Ижкар+2 °C
28 -тӥ коньывуон 2021 Покчиарня
18+

Удмуртиысь укмыс сиён-юонъёс «Вкусы России» нырысетӥ йӧскалык вожвылъяськонэ пырисько

  • 166
  • 0
Ижкар / Удмуртия
Удмуртиысь укмыс сиён-юонъёс «Вкусы России» нырысетӥ йӧскалык вожвылъяськонэ пырисько
Туспуктэм: Григорий Фомин

Удмуртиысь укмыс сиён-юон поттӥсь брендъёс «Вкусы России» нырысетӥ йӧскалык вожвылъяськонэ пырисько. Со сярысь элькун тӧролэн но кивалтэтлэн пресс-службазы ивортӥз.

Вожвылъяськонэ коньывуонэ кутскиз, таяз арняе куриськонъёсты басьтэмысь дугдӥзы. Отчы Россиысь 79 улосвылъёсысь 500-лэсь трос сиён-юон брендъёс пыриськыны мылкыд каризы

Удмуртиысь конкурсэ 13 куриськонъёс келямын вал, укмысэз соос пӧлысь вожвылъяськонэ сюризы. Со ӵынатэм дуно чорыг, сыр, пельнянь, пастила, бакчи сиёнъёслэсь чипсы, минерал ву поттӥсьёс, перепеч пыжисьёс, чечы кыскисьёс. Соос «Попробуй, полюбишь», «Из нашей деревни» но «На всю страну» номинациосын нюръяськозы. 

Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр Ольга Абрамова агропром огъетмы конкурсын ассэ умой возьматоз но умой опыт басьтоз, кунмылэн пӧртэм сэрегъёсысьтыз басьтӥсьёссэ шедьтоз шуыса осконзэ вераз.

Удмурт перепеч асьмелэн дано сиёнмы луэ, йӧскалык кухнямылэн данъяськонэз. Сотэк элькунамы одӥг шулдыръяськон но, куно пумитан но уг ортчы. Но ми оскиськом, конкурслы луыса фермеръёсынымы поттӥськись мукет сиён-юонъёс но тодмо луозы но калыке вӧлмозы. Соос вузкаронзэс паськытатыны но кунпуш туризмез азинтыны юрттыны быгатозы. Элькунмылэсь данзэ утись котькуд сиён-юон бренд кулэезъя дунъяны но конкурслэн финалаз сюрыны ярамон – асьмелы вань мае возьматыны, маин данъяськыны, паймытыны но куноятыны!
Ольга Абрамова, Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр

Вожвылъяськонын вормисьёсты 2020-тӥ арын толсуре шараялозы. Тямыс номинациосъя 500-лэсь трос пыриськисьёс пӧлысь 22 финалистъёс гинэ 1, 2, но 3 степенё дипломъёсын пусъёзы. Со дыре ик «Калыкен куара сётон» номинациын одӥг гинэ вормись луоз. Сое калыклэсь тужгес трос куаразэ люкам сиён-юон басьтоз.

Куара сётон 19-тӥ шуркынмонысен 2-тӥ толсурозь конкурслэн нимлыко сайтаз мыноз

Нош конкурсэ пыриськисьёслэн туспуктэмъёсынызы но видеоматериалъёсынызы али ик тодматскыны луэ ини. Соос «Вкусы России» вожвылъяськонлэн мерлыко вотэсъёсысь бамъёсаз поттэмын: «ВКонтакте»Facebook«Одноклассники» но Instagram.

Конкурслы йылпумъянъёсъя гурт возёсъя федерал министерство Россиысь шӧмъёсъя бадӟым карта кылдытоз но кунамы потӥсь аспӧртэм сиёнъёсты вӧлмытон понна котыр ласянь юрттэт сётонъя программалы кутскон сётоз. Со сяна, вань брендъёс но вормисьёс «Вкусы России» вожвылъяськонлэн нимлыко сайтысьтыз каталоге кылёзы. 



Наверх
Вниз