Ижкар+3 °C
24 -тӥ коньывуон 2021 Воскресенье
18+

Удмуртиысь Калык культураез дышетонъя «Артэ» центр удмурт лулчеберетэз утён, азинтон, вӧлмытон ӧрысь кичӧлтонъёсты гожъян-чотанлы кутскон сётӥз. Ужрадэз «Дор» нимазы. Со сярысь элькунысь йӧскалык политикая министерстволэн пресс-службаез ивортӥз.

Аспӧртэм гожъян-чотанэ удмурт кылъя дышетӥсьёс, визьнодасьёс, дышетскисьёс но 35 аресозь егитъёс, лулчеберет, ивортодэт вӧлмытон удысын ужасьёс, мер огазеяськонъёс.

Ужрадлы йылпумъянъёсъя азинлыко но кулэлыко ӵектосъёсын карта кылдытозы. Сое вань мылкыд карисьёс учкыны, тунсыко ӵектосъёсты ас ужазы кутыны быгатозы.

Кичӧлтонъёсты 15-тӥ шуркынмонозь люкалозы. Ӵектос сярысь верано понна чӧлсконпусъя формаез гожтыны кулэ.

Проект Удмуртиысь йӧскалык политикая министерство юрттэмез быдэстӥське.

Тодэ вайытом, удмуртлыкез улонлэн туала куронъёсызъя азинтон понна Удмуртиын «АРТЭ» мерлыко огазеяськон кылдытӥзы.

Нялтас вераса, 15-тӥ коньывуонысен 14-тӥ шуркынмонозь Россиын калыкез гожъян-чотан мынэ. Отчы кунын вань улӥсьёс пыриськыны кулэ. Юанъёслы валэктонъёс Госусулги портал пыр ас коже сётыны луэ яке переписчикез дорын возьманы. 

Удмуртиысь вылӥ дышетсконниосысь 20 студентъёс Кун Кенешлэсь нимъям премиоссэ басьтозы. Сыӵе пумкылъян арлы быдэ висъяськись коньдонкузьымез сётонъя вожвылъяськон ӧрилэн кенешоназ кутӥзы, со улосвыл парламентысь тодосъя, дышетонъя, лулчеберетъя, туризмъя но йӧскалык политикая ялан ужась ӧрилэн тӧроез Татьяна Ишматова кивалтэм улсын ортчиз, ивортӥз элькунысь дышетонъя но тодосъя министерстволэн пресс-службаез.

Ӧрилэн ёзчиосыз дышетсконниосын ӵектэм муртъёслэсь дышетсконын азинсконъёссэс, мер улонэ, тодос но творчество уже, вузлэн ужрадъёсаз, элькун, улосвылкуспо, огъяросси но калыккуспо вожвылъяськонъёсы, конференциосы, фестивальёсы пыриськемзэс чаклазы.

Быръем 20 егитъёс пӧлын усто дышетскисьёс, наукаын ужасьёс, эм, гурт возёс, дыкужым, экологи удысъёсын изобретениос но инновациос кылдытӥсьёс, утчаськон ужен вырисьёс, усто кырӟасьёс но эктӥсьёс, туризм но шаертодон удысын ӵектосъёслы кичӧлтон сётӥсьёс, творчествоя но дышетонъя ужрадъёс радъясьёс.

Ӵектэм кандидатъёс асьсэды кылкутӥсь но пуктэм ужпумез быдэстыны тыршись студентъёсын возьматӥзы. Вузъёсысь студентъёслэн аскивалтон ёзъёсазы мыло-кыдо ужало, тодос но эскерон ужен выро, спортъя но лулчеберетъя ужрадъёсы пырисько. Студентъёслэн коллективъёсазы соосты гажало но кылзӥсько. Соос адӟем карымон егитъёс
Татьяна Ишматова, Кун Кенешысь тодосъя, дышетонъя, лулчеберетъя, туризмъя но йӧскалык политикая ялан ужась ӧрилэн тӧроез

Кун Кенешлэн тӧроез Владимир Невоструев кичӧлтэмъя кылдытэм нимъям премиосты туэ тямысэтӥзэ сётъялозы ни. Дышем сямен сӥё-дано ужрад парламентлэн сессиез улсын ортчоз.

Тодэ вайытом, премилэн лауреатъёсыз луыны быгато Удмуртиысь кун аккредитациен кун, муниципал но частной вылӥ дышетсконниосысь студентъёс.  Коньдонкузьымлэн быдӟалаез 11 сюрс 500 манет. 

30-тӥ коньывуонысен 7-тӥ шуркынмонозь Россиын ужантэм нуналъёс луозы. Уждунэз ужам понна кадь тырозы. Со сярысь 20-тӥ коньывуонэ Россилэн азьмуртэз Владимир Путин коронавирусэн югдуръя куи кивалтэтэн кенешонын вераз.

Али эпидемилэн выль тулкымезлэсь лек вакытсэ капчиятыны тужгес но кулэ. Соин валче кылдэм югдурез лыдэ басьтыса, быдэс кунын 30-тӥ коньывуонысен 7-тӥ шуркынмонозь ужантэм нуналъёс ялон сярысь ӵектондылы, ужасьёслы уждунзэс утьыса, дурбасьтӥсько
Владимир Путин, Россилэн азьмуртэз

Со улосвылъёсын, кытын югдур тужгес секыт, 23-тӥ коньывуонысен ужантэм нуналъёс ялыны быгатозы. Россиысь вице-премьерлэн Татьяна Голиковалэн сыӵе дэмланэзлы азьмурт озьы ик дурбасьтӥз.

Ужзэс дугдытыны быгатӥсьтэм предприятиосты адямиосты вакцинациез ортчем сярысь сертификатэн гинэ лэзёзы.

Пусъём, эмъяськонниос, аптекаос, лавкаос, банкъёс, транспорт, тӧрлык ёзэсъёс ужзэс азьланьтозы. 

Удмуртиысь 15 сиён-юонъёс гастрономи брендъёсъя «Вкусы России — 2021» кыкетӥ йӧскалык вожвылъяськонэ пырисько. 20-тӥ коньывуонэ ужрадлэн сайтаз куара сётон кутскиз. Со сярысь элькунысь гурт возёсъя, но сиён-юонъя министерстволэн пресс-службаез ивортӥз.

Удмуртилэсь вожвылъяськонэ пырисько: сезьы тысьлэсь печення, пельнянь, перепеч, ӵынатэм чорыгъёс, чабей, но ӟег пызьлэсь туген нянь, пажитникен сыр, кеч йӧллэсь сыр, ческыт сиёнъёс, чечы-крем, но чечы, бакча сиёнъёслэсь чипсы, пастила-пластинка, карп.

Куара сётон 7-тӥ шуркынмонозь мыноз. Котькуд мылкыд карись куинь сиён-юонэз бырйыны быгатэ. Озьы радъясьёс «Нас выбирают» номинациын куинь вормисьёсты тужгес трос куараосъя пусъёзы.

Та сиён-юонъёс, но соослэн историзы сярысь калыклы веран, аспӧртэм, но ӟечлыко сиён-юонъёс лэсьтӥсь пичи возёсъёсын тодматон, фермеръёслы сое вӧлмытыны, но вузаны юрттон — со «Вкусы России» вожвылъяськонлэн валтӥсь ужпумез. Ми адӟиськомы, кызьы вожвылъяськон ужбергатӥсьёслы будыны мылкыд сётэ, агротуризмез но оглом гурт интывылъёсты азинтыны юрттэ
Дмитрий Патрушев, Россиысь гурт возёсъя министр


2021-тӥ арын вожвылъяськонэ Россилэн 84 улосвылъёсысьтыз 700-лэсь трос брендъёс пырисько. Соос пӧлын вашкала сиён-юонъёс но, фермеръёсын берло 10 аръёсы кылдытэмъёсыз яке улӟытэмъёсыз но.

Тодэ вайытом, кылем арын куара сётонэ 500 пала брендъёс пыриськизы, со пӧлысь укмысэз — Удмуртиысь.

Бускель Татарстанын улӥсь удмуртъёс анай кылъёсын диктант гожтонъя элькун акцие пыриськизы. Казаньын укмыс егитъёс удмурт кылын шонер гожъяськыны быгатэмзэс эскеризы. Со сярысь ивортодэтъя «Удмуртия» агентстволы Татарстанысь удмуртъёслэн автономизылэн быдэсъясь кивалтӥсез, удмурт кылъя дышетӥсь Ольга Чайникова вераз.

70 процентэз ньыльлы но витьлы гожтӥзы, кылемез - куиньёслы. Кык витьёсмы вал ке, одӥгез идеальной - одӥг янгышез но йӧ вал: пунктуационной но, орфографической но
Ольга Чайникова, удмурт кылъя дышетӥсь

Солэн кылъёсызъя, тросэзлы егитъёслы диктант гожтыны кельшиз, та ужрадэз выльысь ортчытъяны мылкыдзэс веразы.

Нырысь ик, школаын кадь асьсэзыс шӧдӥзы. Удмурт кылын ручкаен листок вылын гожъяськемзы но кемалась вылымтэ ни. Соин ик ӝутскем мылкыдын кошкизы, шумпотэмын вал таӵе формат ортчиз шуыса
Ольга Чайникова, удмурт кылъя дышетӥсь

Казаньын улӥсь егит удмуртъёс котькуд покчиарняе вераськыны, ӵошен кенешыны люкаськыло. Сыӵе пумиськонын диктант но гожтыны дыр висъяллялозы, оло.

Озьы ик Ольга Чайникова пусйиз, удмурт кылын диктантэз Агрыз, Бавлы, Балтась, Кукмор, Мамадыш, Сабы ёросъёсын улӥсь удмуртъёс но гожтӥзы. Вань пыриськисьёслы таукаронъёс сётӥзы.

Ватсалом, «Татарстанын улӥсь калыкъёслэн анай кылъёсынызы диктант» ужрадэз Анай кылъёслэн но калыкъёслэн огазеяськонзылэн арзы улсын ортчытӥзы. Кык нуналскын 16 пӧртэм кылъёсын диктантъёс гожтӥзы.

Тодэ вайытом, Казаньын Калыкъёслэн эшъяськон юртазы ужась арнянунал школа улсын удмурт кылъя урокъёс нуо

Нялтас вераса, 3-7 шуркынмонэ куатетӥ ползэ Бадӟым этнографи диктант ортчоз. Туэ ужрадэ онлайн амалэн гинэ пыриськыны луоз. 

Лулчеберетъя волонтёръёс Шаркан ёросысь Сосновка черкогуртын Михаил Архангеллы сӥзем черклэсь котырзэ утялтӥзы. Ужрадэ Ижкарысь но Шаркан ёросысь асмылкыдчиос пыриськизы. Со сярысь Удмуртиысь тӧролэн но кивалтэтлэн пресс-службазы ивортӥз.

Егитъёс тротуар лэсьтӥзы, кенерез буязы, интывылысь жагез утялтӥзы.

Ми сюлэммы ӧтемъя тыршиськомы, милям ужпуммы возьматыны, котькуд адями огазеяськонмы борды итӥськыны но ваньмон дыръяз ӟеч ужъёс лэсьтыны быгатэ шуыса. Мукет ласянь, ми культура удысын волонтёр ужез вӧлмытыны ужпум пуктӥськомы. Ёросын тырмыт асмылкыдчиос, но Ижысь но волонтёръёсты ӧтимы, соосты ог-огенызы тодматон но огазеян понна
Евгений Фарина, Калык творчествоя элькун юртысь лулчеберет удысын асмылкыдчиосын ужанъя ӧнерчи

Азьланяз Удмуртиысь ёросъёсы толэзьлы быдэ потаны малпало. Отчы, кытын лулчеберетъя асмылкыдчиослэн юрттэтсы кулэ.

Тодэ вайытом, 2019-тӥ арын «Волонтёры культуры» федерал программа «Культура» йӧскалык ӵектослэн люкетэз луиз. Со асмылкыдчиослэн огазеяськонъёссылы юрттон вылысь малпамын, со пӧлын Россиысь калыкъёслэсь лулчеберет кылёсбурзэ утён удысын.

Со арын ик коньывуонэ Удмуртиын «Волонтёры культуры» улосвыл центр кылдытӥзы. Со Калык творчествоя элькун юрт бордын ужа.

Удмуртиын кунпуш ужъёсъя министерстволэн «Народный участковый - 2021» огъяросси конкурсэзлэн кыкетӥ люкетэз йылпумъяськиз. Вотэсын куара сётонын Ижкарысь полицейской вормиз. Со сярысь элькун министерстволэн пресс-службаез ивортӥз.

Вожвылъяськонлэн нырысетӥ люкетэз ёросъёсын ортчиз. Собере отын вормисьёс понна вотэсын куара сётон радъяськиз. Тужгес трос куара кунпуш ужъёсъя министерстволэн Ижкаръя управлениысьтыз полицилэн 2 номеро ёзэтысьтыз участковой Владимир Леванов люказ. Со кунпуш ужъёсъя ёзэсъёсын вить арлэсь трос ужа ни. Умой ужамез элькун министерстволэн таукаронэныз пусъемын.

Полициысь участковой уполномоченнойёслэн нуналзы азьын, со 17-тӥ шуркынмонэ пусйиське, Владимир Леванов Удмуртилэсь данзэ огъяросси конкурслэн финалаз утёз. «Калык участковой» ним понна кунлэн вань улосвылъёсысьтыз ыстэм муртъёс вожвылъяськозы.

Тодэ вайытом, 2020-тӥ арын вожвылъяськонлэн улосвыл люкетаз Вавожысь участковой уполномоченной, полициысь лейтенант Александр Иванов вормиз вал. 

Коньывуонлэн куинетӥ арнянуналаз, 17-тӥ коньывуонэ, Россиын нырысьсэ Атайлэсь нуналзэ пусъёзы. Удмуртиысь Атайёслэн кенешсы онлайн амалэн флешмоб ялӥз.

Вералэ атайды сярысь мерлыко вотэсъёсын. Лэсьтэ видео, гожтэ текст яке сториз, кыӵе со тӥ понна, малы со дышетӥз, кыӵе тужгес яркыт тодэ ваёнды атайды сярысь
Удмуртиысь атайёслэн кенешсы

Гожтэм борды #деньотца18 #деньотца #папаможет хештегъёс ватсано.

Россиын Атайлэсь нуналзэ 2021-тӥ арысен пусйыны ӵектӥз кунлэн азьмуртэз Владимир Путин.

Тодэ вайытом, Удмуртиын Атайлэсь нуналзэ нырысьсэ 2019-тӥ арын пусйизы ни. Нош 2020-тӥ арын со нимлыко праздник луиз, элькун катын озьы ик коньывуонлэн куинетӥ арняяз юнматэмын. 

15-тӥ коньывуонэ Россиын калыкез гожъян-чотан кутскоз. Туэ нырысьсэ одӥг адямилы кӧня ке йӧслыкез (национальность) вераны луонлык сётэмын. Со сярысь переписьлэн медиаофисэз ивортӥз.

Калыкез гожъян-чотан аспӧртэм тодэтъёс (данные) сётоз, кудъёсыз нокыӵе базаосын пусъемын ӧвӧл, со пӧлын кыӵе йӧслыкысь луон но кылъёсты тодон сярысь. Котькуд адями аслаз выжыосыз сярысь тодаз вайыны но со сярысь вераны быгатоз. Озьы ик кӧня ке кылъёсты анай кылэз сямен пусйыны луоз. Со вуоно аръёсы кунын йӧскалык, дышетон, кылъя но лулчеберетъя политикаез радъяны инъет луоз. Соин ик переписьлэн одӥгез валтӥсез ужпумез – кунын улӥсьёслэсь выжызэс но кылзэс ас мылкыдзыя бырйыны-вераны конституциен сётэм эрикрадэз быдэстон.

Асьмеос трос йӧслыко кунын улӥськом, трос сыӵе семьяос, кытын анай-атайёс яке матысь ӵыжы-выжыос пӧртэм йӧслыкысь луо, соин ик ми одӥг адямилы кӧня ке йӧслыкез вераны луонлык сётӥськом. Со та переписьлэн туж кулэ выльдӥськонэз: вань веранъёс лыдэ басьтэмын но переписьлэн йылпумъянъёсаз возьматэмын луозы
Павел Малков, Росстатлэн кивалтӥсез

Йӧскалык но выжы кусыпъёсты тупаса азинтон, ӧжыт лыдъем калыкъёслы но кылъёслы юрттон рос-прос валэктонъёс сётон но шонер тодэтъёс бордысь потэ. Со вуоноезлы ужпум кадь – гарантия, кунамы вань улӥсьёслэн мерлыкъя но йӧскалык культурая кулэяськонъёссы быдэстэмын луозы шуыса, пусйиз Россиысь мер палаталэн йӧслык но вӧсьлык кусыпъёсты тупатонъя ӧрилэн кивалтӥсез Владимир Зорин.

Тодэ вайытом, калыкез гожъян-чотан 15-тӥ коньывуонысен 14-тӥ шуркынмонозь кыстӥськоз. Россиын улӥсьёс 33 юанъёслы валэктон сётоно луозы. Туэ переписе электро амалэн пыриськыны луэ – Госуслуги портал пыр. Вань удмуртъёслэн «Удмурт Кенеш» огазеяськонзылэн исполкомез удмурт калыклы вазиськон кутӥз.  

Красногорск «Лучшая муниципальная практика» V огъяросси конкурслэн «Градостроительная политика, обеспечение благоприятной среды жизнедеятельности населения и развитие жилищно-коммунального хозяйства» ӧрын гурт поселениос пӧлын кыкетӥ инты басьтӥз. Ӵектосэз быдэстыны 15 миллион манет висъялозы. Со сярысь Удмуртиысь тӧролэн но кивалтэтлэн пресс-службазы ивортӥз.

Красногорскъёс вожвылъяськонэ «Живи, родник, живи» ӵектоссэс ыстӥзы. Ёросын 35 шуръёс, 34-ез со пӧлысь ӵапак ошмесъёсысь кутско. Со сяна, пичи гуртъёсын ошмесъёсысь гинэ юон ву басьтыны луэ. Ӵектос улсын тямыс ошмесъёсты умоятыны чакламын, витяз ужъёсты йылпумъязы ни.

Вожвылъяськонын оглом 262 куриськонъёсты эскеризы.

Муниципалитетъёслэн мыло-кыдо пыриськемзы соослэн асьсэдыз возьматыны мылкыдзэс верамзы, аспӧртэм ӵектосъёсынызы но ӟеч ужъёсынызы тодматэмзы потэ шуыса возьматэ. Пыриськисьёслэн лыдзы 2017-тӥ арысен кык поллэсь трослы йылӥз
Марат Хуснуллин, Россиысь кивалтэтлэн тӧроезлэн воштӥсез

Ватсалом, вить ар ӵоже вожвылъяськонэ 3 сюрс 700-лэсь трос муниципал кылдытэтъёс пыриськизы. Росси азьмуртлэн пумкылъянэзъя 2020-тӥ арын коньдонкузьымен фонд 25 поллы будэтэмын вал – 1 миллиард манетозь. Озьы ик тросгес номинациос луизы.

Тодэ вайытом, Удмуртиын мерлыко ужен вырись огазеяськонъёслы элькун коньдэтысь субсидиос сётон понна вожвылъяськонлы йылпумъянъёс лэсьтӥзы. Вормисе 18 огазеяськонъёс потӥзы. 

Калыкъёслэсь огазеяськон нуналзэс пусъёнэн валче Россиын улӥсьёс бӧрсьысь ньыль нунал шутэтскозы. Со сярысь «Российская газета» ивортӥз.

Праздник нунал, 4-тӥ шуркынмон, покчиарнялы тупа. Удмуртарня озьы ик ужантэм нуналэн ялэмын. Со сяна, 3-тӥ шуркынмонэ ужан нунал одӥг часлы вакчигес луоз.

Тодэ вайытом, азьвылгес Росси кивалтэт 2022-тӥ арын шутэтскон нуналъёсын дырпусэз юнматӥз. Ватсалом, туэ 31-тӥ толсур но шутэтскон нунал луэ. 

Казаньын Калыкъёслэн эшъяськон юртазы удмурт калык эктонъя школа ужа. Со сярысь ивортодэтъя «Удмуртия» агентстволэн корреспондентэзлы Татарстанысь удмуртъёслэн автономизылэн быдэсъясь кивалтӥсез Ольга Чайникова вераз.

Эктонъя урокъёсты Шаркан ёросын вордӥськем Удмуртиысь лулчеберетъя элькун колледжез йылпумъям нылаш Елизавета Бехтерева нуэ. Отчы удмурт кылэз дышетыны ветлӥсь пиналъёс но, егитъёс но люкаськыло. Покчиос арнянуналэ дышетско, нош егитъёс – арня вискын.

Ольга Чайниковалэн верамезъя, Елизавета Бехтерева пӧртэм эктонъёсын тодматыны тырше.

Удмуртиын кызьы экто но асьме палан, татын бигерын, кызьы экто дышетӥськом. Котькуд ёрослэн аслаз сямъёсыз вань шуиськом ук. Эктонъя но соослэн асьсэлэн тунсыко традициоссы. Лиза но али тунсыкъяське, тодыны турттэ, кызьы Балтасиын экто, кызьы Кукморын экто
Ольга Чайникова, Татарстанысь удмуртъёслэн автономизылэн быдэсъясь кивалтӥсез

Школае вань мылкыд карисьёс ветлыны быгато. Со понна Ольга Чайниковалы мерлыко вотэсъёс пыр вазиськыны луэ яке Татарстанысь удмуртъёслэн автономиенызы герӟаськыны кулэ.

Ми удмуртъёсты гинэ ум возьмаське, ми возьмаськом адямиосты, кудъёсызлы тунсыко удмурт лулчеберет
Ольга Чайникова, Татарстанысь удмуртъёслэн автономизылэн быдэсъясь кивалтӥсез

Тодэ вайытом, Казаньын озьы ик удмурт кылъя урокъёс нуо

Удмуртиын 65 арессэс ортчем арлыдоос понна нимаз висъяськыса улон режим возиське. Со 2020-тӥ арысь 17-тӥ шуркынмонысен азьланьтӥське, тодэ вайытӥз Роспотребнадзорлэн элькунъя управлениезлэн пресс-службаез.

Сыӵе ик режим секытэн кышномуртъёс но кема кыстӥськись (хронической) висёнъёсын адямиос понна ужа.

Ваньзы соос улон интыысьтыз эмъюртэ, ужазы (дорын ужанэ выжтымтэ ке), матысь лавкае ветлыны, пуныен калгыны, жуг-жагез поттыны, физкультураен вырыны потаны гинэ быгато.

Тодэ вайытом, берло нуналскын Удмуртиын коронавиурсэн черлан 320 выль учыръёсты пусйизы. 11-тӥ коньывуонлы элькунын 331 сюрслэсь трос адями ковидлы пумит вакцинацилэсь быдэс курссэ ортчиз. Дэмен иммунитет кылдон понна 924 сюрс 245 адями прививка пуктыны кулэ.

Казаньын Калыкъёслэн эшъяськон юртазы ужась арнянунал школа улсын удмурт кылъя урокъёс нуо. Со сярысь ивортодэтъя «Удмуртия» агентстволэн корреспондентэзлы Татарстанысь удмуртъёслэн автономизылэн быдэсъясь кивалтӥсез, удмурт кылъя дышетӥсь Ольга Чайникова вераз.

Урокъёсы удмурт семьяосысь сизьым пиналъёс но Казаньысь федерал университетын дышетскись одӥг пияш пырисько. Пиналъёс нылпи садысен кутскыса ветло. Дышетӥсьсы пусъе, ваньзы ик соос ас мылкыдзыя лыкто.

Ми татын кыллы но дышетӥськом, шудӥськом но, кырӟаськом но, эктӥськом но, мультфильмъёс но учкиськом. Соин сыӵе яркыт ортчо урокъёсмы милям
Ольга Чайникова, удмурт кылъя урокъёсты нуись

Удмурт кылъя урокъёс арняяз одӥг пол луо но быдэс ар ӵоже радъясько. Ольга Чайниковалэн кылъёсызъя, азьланяз студентлы, оло, нимаз урокъёс но сётъялозы, малы ке шуоно солэн мылкыдыз туж бадӟым.

Со удмурт семьяысь шуиз ассэ. Семьязы, пе, татчы Удмуртиысь лыктэмын, но удмурт сямен уг верасько. Пересьёссы, пе, удмурт сямен верасько вал. Нош соос, пе, ум валаське вал. Мон, пе, азьло ик шӧдӥ вал ини сыӵе кулэлыкез ачим понна. Но али, пе, кужыме кылдӥз соин ужаны
Ольга Чайникова, удмурт кылъя урокъёсты нуись

Нялтас вераса, пияшлэн сузэрез но удмурт кылэз дышетыны мылкыд карыса вазиськылэм ини. Но со кунгож сьӧрын улэ, соин ик солы онлайн-курсъёс кулэ вылэм. 

Тодэ вайытом, Удмуртиын удмурт кылъя дунтэк курсъёс мыно

Казаньын Калыкъёслэн эшъяськон юртазы Татарстанысь удмурт егитъёслэн пумиськонзы ортчиз, оглом 20 адями люкаськиз. Со сярысь ивортодэтъя «Удмуртия» агентстволэн корреспондентэзлы Татарстанысь удмуртъёслэн лулчеберетъя йӧскалык автономизылэн быдэсъясь кивалтӥсез Ольга Чайникова вераз.

Пумиськонын автономилэн ужаз азьвыл ик пыриськисьёс но, Казане берло дыре дышетскыны, ужаны лыктэмъёс но вал. Егитъёс пичияк концерт дасязы, кырӟазы, эктӥзы, озьы огазеяськонлэсь одӥгзэ ужан ӧрзэ возьматӥзы, ог-огзылы мылкыд сётӥзы. Собере выль лыктэмъёсты быдэсак автономиенызы тодматӥзы.

Андрей Сергеевич Герасимов, автономимылэн кивалтӥсез, ужмы сярысь вераз, мар ми татын кариськом, мае быдэсъяськом мадиз. Нош мон егитъёслэн крылоенызы тодматӥ. Ӵектосъёсмы сярысь, элькун конкурсъёсмы сярысь мади
Ольга Чайникова, Татарстанысь удмуртъёслэн лулчеберетъя йӧскалык автономизылэн быдэсъясь кивалтӥсез

Ольга Чайникова пусъе, автономиязы Татарстанысь сяна, палэнысь удмуртъёс но пырисько. Тросэз Удмуртиысь вуэмъёс, со сяна, Марий Элысь лыктэмъёс но вань. 

Милям вань конкретной стратегимы, кудӥзъя пӧртэм ӧръёс ӝутӥсько: журналистъёсын, ёросъёсын, нылпи садэ ветлӥсь пиналъёсын но дышетскисьёсын, студентъёсын, ужась егитъёсын ужан. Та стратегияя котькуд ӧрлэн вань аслаз ӵектосэз
Ольга Чайникова, Татарстанысь удмуртъёслэн лулчеберетъя йӧскалык автономизылэн быдэсъясь кивалтӥсез

Покчи пиналъёс понна, кылсярысь, «Мудорвай» вожвылъяськон ортчыто. Отчы удмуртъёс тросэн улоно вань ёросъёсысь нылпиос пырисько. Нырысь ик соос ёрос конкурсазы кужымзэс эскеро, нош собере – толсуре – Казане гала-концертэ лыкто.

Басьтӥськом ке студентъёсты но ужась егитъёсты, вань форум «БиГерд», кудӥз «Гырон быдтон» азьын ортче. Куинь нунал куспын ми егитъёсын пӧртэм ӧръёсъя ужаськом: этноблогинг, журналистика. Собере «Гырон быдтонын» соос асьсэлэсь дышетскемзэс возьмато ини
Ольга Чайникова, Татарстанысь удмуртъёслэн лулчеберетъя йӧскалык автономизылэн быдэсъясь кивалтӥсез

Пумиськон улсын егитъёс ог-огенызы тодматскизы, яратоно ужзы, тунсыкъёссы, азьланезлы ужпумъёссы сярысь вераськизы, кунояськизы. Пусъём, таӵе ужрад Татарстанысь удмурт егитъёс понна арлы быдэ радъяськылэ.

Тодэ вайытом, Ижкарысь «Чебеляй» коллектив «образцовой» ним басьтӥз.



Глазкарысь Киров нимо урамысь Свободы карлуд вӧзын вить синпелетъёс пуктозы. Ваньмыз ик карлэн историеныз герӟаськем арбериос. Со сярысь «ВКонтакте» мерлыко вотэсысь бамаз карлэн тӧроез Сергей Коновалов ивортӥз.

Пусйымон арбериос пӧлын:

  • Пётр Фёдорович Чайковский городничийлэн куинь сэрего шляпаез;
  • Иднакар карйылысь шедьтосъя тылобурдо тусъем чеберъяськон;
  • Сибыр трактлэн тодметъёсыз - жильыен дуретъёс;
  • карез данъям усточиослэсь мылкыдзэс ӝутӥсь муза;
  • карлэн спорт историез сярысь верась конькиос – Удмуртиын нырысетӥзэ йӧ дворецез пуктон борысен кутскыса, фигуристкалэн Елизавета Туктамышевалэн вормонъёсыз дорозь.

Синпелетъёс Глазкарысь шаертодонъя музейлэн «Место памяти – место селфи» ӵектосэз муниципал проектъёсъя конкурсын вормемлы луыса кылдӥзы. Соосты карысь суредасьёс валче ужаса лэсьтӥзы. 

Тодэ вайытом, Ижкарысь Ленин нимо но Вормонлы 40 ар ульчаос вожысь скверез шуркынмонозь умоятозы. 


Удмуртиын удмурт кылъя дунтэк курсъёс кутскизы. Дышетонъёс Глазкарысь В. Г. Короленко нимо пединститутын но радъясько. Кызьы вераз ивортодэтъя «Удмуртия» агентстволы институтысь дышетӥсь, курсъёсты нуись Ольга Никифорова, со доры 17 мурт гожтӥськиз.

Пӧртэм аресъемъёс. Студентъёс тани нырысетӥ курсысь – 17-18 аресъемъёс. Самой бадӟымез 86 арес. Тунсыко, кин ке валагес со пересьёс пӧлысь, кин ке уггес
Ольга Никифорова, Глазкарын удмурт кылъя курсъёсты нуись

Ольга Никифоровалэн верамезъя, удмурт кылэз дышетонъя курсъёсты со ог 15 ар пала нуэ ни. Соос я институтазы, я Эшъяськон юртын радъясько. Кар администрациын ужасьёсты удмурт кыллы дышетыны курыку, курсъёсты кивалтон юртын но ортчытъяз.

Удмурт кылэз дышетыны лыктӥсьёслэн пӧртэм мугъёссы. Эмчиос, кылсярысь, арлыдо висисьёссэс умойгес валаны тыршо. Удмурт сямен вазиськод ке, соос, пе, кышкатэггес верасько ини. Мукет удысын тыршисьёслы но кылэз тодэмзы ужазы юрттэ.

Сыӵе яркыт пример, мон шуысал, Елена Николаевна Трефилова – со корреспондент «Красное знамя» газетын. Со вал, дыр, одӥгез сыӵе мыло-кыдо адями, кудӥз индивидуальной занятиос но нимысьтыз басьяз. Солэн сыӵе мугез: мынӥсько ке гуртэ, удмуртъёс уг верасько, а табере мынӥсько, «ӟечбуресь, мон Елена Николаевна, ойдо тӥледын тодматском», всё, мукет сямен верасько ини, ӝожъёссэс но верало, мар кулэ журналистлы, мукетсэ но верало
Ольга Никифорова, Глазкарын удмурт кылъя курсъёсты нуись

Дышетӥсьлэн кылъёсызъя, курсъёсы пыриськисьёс ог-огенызы эшъяськыны кутско. Туэ Пермь шаре дэмен ветлӥзы, вордӥськем нуналъёссэс но ӵош пусъё.

Ми шуиськом ини: удмурт кыл герӟа котькинэ: тодӥсьсэ но, тодӥсьтэмзэ но
Ольга Никифорова, Глазкарын удмурт кылъя курсъёсты нуись

Удмурт кылъя курсъёс туэ толсур пумозь мынозы.

Озьы ик лыдӟе, кызьы удмурт кылъя курсъёс Можгаын ортчыло

Тодэ вайытом, Россиысь финн-угор калыкъёслэн VII ӧтчамзылы дасяськон улсын Ижкарын йӧскалык лулчеберетэз дышетон ужпумъёслы сӥзем котырес ӝӧк ортчиз

15-тӥ коньывуонэ Удмуртиын, озьы ик тросаз Россиысь улосвылъёсын, калыкез гожъян-чотан кутскоз. Огъяросси ужрад 14-тӥ шуркынмонозь кыстӥськоз. Туэ нырысьсэ со цифровой амалэн но ортчоз. Со сярысь Удмуртстат ивортӥз.

Эскеронъёс 2010-тӥ арын калыкез гожъян-чотан дырысен воштӥськонъёсты адӟыны луонлык сётозы.

Ужрад улсын Удмуртиын улӥсьёс 33 юанлы валэктон сётозы, 23-ез соос пӧлысь социально-демографической тодметъёсын герӟаськемын: выжы (пиосмурт яке кышномурт), арлыд, гражданство, вордӥськем инты, йӧслык, кылъёсты тодон, дышетскем, нылпиослэн лыдзы, коньдон поттон амал. Дасэз юанъёс улон инты сярысь луозы: кыӵе коркаын улӥськоды, кыӵе арын со пуктэмын, кыӵе быдӟалаез, кӧня висъетъёсыз, кыӵе ӟечлыкез, интернетэз вань-а, ӧвӧл-а 

Россиын огдыр улӥсьёс сизьым юанлы валэктон сётозы: выжызы, арлыдзы, ялан улон кунзы, Россие вуон мугзы но кӧня дырлы лыктэмзы.

Калыкез гожъян-чотанэ электрон амалэн 15-тӥ коньывуонысен 8-тӥ шуркынмонозь «Госуслуги» порталын пыриськыны луоз. Со понна «Пройти перепись населения» услугаез быръёно. Электрон анкетаез ас вылэ сяна, семьялэн вань ёзчиосыз понна но гожтыны яра. Юан-веранэз ортчем бере, одно ик QR-кодзэ кельтоно, сое гожъян-чотанэз нуисьлы возьматоно луоз. 

Интернет-переписе тросгес калык мед пыриськоз шуыса, трос луонлыко центръёсын (МФЦ) нимаз компьютер сылоз. Валэктон уж волонтёръёс нуозы

Оглом элькунын калыкез гожъян-чотан вакытэ 250 волонтёръёс ужалозы, тросэз соос пӧлысь огъяросси но элькун ужрадъёсы пыриськылэмын ини.

Озьы ик гожъясь-чотасьлэсь доре лыктэмзэ возьманы яра. Удмуртиын переписчиклэсь ужзэ 2 сюрс 731 адями быдэсъялоз, со сяна, 456 контролёръёс тыршозы. 

Тодэ вайытом, туэ калыкез лыдъян-гожтон дыръя кык но солэсь трос анай кылэз но одӥг но солэсь трос йӧслыкез пусйыны луоз.

20-тӥ шуркынмонэ Ижкарын Калыкъёслэн эшъяськон юртазы «Роль финно-угорских общественных объединений в сохранении языка, культуры, традиций и обычаев своего народа» научно-практической конференци ортчоз. Со «Ижевск Мари» мер огазеяськон но Удмуртиын мукет финн-угор огазеяськонъёс кылдэм дырысен 30 ар тырмонлы сӥземын луоз, ивортӥз элькунысь йӧскалык политикая министерстволэн пресс-службаез.

Конференци «Ижевск Мари» огазеяськонлэн кар конкурсын утэм грант чотын радъяське. Сое калыкез финн-угор лулчеберетлэн узырлыкеныз тодматон но мер огазеяськонъёслэсь интызэс пусъён понна ортчыто. Радъясьёс оско, ужрадэз удмурт, пор, мордва, бесерман, коми-пермяк огазеяськонъёсын валче ортчытон нуналмысь кылдылӥсь юанъёсты сэрттон-пертчон понна выль ужан амалъёс утчаны но Удмуртиысь калыкъёслэсь кылзэс, лулчеберетсэс, сямъёссэс, йылолъёссэс азинтыны мылкыд сётоз шуыса.

Ужрадэ тодосчиос, интыосысь но элькун финн-угор огазеяськонъёсысь азьветлӥсьёс но мукетъёсыз пыриськыны быгато. Куриськонъёсты 10-тӥ шуркынмонозь yamakov@inbox.ru электрон почтае ыстоно.

Тросгес конференцилэн положениысьтыз тодыны луэ. Со сяна, 8 (3412) 21-58-84, 8 (912) 756-45-65 телефон номеръёсъя жингыртыса.  

Тодэ вайытом, Ижкарын Историяя, кылъя но литературая удмурт институтлы 90 ар тырмонлы сӥзем тодосъя огъяросси конференци ортчиз.



7-тӥ коньывуонэ Удмуртиын «МедПоддЕРжка» ӵектос выльысь ужаны кутскиз. Нырысетӥ нуналаз ик Ижкарын 70-лэсь трос адями волонтёр сямен эмчиослы юрттыны мылкыд каремез сярысь ивортӥз. Со сярысь элькун тӧролэн но кивалтэтлэн пресс-службазы ивортӥз.

32 аресъем Еленалэн верамезъя, со кылем арын ик ӵектосысь волонтёръёс борды итӥськыны малпа вал, но пӧртэм мугъёсъя ӧз быгаты. Соин ик туэ луонлык кылдэм бере ик вазиськиз.

Кузпалы но нылпиослы малпанэлы дурбасьтӥзы. Валасько, «МедПоддЕРжкалэн» волонтёрез луыны капчи ӧвӧл, но кин, ми ке ӧм? Мынам адямиослы пайдаё луэме потэ, мынам улон шоры учконэ: юрттон тон, юрттозы тыныд
Елена, «МедПоддЕРжка» ӵектослэн волонтёрез

Волонтёръёс эмъяськонниосы пырисьёслэсь температуразэс мерталозы, регистратураын юрттозы. Автоволнтёръёс асьсэ машинаенызы эмчиосты висисьёс доры нулло, ужан нунал пумын доразы келяло. Рос-просгес ивортон 8(3412) 725-385 телефон номеръя 9 часысен 16 часозь басьтыны луоз.

Ватсалом, 2020-тӥ арын коньывуонэ мытэм ӵектос улсын эмчиослы 700-лэсь трос волонтёръёс юрттӥзы. 

Наверх
Вниз