Ижкар-6 °C
27 -тӥ шуркынмон 2020 Удмуртарня
18+

Удмуртиысь сизьым йӧскалык изданиос «Йӧскалык прессалэн юртэз» ужъюртэ пырозы

  • 91
  • 0
Ижкар / Удмуртия
Удмуртиысь сизьым йӧскалык изданиос «Йӧскалык прессалэн юртэз» ужъюртэ пырозы
Туспуктэм: Алексей Арзамасцев

Удмуртиысь сизьым йӧскалык изданиосты «Йӧскалык прессалэн юртэз» автоном ужъюртлэн бурд улаз пыртозы. Кызьы со ужалоз, мар вылез луоз но мукетыз сярысь ивортодэтъя «Удмуртия» агентстволэн корреспондентэзлы «Йӧскалык прессалэн юртэз» ужъюртэн кивалтӥсь, «Удмурт Дунне» газетлэн валтӥсь редакторез Зинаида Рябинина вераз.

«Йӧскалык прессалэн юртэз» улсын вань йӧскалык изданиос - «Удмурт дунне», «Иднакар», «Ӟечбур!» газетъёс но «Вордскем кыл», «Инвожо», «Кизили», «Кенеш» журналъёслэн редакциоссы - ужалозы.

Зинаида Рябининалэн кылъёсызъя, таӵе ужрад пичи редакциослэсь ужзэс капчигес карон, соосты утён но азинтон понна лэсьтӥське. Али редакциос нимаз ужась ужъюртъёс луо. Котькудаз ог дасо адями гинэ тырше ке но, нимаз кивалтӥсь, нимаз валтӥсь бухгалтер юнматэмын.

Оглом вераса, валтӥсь адямиос туж трос, нош ужмы шуггес мынэ. Соин ик кенешемын ваньзэ огазеяны. Но со уг вера редакциос бырозы шуыса, вань изданиос, вань СМИ-ос, кызьы соос пото вал, озьы ик потозы, озьы ик утемын луозы редакциос, одӥг луоз кивалтон ёзэс гинэ - со «Йӧскалык прессалэн юртэз»
Зинаида Рябинина, «Йӧскалык прессалэн юртэз» ужъюртлэн кивалтӥсез

Валтӥсь редакторъёс но озьы ик кылёзы, но табере соос газет-журналзы понна гинэ кыл кутозы, нош коньдон, административно-хозяйственной ужпумъёс «Йӧскалык прессалэн юртэз» вылэ усёзы.

Выльдонъёслы луыса шыръям коньдонэз йӧскалык прессаез азинтыны кутозы

Огазеям редакциос валче ужрадъёс, ӵектосъёс радъяны, рекламаез чакланы, удмурт кылэз утён бордын ӵошен ужаны быгатозы.

Со сяна, Зинаида Рябининалэн верамезъя, йӧскалык изданиос кемалась дизайнзы, пуштроссы ласянь воштонъёсты кулэ каро. Озьы ик нимлыко сайтъёссы но азинтэмез возьмало. Уго печатласькись изданилы саклык бадӟым висъяське ке, сайтъёслы уггес на.

Мон адӟемъя, кылмес асьмеос кык ӧртӥ азинтыны кулэ. Печатной кылэз но утёно, малы ке шуоно гуртъёсын лыдӟисьёсмы милям интернеттэк пуко ай. Кытын ке со воксё ӧвӧл на, кытын ке вань, но со но дунтэк ӧвӧл. Со дыре ик, туала улонлэсь куронъёссэ лыдэ басьтыса, интернетын но милям кылмы азинскыны кулэ, малы ке шуоно берлань асьмеос ум берытске ни, азьлань гинэ мыном. Туала будӥсь егитъёс, 10-20 ар ортчыса, газет уз но басьтэ ни, дыр, кин тодэ. Соин ик ми котькыӵе югдурын ужаны дась луыны кулэ
Зинаида Рябинина, «Йӧскалык прессалэн юртэз» ужъюртлэн кивалтӥсез

Соин ик азьланяз «Йӧскалык прессалэн юртэзлэн» аслаз нимлыко сайтэз луоз. Отын котькуд газет-журналлэн нимаз люкетэз ужалоз.

Али со кинлэн ке усьтэмын, но уг ужа, кинлэн ке мырдэм шока. Нош азьланяз чакласьком рос-прос огъя сайт (портал) кылдытыны, вань удмурт изданиосты, кема утчаськытэк, одӥг азьысь лыдӟыны мед луоз
Зинаида Рябинина, «Йӧскалык прессалэн юртэз» ужъюртлэн кивалтӥсез

Огазеям редакциослэн ужъя огъя политиказы, коньдон поттон, гожтӥськон, тиражъёсты ӝутон огъя ужпумъёссы луозы

Йӧскалык изданиослэн туннэ нуналлы, ӵошатоно ке ӟучъёсыныз, подписказы тросгес но. Ми лыдъяськом, со госзаданимы гинэ ӧвӧл, со милям миссимы. Малы ке шуоно, куке вераськиськом удмурт кылмес утёно но азинтоно шуыса, кин сое лэсьтыны кулэ, валамон ини, нырысь ик - ми. Со ласянь ми али пичияк конкурентъёс луиськом, огезлы адями гожтӥське ке, мукетызлы уг гожтӥськы ни. Соин ик азьланяз ми конкурентъёс медам луэ, огазеяськыса ваньмыз бордын валче ужаны мед быгатом
Зинаида Рябинина, «Йӧскалык прессалэн юртэз» ужъюртлэн кивалтӥсез

Пусъём, та дыре «Йӧскалык прессалэн юртэз» улсы ёрос газетъёслэсь удмурт ватсэтъёссэс пыртон сярысь вераськон уг мыны.

Со сярысь вераськон вал куке но, но мон лыдъясько, со шонер малпан ӧвӧл, мон солы пумит, малы ке шуоно со шуг. Котькуд ёрослэн аслаз аспӧртэмлыкез, удмуртъёслэн но пӧртэм лыдзы. Но со дыре ик, мон малпасько, удмурт изданиосты, ватсэтъёсты одно ик азинтоно, выльдоно, нош кытын ӧвӧл, кылдытъяно но. Но со понна котькуд муниципалитетлэн но валтӥсь редакторлэн йыръёссы висьыны кулэ
Зинаида Рябинина, «Йӧскалык прессалэн юртэз» ужъюртлэн кивалтӥсез

Нялтас вераса, «Йӧскалык прессалэсь юртсэ» кылдытон сярысь вераськонъёс кемалась мынӥзы ини. Но уж интыысьтыз кылем ар пумын гинэ, печатья но калыке ивортодэт вӧлмытонъя агентствое выль кивалтӥсь лыктэм бере, вырӟиз. Ар ӵоже трос кенешонъёс ортчизы, валтӥсь редакторъёсты трос пол люкаллязы.

2020-тӥ арын куартолэзьысен нырысетӥосыз огазеям редакция чотын «Вордскем кыл» журналлэн но «Удмурт дунне» газетлэн редакциоссы ужаны кутскизы.

«Вордскем кыл» журналлэн валтӥсь редакторез Александр Корепанов выльдӥськонъёс капчиен ӧз сётӥське шуыса пусйиз, уго автоном ужъюрт луэмлэсь куштӥськоно, выль огазеяськонэ выжоно луиз. Соин сюлмаськонъёс йылӥзы: кызьы уж радъяськоз, кызьы ваньмыз луоз. Но, со вакытэ ик, Александр Корепанов умоезлы гинэ осконзэ вераз. Солэн кылъёсызъя, азьланяз, вань изданиос выжизы ке, воштӥськонъёс тросгес луозы, уж радъяськоз.

Али ми нимазгес ик ужаськом ай, ужкагазъёсты гинэ кинюртыны, мар ке ласянь вераськыны, коньдонъя юанъёсты сэрттыны-пертчыны кивалтӥсь доры ветлоно луэ. Нош редакциын ужасьёс, кызьы ужало вал журнал бордын, озьы ик ужало, журналэз кызьы поттӥськом вал, озьы ик поттӥськом, кызьы конкурсъёс ортчытӥськом вал, озьы ик ортчытӥськом, выльёссэ ялӥськом
Александр Корепанов, «Вордскем кыл» журналлэн валтӥсь редакторез

Со дыре ик редакция журналэз азинтон бордын ужа, ужазы выль технологиосты кутыны, дизайнзэс выльдыны тырше.

Котькыӵе воштӥськонъёс малпаськонэ уськыто, юанъёс кылдыто. Но тазьы каризы бере, оскиськом, ваньмыз умой луоз шуыса но, вань СМИ-осын валче гижысь-пиньысь ужаломы, журналъёсмес но эшшо узыргес каромы, валче ӵектосъёс но улонэ, оло, пыртомы. Дыр возьматоз
Александр Корепанов, «Вордскем кыл» журналлэн валтӥсь редакторез

Тодэ вайытом, Удмуртиын Йӧскалык печатьлэн нуналэз кылдыны быгатоз.



Наверх
Вниз