Ижкар-1 °C
22 -тӥ коньывуон 2020 Покчиарня
18+

Нылпиослы удмурт кылъя 3D кыллюкам поттӥзы Сарапулын

  • 123
  • 0
Сарапул / Удмуртия
Нылпиослы удмурт кылъя 3D кыллюкам поттӥзы Сарапулын
Туспуктэм: vk.com (Юлия Седова)

Сарапулын нылпи садэ ветлӥсь но покчи классъёсын дышетскись пиналъёс понна удмурт кылъя ватсам дуннеен (дополненная реальность) «3D ДОРКЫЛ» кыллюкам поттӥзы. Со сярысь Ижкарысь Калыкъёслэн эшъяськон юртсылэн пресс-службаез ивортӥз.

Аспӧртэм кыллюкаме адями, инкуазь, лыдпусъёс, сиён-юонъёс, улонын кутӥськись тӥрлыкъёс, будосъёс, пӧйшуръёс темаосъя 80 карточкаос пырӥзы. Соосты смартфонъёслы юромо малпам ватсам дуннеен приложение пыр «лулъяны» луэ: телефонлэсь камеразэ суред вылэ карыку, экранын анимированной суред потэ, со сяна котькуд кылэз кылзыны луэ. Программа Android операционной системаен телефонъёсын ужа.

Ӵектосэз Сарапулысь «Электрон» лулчеберет юртысь - Йӧскалык лулчеберетъёсты улӟытонъя но азинтонъя центрысь Йӧскалык лулчеберет бордын ужанъя ёзэтэн кивалтӥсь Юлия Седова малпаз. Солэн кылъёсызъя, ӵектослэн ужпумез удмурт кылэз утён понна выль дышетон амал кылдытон. Тунсыко мед луоз шуыса, автор малпанзэ ватсам дуннеен лэсьтыны кариськиз. Приложениез Сарапулысь егитъёслэн йӧскалык но лулчеберет огазеяськонъёссылы юрттонъя «Содружество» мер огазеяськон кылдытӥз.

Озьы ик 3D кыллюкамез лэсьтон уже «Удмурт Кенеш» огазеяськонлэн Сарапулысь ёзэтэзлэн кивалтӥсез Раиса Трофимова пыриськиз. Со карточкаослы кылъёс бырйиз но соослы куаразэ «кузьмаз».

Шудонэз 250 экземплярен поттӥзы. Сое дунтэк люкылозы. Кыллюкамез «лулъясь» «3D ДОРКЫЛ» приложениен смартфонъёсы чӧлсконпусъя пуктыны луэ. 

Тодэ вайытом, Удмуртиын навигаторез удмурт кылэ берыктӥзы.



Наверх
Вниз