылъёсызъя, та фестивале соос кылем арын но вуылӥзы вал ини. Соку ас номинациосазы вормисьёс пӧлы «Мифы, легенды и сказки удмуртского народа» но «Удмурты. Тайна тамги» книгаоссы пыризы. Радъясьёс соосты синйылтӥзы но туэ ужрадэ дано куноос чотын пыриськыны ӧтизы. Со сяна, издательствоен тодматыны нимысьтыз дыр сётӥзы. Презентация фестивалез сӥё-дано усьтон ужрад бӧрсьы ик ортчиз.

Калыкез ведь али книга сярысь вераськонэн гинэ уд басьты. Соин ик ми отчы нимысьтыз «Айкай» театрысь кутэм удмурт нылкышно костюмез нуим, «Лудорвайысь» жигыляк музейной азвесь чыртывесь. <…> Собере ми Менсадык Гариповлэсь ӵапак «Мифы, легенды и сказки удмуртского народа» книгае кутэм куинь суредъёсызлэсь оригиналъёссэ нуим на. Со сяна, кылем арын «Удмурты. Тайна Тамги» но данъет басьтӥз вал бере, дизайнеренымы со книгалы лэсьтэм пуссэ нуллӥм. Со пу вылын ас киыныз вӧлэм аслаз выжыезлэн пусэз. Соосты но возьматӥмы но, туж тунсыкъяськизы
Юрий Кузнецов, «Удмуртия» книгапоттоннилэн кивалтӥсез

Менсадык Гариповлэн уженыз тодматон
Менсадык Гариповлэн уженыз тодматон Фото: Юрий Кузнецов ©

Фестивале вуылэм сяна, «Удмуртия» книгапоттонниысь ӧнерчиос Сергей Есенинлэн вордӥськем юртаз, Рязань улосвылысь Константиново черкогуртысь музеяз, вуылӥзы. Музей-юртын ужасьёслы Сергей Есенинлэн быръем произведениосыныз удмурт-ӟуч книга кузьмазы.

Сергей Есенинлэн вордӥськем юртэз дорын
Сергей Есенинлэн вордӥськем юртэз дорын Фото: Юрий Кузнецов ©

Тодэ вайытом, кемалась ик ӧвӧл, книгапоттоннилэн ужъёсыз улосвыл но шаертодонъя литературая «Малая Родина - 2020» огъяросси вожвылъяськонысь дипломъёсын бертӥзы.



Наверх
Вниз