Ижкар-1 °C
22 -тӥ коньывуон 2020 Покчиарня
18+

20-тӥ коньывуонэ Шаркан ёросысь «Быгинское» муниципал кылдытэтысь Вормон скверын Быдӟым Атыкай ожысь бертэм 132 гуртооссылы сӥзем буре ваён пул усьтӥзы. Со сярысь Шаркан ёрослэн тӧроез Василий Муклин «ВКонтакте» мерлыко вотэсысь бамаз ивортӥз.

Со синпелет Быги поселениын вордскемъёслы, кин Атыкай музъеммы понна ожмаськонъёсын кышкасьтэм лумзэ, батырлыксэ, юнлыксэ, вордӥськем шаерзэ яратэмзэ возьматӥз, нош ож бере аръёсы вань кужымзэ но тодон-валанзэ ёросмес азинтыны сётӥз
Василий Муклин, Шаркан ёрослэн тӧроез

Буре ваён пулэз «Лучшие муниципальные проекты в Удмуртской Республике» вожвылъяськонын вормем коньдонлы луыса лэсьтӥзы. Быгиослэн Быдӟым Атыкай ожын Вормонлы 75 ар тырмонлы сӥзем «Тропа памяти» ӵектоссы 250 сюрс манет утӥз. Со сяна, коньдонэн «Восход» огазеяськон юрттӥз. 

Тодэ вайытом, алигес Алнаш ёросысь кык пор гуртъёсын Быдӟым Атыкай оже ветлэмъёслы синпелетъёс пуктӥзы.

21-тӥ коньывуонэ Удмуртилэн кунлыкезлы 100 ар тырмонлы сӥзем видеолекциослэн ньылетӥ сериез потӥз. Отын верамын, кызьы 1892-тӥ арын Вуж Мултан черкогуртын улӥсьёсты адямиез курбон сётонэн янгыше уськытӥзы.

Мултан уж – кызьы удмуртъёсты янгыше уськытон быдэс Росси империез зуркатӥз


Мултан уж ньыль арлэсь кема кыстӥськиз но 1896-тӥ арын йылпумъяськиз. Янгыше уськытэм удмуртъёсты шонере поттӥзы. XIX даурысь азинлыко ӟуч интеллигенци пыриськемен Вуж Мултанысь удмуртъёс гинэ ӧвӧл, быдэс калык шонере поттэмын вал шуыны луоз
Ольга Соколова, Кизнер ёросысь В. Г. Короленко нимо «Вуж Мултан» музейлэн кивалтӥсез

Учкисьёс тодозы, кызьы Росси империысь устоосыз журналистъёс, юристъёс но мер ужасьёс янгыше уськытэмъёсты утьыны выризы, мар вылын янгыш карон инъяськиз но кызьы улӥзы процессэ пыриськемъёс суд йылпумъяськем бере.

Выль выпускъёсты «Terra Удмуртия» ютуб-каналысь, озьы ик ивортодэъя «Удмуртия» агентстволэн сайтысьтыз но мерлыко вотэсъёсысь учке.

Тодэ вайытом, «Terra Удмуртия» ӵектослы 14-тӥ коньывуонэ кутскон сётӥзы

Удмуртиысь зоопаркысь атлантической морж Сгата-Несейка но солэн инкуазьын улӥсь ӵыжы-выжыосыз сярысь «Несейка. Младшая дочь» фильмез 24-тӥ коньывуонэ 13 час 50 минутэ (Москва дыръя) «Россия-Культура» телеканалын возьматозы. Со сярысь зоопарклэн пресс-службаез ивортӥз.

Фильмез куать ар ӵоже снимать каризы. Берпуметӥ ужрадъёс Ижкарысь зоопаркысь моржъёслэн вольеразы 2017-тӥ арын ортчизы. Со Сгата-Несейкаез мозмытон но солэн ӵыжы-выжыосызлэн улонзы сярысь вералоз.

Владимир Марин – фильмез кылдытӥсь – рос-прос ужаз. Удмуртиысь зоопаркын съёмкаос ӵукнаысен бер ӝытозь одӥг шокчемен кадь мынӥзы. Со ваньзэ синйылтыны тыршиз. Со туж пайдалыко, узыр, тодэ кылись нуналъёс вал
Удмуртиысь зоопарклэн пресс-службаез

Тодэ вайытом, 2019-тӥ арын «Несейка. Младшая дочь» фильм Санкт-Петербургын «Меридиан надежды» экологияя кинофестивальын вормиз

27-тӥ коньывуонэ Глазкарын Удмурт автономилэн кивалтӥсезлы, кун но мер ужасьлы Иосиф Наговицынлы сӥзем буре ваён пу усьтозы. Со сярысь кар администрацилэн пресс-службаез ивортӥз.

Буре ваён пулэз Киров нимо ульчаысь 11 номеро юрт (Столбов купечлэн азьвыл юртэз) борды шуккозы. Отын Ленинлэсь Россиысь калыкъёслэн эрикадъёссы сярысь декларацизэ шараязы, нош 1921-тӥ арын Иосиф Наговицынлэн кивалтэмез улсын улосвыл революционной комитет ужаз.

Буре ваён ужрад «Из прошлого в настоящее: 100 лет государственности Удмуртии» конференци азьын ортчоз

Пусъём, Иосиф Наговицынэз буре ваён пул юнматон сярысь куронэн «Удмурт Кенеш» огазеяськонлэн Глазкарысь ёзэтэз вазиськиз. Нош туэ куарусёнэ Кар дума Наговицынлэсь нимзэ карысь 17 номеро школалы сётон сярысь пумкылъян кутӥз.

Тодэ вайытом, «Удмурт Кенешлэн» кичӧлтэмезъя Удмуртиын 10 нимо-дано удмуртъёслы сӥзем буре ваён пулъёс усьтыны чаклало

Удмуртиын 2021-тӥ арез Гуртлэн ареныз ялӥзы. Со сярысь улосвыл тӧролэн но кивалтэтлэн пресс-службазы ивортӥз.

Ӵектонэн 20-тӥ коньывуонэ Гурт возёс но сиён-юон поттон удысын ужасьёслэсь нуналзэс онлайн амалэн пусъёнын Удмуртпотребсоюзлэн кенешезлэн тӧроез Рауф Каримов но «Рыбхоз Пихтовка» предприятилэн кивалтӥсез Георгий Крылов потӥзы потӥзы, озьы ик солы «Единая Россия» партилэн улосвыл ёзэтэзлэн ёзчиосыз дурбасьтӥзы. 

Ӵектонлы дурбасьтӥзы ке, со гурт возёсэз азинтыны гинэ ӧвӧл, гуртъёсын но оглом элькунамы улӥсьёслэсь улонзэс умоятыны луонлык сётоз
Георгий Крылов, «Рыбхоз Пихтовка» предприятилэн кивалтӥсез
 

Агропром огъетын ужасьёслэсь ӵектонзэс Удмуртиысь Кун Кенешлэн тӧроез Владимир Невоструев но умоен лыдъяз. Со «Единая Россия» партилэсь «Год села» выль улосвыл ӵектоссэ кылдытыны но партилэсь интыосысь ёзэтъёссэ гурт возёс удысэз азинтон уже кыскыны ӵектӥз.

Со гуртъёсысь кивалтӥсьёслы, отын улӥсьёслы соослы юртто шуыса, соос бордын азьланез шуыса валан сётоз. Со вуз поттонын но, лулчеберетэз но, ассэ гуртэз но азинтонын ӟеч ужъемыш сётоз
Владимир Невоструев, Удмуртиысь Кун Кенешлэн тӧроез
 

Удмуртилэн тӧроез Александр Бречалов ӵектонэз умоен лыдъяз но 2021-тӥ арез Гуртлэн ареныз ялӥз.

Мон музъем вылын ужась адямиослэсь тыршемзэс туж гажасько. Тӥ уждэс юн яратыса лэсьтӥськоды, тӥляд ӧнерлыко командаосты вань, соин ик вормонъёсты но сокем бадӟымесь луо. Мон ӵектондылы дурбасьтӥсько
Александр Бречалов, Удмуртилэн тӧроез

Удмуртилэн тӧроез элькун кивалтэтлы ялэм ар улсын гуртэз котыр ласянь азинтонъя программа дасяны но сое агропром огъетын ужасьёсын ӵош эскерыны косӥз.

Тодэ вайытом, 2020-тӥ ар Удмуртиын Ужбергатонлэн ареныз ялэмын. 2019-тӥ ар Тазалыклэн арез вал, 2018-тӥ ар - Сюресъёслэн арзы.

Удмуртиын Россиысь кунпуш ужъёсъя министерстволэн «Народный участковый-2020» огъяросси конкурсэзлэн кыкетӥ люкетэз йылпумъяськиз. Элькунын улӥсьёс ёрос вожвылъяськонъёсын вормем участковойёс пӧлысь устозэ бырйизы. Со сярысь улосвылъя кунпуш ужъёсъя министерстволэн пресс-службаез ивортӥз.

Арня ӵоже мынэм куара сётонэ 12 сюрс 500-лэсь трос адями пыриськиз

5 сюрс 942 адями Вавожысь участковой уполномоченной, полициысь лейтенант Александр Иванов понна дурбасьтӥз. Кунпуш ужъёсъя ёзэсъёсын со сизьым арлэсь трос ужа ни.

Полициысь участковой уполномоченнойёслэн ӧнерзы нуналзы азьын, со 17-тӥ шуркынмонэ пусйиське, Александр Иванов конкурслэн огъяросси финалаз Удмуртилэсь данзэ утёз. «Калык участковой» ним понна Россилэн вань улосвылъёсысьтыз ыстэм муртъёс вожвылъяськозы.

Тодэ вайытом, 2019-тӥ арын Росси вожвылъяськонэ Ижкарысь участковой, полициысь майор Виталий Миролюбов пыриськиз.

1-тӥ шуркынмонысен Ижкарын мер тарнспортын ветлон дун 25 манетозь йылоз. 20-тӥ коньывуонэ сыӵе пумкылъян Удмуртиысь лэсьтӥськонъя, жилищно-коммунальной возёсъя но дыкужымъя министерстволэн тарифъёсты радъянъя ӧриезлэн кенешоназ кутӥзы, ивортэ удысэтлэн пресс-службаез.

Транспорт яке банк картаен тыриськыку транспортын мынон 23 манет усёз. Со сяна, «МИР» картаен тыриськыса, ар пумозь 19 манетэн ветлыны луоз. Толэзьлы проездной билетъёслэн дунъёссы озьы ик 25 процентлы будозы

Сыӵе пумкылъян кутэмлэсь азьвыл ми транспорт компаниослэсь дунъёсты будэтыны валэктонъёсын вань ужкагазъёссэс эскерим. Бен, со мерлык азьын кылкутоно пумкылъян, но сое кутытэк ми ми туннэ ӧм быгатэ. <…> «ИжГЭТ» но «ИПОПАТ» предприятиослэн 2019-тӥ ар понна ыштонъёссы 77 миллион 500 сюрс манет луизы. Ми ум быгатӥське лэзьыны, соослэн коньдонъя югдурзы эшшо секытгес мед луозы шуыса. Нырысь ик, со калыкез нуон-ваёнлэн кышкыттэмлыкез но ӟечлыкез вылын шӧдӥськоз
Дмитрий Сурнин, Удмуртиысь лэсьтӥськонъя, жилищно-коммунальной возёсъя но дыкужымъя министр

Озьы ик со пусйиз, Ижкарын мер транспортлэн ужамез Приволжск федерал округъя одӥгез устоез луэ. Нош мукет улосвылъёсын дунъёсты ар кутсконысен будэтӥзы ни. Кылсярысь, Кировын 26 манетозь (картаен – 23 манет), Пермь шаерын – 26 но 24 манет, Башкортостанын – 25 манет, Казаньын – 30 но 27 манет, Самараын – 32 но 29 манет.

Тодэ вайытом, Ижкарын автобусэн, трамваен но троллейбусэн ветлон понна дунъёсты 2015-тӥ арысен ӧз вошъялэ

Коньывуонлэн куинетӥ арняяз финн-угор росси улосвылъёсын но кунъёсын Ӵыжы-выжы финн-угор калыкъёслэсь нуналъёссэс пусъё. Удмуртиысь Калыкъёслэн эшъяськон юртсы солы сӥзем «О финно-угорских народах за одну минуту» флешмоб ялӥз, ивортэ ужъюртлэн пресс-службаез.

Удмуртиын но Россилэн палэназ улӥсь финн-угор выжыысь потэм муртъёс одӥг минутскын ӵыжы-выжыоссэс ӟечкыланы, асьсэ калыксы но тужгес тунсыко йылолзы сярысь вераны кулэ. Дась ужъёсты 22-тӥ коньывуонозь omfus@mail.ru электрон почтае келяно.

Видеоез Калыкъёслэн эшъяськон юртсылэн «ВКонтакте» но «Интсаграм» мерлыко вотэсъёсысь огинъёсаз поттозы. Нырысетӥез ролик, удмуртъёс сярысь, дась ни.

Тодэ вайытом, Удмуртиын гуртын улӥсь нылкышноос понна туспуктэмъёсъя вожвылъяськон ялӥзы.  

19-тӥ коньывуонэ Удмуртилэн кунлыкезлы 100 ар тырмонлы сӥзем видеолекциосын курслэн куинетӥ сериез потӥз. М. Т. Калашников нимо музейысь экспозициосъя ёзэтлэн кивалтӥсез Лада Михайлова вералоз, кызьы Ижысь заводын пыӵал тӥрлык поттыны кутскизы, кыӵе пыӵалъёс лэсьтӥзы татын XIX даурын.

Кызьы Ижысь заводын пыӵал поттыны кутскизы


Заводлэсь юртъёссэс пуктэм сярысь тодэм сяна, кылзӥсьёс XIX даурысь пыӵал тӥрлыкез но валаны дышозы. Кылсярысь, маин висъяське Кутузовлэн армиеныз кутӥськем пыӵалъёслэн ударно-кремниевой замоксы 1842-тӥ арысь пыӵаллэн ударно-капсюльного замокез.

Нимысьтыз саклык висъямын Иже кык императоръёслэн вуылэмзылы. Пӧртэм аръёсы заводэ Александр I но цесаревич Александр Николаевич (вуоно император Александр II) ветлӥзы

Выль выпускъёсты «Terra Удмуртия» ютуб-каналысь, озьы ик ивортодэъя «Удмуртия» агентстволэн сайтысьтыз но мерлыко вотэсъёсысь учке.

Тодэ вайытом, «Terra Удмуртия» ӵектослы 14-тӥ коньывуонэ кутскон сётӥзы

15-тӥ коньывуонэ Ижкарысь 91 номеро школаын бортпроводницалы Надежда Курченколы сӥзем буре ваён пул усьтӥзы. Со сярысь Удмуртиысь тӧролэн но кивалтэтлэн пресс-службазы ивортӥз.

50 ар талэсь азьло кунмы но быдэс дунне «Аэрофлот» авиакомпанилэн Ан-24 самолётысьтыз 19 аресъем бортпроводница сярысь тодӥз, со омыр судноын пассажиръёсты утён понна аслэсьтыз улонзэ сётӥз. Со кык сьӧсь йыртэмасьёс азе султӥз
Александр Нерадбко, Россиысь транспортъя министрлэн нырысетӥ воштӥсез – Омыр транспортъя федерал агентстволэн кивалтӥсез

Асьмеос ваньмы быдӟым зэмлык сярысь тодамы возьыны кулэ - долг, служить карон но адямилэн быдӟым быръёнэз – калык понна улон
Ярослав Семёнов, Удмуртиысь кивалтэтлэн тӧроез

91 номеро школаын Мужествоя урок ортчытӥзы, отчы стюардесса Татьяна Виноградова но пыриськиз, со авиакомпаниын оглом 55 арлэсь трос ужаз. 1966-тӥ арын 17-тӥ тулыспалэ Шереметьево аэропортын луэм авиакатастрофаын улэп кылиз. Чигем киыз но трос шуккиськонъёсыз шоры учкытэк, стюардесса пассажиръёсты буйгатӥз.

Инбам ваньмызлы уг сётскы, со понна трос кужым сётоно, адямиосты яратоно, соослы каньыл но кышкыттэм мед луоз шуыса тыршоно. Бортпроводниклэн ӧнерез – со адямиослы служить карон. Кин та ӧнерез быре, со подвиглэн кутсконэз ни
Татьяна Виноградова, стюардесса, Россиысь транспорт удысысь дано ужась

Озьы ик школаын вуоно стюардессаосты курсантъёс-бортпроводникъёс пӧлы пыртон сӥё-дано ужрад ортчиз. Укмысэтӥ классысь 15 нылъёс «Курс юного бортпроводника» программая дышетско.

Тодэ вайытом, Ижкарын эшшо куинь юртъёс борды буре ваён пулъёс юнматозы.

16-тӥ коньывуонэ Удмуртилэн кунлыкезлы 100 ар тырмонлы сӥзем «Terra Удмуртия» истори ӵектослэн кыкетӥ видеолекциез потӥз.

Удмуртиын корт поттон заводъёслэн кылдэмзы, Ижын но Воткаын нырысетӥ улӥсьёс сярысь Россиысь тодосъя академилэн Урал ёзэтысьтыз Эскеронъёсъя удмурт федерал центрлэн Историяя, кылъя но литературая удмурт институтысь тодосъя ӧнерчи, истори тодосъя кандидат Николай Пислегин вералоз.

Вордскем шаеренымы тунсыкъяськисьёс тодозы, кылсярысь, Ижын но Вотканы сяна, та палан эшшо одӥг завод пуктыны малпало вал. Нош бигер выжыысь ӟуч генерал Кутлу-Мухаммед (яке Алексей Иванович Тевкелев) кун музъемъёслэсь, кытын ужъёсты нуизы, инлыксэс (статуссэс) воштыны выриз.

Озьы ик тодомы, кызьы заводъёс борды юнматэм улӥсьёсты интывылъя люкон мынӥз но кытысь вуизы татаын нырысетӥ улӥсьёслэн кышнооссы.

Тодэ вайытом, «Terra Удмуртия» ӵектослы 14-тӥ коньывуонэ кутскон сётӥзы, со сярысь мерлыко вотэсъёсысь бамаз элькунлэн тӧроез Александр Бречалов ивортӥз. Та дырозь нырысетӥ лекциез 80 сюрс пала адями учкиз ни.

Выль выпускъёсты «Terra Удмуртия» ютуб-каналысь, озьы ик ивортодэъя «Удмуртия» агентстволэн сайтысьтыз но мерлыко вотэсъёсысь учке. 

Иж но Вотка заводъёс: кылдэмзы но нырысетӥ улӥсьёсыз


Росси кивалтэт 2021-тӥ арын шутэтскон вакытъёсты пусйиз. Ялкарон нуналъёсты выжтон сярысь премьер-министрен Михаил Мишустинэн кинюртэм пуктэт (поставновление) кивалтэтлэн нимлыко сайтаз шараямын.

Выль арын шутэтскон нуналъёсты выжтӥзы:

- кӧснуналысь 2-тӥ толшоре удмуртартнялы 5-тӥ шуркынмонэ;
- арнянуналысь 3-тӥ толшоре удмуртарнялы 31-тӥ толсуре,
- кӧсунаналысь 20-тӥ тулыспалэ вордӥськонлы 22-тӥ тулыспалэ.

Озьыен, 2021-тӥ арын кунамы сизьым праздник вакытъёс луозы: 1-10 толшоре (10 нунал – удмуртарняысен арнянуналозь), 21-23 тулыспалэ (куинь нунал – арнянуналысен пуксёнозь), 6-8 южтолэзе (куинь нунал – кӧснуналысен вордӥськонозь), 1-3 куартолэзе (куинь нунал – кӧснуналысен вордӥськонозь), 8-10 куартолэзе (куинь нунал – кӧснуналысен вордӥськонозь), 12-14 инвожое (куинь нунал – кӧснуналысен вордӥськонозь), 4-7 шуркынмонэ (ньыль нунал – покчиарняысен арнянуналозь).

2020-тӥ арын 31-тӥ толсур - ужан нунал

1-тӥ шуркынмонысен Ижкарын мер транспортын ветлон дунъёсты воштыны малпало. Со сярысь 16-тӥ коньывуонэ журналистъёслы Удмуртиысь транспортъя но сюрес возёсъя министр Алексей Горбачёв вераз.

Транспорт картаен яке банк картаен тыриськыку тариф 23 манет луоз, улэп коньдонэн ке – 25 манет. Со сяна, 31-тӥ толсурозь «Мир» картаен тыриськыку, дун 4 манетлы кулэсме 

Дунъёсты воштон пумысен пумкылъян тарифъёсъя ӧри 2-тӥ коньывуонэ кутоз.

Министр пусйиз, Ижкарын мер транспортын ветлон дунэз берлозэ 2015-тӥ арын будэтӥзы. Соку со 17 манетысен 20 манетозь йылӥз, транспорт картая - 19 манетозь.  

27-тӥ коньывуонэ Ижкарысь Кызьпу арамаез умоятонлэсь нырысь-валысь учкетсэ (концепцизэ) онлайн амалэн тодматон ортчоз. Со сярысь Удмуртиысь Интывылэз азинтонъя центрлэн пресс-службаез ивортӥз.

Кызьпу арама – Ижкарын одӥгез тужгес кулэлыко инты, сое азинтон трос адямиослы тунсыко. Соин ик парке ветлӥсьёс но со интывыл понна кылкутӥсьёс куспын вераськонэз радъяны кулэ
Яков Вдовин, Интывылэз азинтонъя центрысь бюролэн кивалтӥсез

Тодматон 18 час 30 минутэ кутскоз. Ужрадэ пыриськон понна чӧлскетъя пусйиськыны кулэ. Ижкарын улӥсьёс Кызьпу арамаез умоятонъя юанъёссэс сётыны но асьсэлэсь дэмланъёссэс вераны быгатозы.

Азьвылгес карын улӥсьёс пӧлын паркез тырмытонъя юалляськон ортчытӥзы. Вань ӵектонъёсты учкетэз дасясьёслы сётӥзы.

Кызьпу арамаез умоятонъя ӵектосэз эскеронъёс улсын ми та интывыллэсь концепцизэ удмурт мотивъёсын кар парк шуыса пусйим. Но эстетикаез сяна, ужан ласянь ӧръёсты но пусйыны кулэ – ужрадъёс ортчытъян но коммерци
Вероника Чуракова, «Парки Ижевска» огазеяськонлэн кивалтӥсезлэн воштӥсез

Онлайн амалэн тодматон бере нырысь-валысь концепциез udmurt.city/brizh сайтысь учкыны луоз. Озьы ик 8-тӥ шуркынмонозь мылкыд карисьёс паркез умоятонъя мылкыдзэс вераны но дэмланъёссэс кельтыны быгатозы.

Тодэ вайытом, Кызьпу арамез умоятон 2021-тӥ арын кутскоз.

Ватсалом, 2017-тӥ арын «Удмурт Кенеш» огазеяськон Кызьпу арамаез умоятонъя концепциез дасяз вал ини. Нош 2018-тӥ арын парк «Формирование комфортной городской среды» федерал ӵектос улсын умоятоно интывылъёсын лыдметэ пыриз.

15-тӥ коньывуонэ «Удмурт нылкышно кенеш» гуртын улӥсь кышномуртъёс понна туспуктэмъёсъя «Нылкышно ке шуисько…» вожвылъяськон ялӥз. Со сярысь огазеяськонлэн «ВКонтакте» мерлыко вотэсысь огиназ ивортӥзы.

Вожвылъяськон кык номинациосъя мыноз:

- «Гуртын уж пӧзе»: ужан интыын, бакчаын, пудо-живот котырын яке мукет ужен вырон дыръя лэсьтэм туспуктэмъёс;

- «Ял кароме!»: шутэтсконлы, шулдыръяськонлы, инкуазе потамлы сӥзем туспуктэмъёс.

Али яке азьвыл лэсьтэм туспуктэмез 1-тӥ толсурозь «Вконтакте» яке «Инстаграм» мерлыко вотэсысь баме #нылкышнокешуисько но #удмуртнылкышнокенеш хештегъёсын поттыны кулэ.

Вожвылъяськонэ гуртын улӥсь вань кышномуртъёс пыриськыны быгато. Котькуд номинациын куинь вормись луоз. Устооссэ жюри быръёз. Нош кузьымъёсты гуртъёсын азинскись ужбергатӥсьёс дасяло ини!
вожвылъяськонэз радъясьёс

Сак луэ, туспуктэмъёсты жюри мед адӟоз шуыса, бамды вань адямиослы усьтэмын луыны кулэ.

Тодэ вайытом, Удмуртиын «Пужымо Байгурезь – кужым кузьмась гурезь» фотоконкурс азьланьтӥське

14-тӥ коньывуонэ Удмуртилэн даур тырмонэзлы сӥзем выль истори ӵектос улонэ пыӵаны кутскиз. Со улсын 10 лекциосты учкыны луоз. Со сярысь улосвыллэн тӧроез Александр Бречалов мерлыко вотэсъёсыз бамаз ивортӥз.

Тодматске: «Terra Удмуртия» – элькунлэн кунлыкезлы 100 ар тырмонлы выль дышетскон истори ӵектос! Туннэ нуналысен видеолекциос кутско: вашкала дауръёсысен асьме нуналозь 10 историос! Котькудӥз лекция – со аспӧртэм туспуктэмъёс, кинохроникаысь кадръёс – вашкалаысь зэмос «салам»! Лекциос арняяз куинь пол поталозы – вордӥськонъёсы, вирнуналъёсы но удмуртарняосы. Йылпумъясез – Удмуртилэн кунлык нуналаз 4-тӥ шуркынмонэ
Александр Бречалов, Удмуртилэн тӧроез

Ивортодэтъя «Удмуртия» агентствоен тодмо тодосчиосын, музейын но архивын ужасьёсын ӵош дасям ӵектосэз учкисьёс тодыны быгатозы, мар вал туала Удмуртилэн интывылаз ог 10 сюрс ар талэсь азьло, ку уйпала кошкиз берпуметӥез йӧ, кытысь вуизы Иж но Вотка заводъёсын улӥсьёс, кызьы пичи удмурт черкогурт Росси империысь одӥгез тужгес зол гудыртэм уголовной уж инты луиз. Озьы ик Ижысь пыӵал тӥрлык поттӥсьёслэн нырысетӥ вамышъёссы, улосвыллэн Быдӟым Атыкай ож аръёсы улон-вылонэз но мукетыз сярысь пӧртэм историосты.

Лекциосты нуисьёс пӧлын – истори тодосъя кандидатъёс Александр Митряков но Николай Пислегин, В. Г. Короленко нимо «Вуж Мултан» музейлэн кивалтӥсез Ольга Соколова, М. Т. Калашников нимо музейлэн кивалтӥсезлэн тодосъя воштӥсез но экспозициосъя ёзэтлэн кивалтӥсез Александр Ермаков но Лада Михайлова, Глазкарысь шаертодонъя музейысь тодосъя ӧнерчи Марина Ворончихина, Удмуртиысь кун филармонилэн кивалтӥсез Алексей Фомин, Удмуртиысь архив ёзэсын ужасьёс.

«Terra Удмуртия» ӵектослэн нырысетӥ выпускез сыӵе ик нимын сайтын потӥз ни, со удмурт музъемлэн вашкалаезлы сӥземын. Егит тодосчи, археолог, Удмурт кун университетысь Историяя но социологияя институтысь доцент Александр Митряков вералоз, кызьы та интыын улӥсьёс мезолит вакытэ улӥзы-вылӥзы, бронза даурын музъем уж но пудо вордон борды кутскизы, корт дурыны дышизы.

Выль выпускъёсты «Terra Удмуртия» ютуб-каналысь, озьы ик ивортодэъя «Удмуртия» агентстволэн сайтысьтыз но мерлыко вотэсъёсысь учке. 

Алнаш ёросысь кык пор гуртъёсын - Пор Гондыргуртын но Варалиын – Быдӟым Атыкай оже пыриськем улосчиоссылы синпелетъёс пуктӥзы. Ужъёсты быдэстыны коньдонлэсь оглюкетсэ гуртын улӥсьёс бичазы. Со сярысь ивортодэтъя «Удмуртия» агентстволы «Староутчанское» муниципал кылдытэтлэн тӧроез Людмила Королёва вераз.

Соослэн обелискъёс гинэ вал, и соос тӥни уксё бичаса, памятникъёс самообложениен каризы
Людмила Королёва, Алнаш ёросысь «Староутчанское» муниципал кылдытэтлэн тӧроез

Пор Гондыргуртын синпелет вылэ 89 нимъёсты гожтӥзы (51-ез - быремъёслэн но 38-эз – бертэмъёслэн), Варалиын - 68 нимъёсты ( 49-эз - быремъёслэн, 19-эз – бертэмъёслэн).

Мари Гондыревоын, котькуд юртэ списокез сётыса, котькудӥз шонерзэ мед учкоз шуыса, лэзьямы ми, озьы оргкомитетын вераськимы. Нош Варалиын кык-куинь интыын список ошемын вал
Людмила Королёва, Алнаш ёросысь «Староутчанское» муниципал кылдытэтлэн тӧроез

Синпелетъёсты гуртъёс шоры ик пуктӥзы. Тулыс, нош ик вань калыкен люкаськыса, котыразы сяськаос мерттозы на.

Пор Гондыгуртын синпелет пуктон ужъёс оглом 140 сюрс манет тыр усизы, со пӧлысь 35 сюрс манетсэ гуртоос люказы, 105 сюрс манетэз элькун коньдэтысь субсидия чотын вуиз. Варалиын 222 сюрс манет пӧлысь 55 сюрс 500 манетсэ гуртын улӥсьёс бичазы, кылемзэ улосвыл коньдэт висъяз

Тодэ вайытом, озьы ик калык юрттэмен туэ гужем Можга ёросысь Гозег гуртын Быдӟым Атыкай ожын быремъёслы синпелетэз усьтӥзы

Сюмсиысь Кира Глызина «Сказочное путешествие» проектэныз «Живая классика» фондлэн Мерлыко ӵектосъёсъя школаяз вормисе потӥз. Со сярысь фондлэн пресс-службаез ивортӥз.

Куинь толэзь ӵоже Россилэн пӧртэм улосвылъёсысьтыз пиналъёс мерлыко но ужбергатон ӵектосъёс кылдытыны дышетскизы. 100 ужъёс пӧлысь экспертъёс 25 устооссэ бырйизы. 10-тӥ коньывуонэ меӵак эфирын дышетскисьёс асьсэлэсь ӵектосъёссэс утизы.

Кира Глызина «Сказочное путешествие» ӵектосэныз тодматӥз. Сюмсиысь школаын тазалыксыя сюбегатэм луонлыкъёсын 35 пиналъёс дышетско шуыса вераз. Солэн малпамезъя, аспӧртэм нылпиослэн огшоры улоназы театрализация амалъёсты кутыса, соос обществое ӝоггес пырыны быгатозы.

Ӵектос тазалыксыя сюбегатэм луонлыкъёсын пиналъёслы ас ёзъёсынызы кусып возьыны быгатонлыкъёс кылдытыны, юанъёсты шонер валаны но соослы валэктонъёс вераны луонлык сётӥз, занятиосын пӧртэм ужъёсты быдэсъямен, жадён ӧжытгес луиз. Ваньмыз дышетскисьёс усьтӥськизы, эрикогес, вераськисьгес луизы. Выжыкылъёсты вераны но соосты возьматыны дышизы
Кира Глызина, Сюмси школаын дышетскись

Вожвылъяськонын вормемез понна нылаш «Артек» лагере путёвка басьтоз.

Тодэ вайытом, Можгаысь егитъёслэн «Заповедник» калык театрзы Москваын любительской коллективъёслэн «Культура – это мы» огъяросси фестивалязы-конкурсазы I степенё диплом утӥз

Ижкарын ньыль юртъёс вылын буре ваён пулъёс усьтозы. Со сярысь кар администрацилэн пресс-службаез ивортӥз.

Нылпи творчествоя юрт борды ватсаса-тодон валан сётонъя ужъюртлэсь азьвыл кивалтӥсьсэ - Удмуртиысь калык дышетӥсез, элькунысь дышетон удысысь дано ужасез - Юрий Машенинэз буре ваён пул шуккозы.

Надежда Курченкоез 91 номеро школаын буре ваёзы. Мемориал пул усьтэм сяна, дышетсконнилэн коллективез куремъя, школалы бортпроводницалэсь нимзэ сётозы.

Столичной лицейлэн борддор бордаз Совето Союзлэн Героезлы Евгений Кунгурцевлы сӥзем пул юнматозы.

Гагарин нимо ульчаысь 37 номеро юрт вылын бигер кылбурчиез но журналистэз Ринат Баттловез буре ваён пул кылдоз. Со та юртын 20 арлэсь кема улӥз.

Тодэ вайытом, Удмуртиын 10 нимо-дано удмуртъёслы буре ваён пулъёс усьтыны малпало

Россиысь тодосъя академилэн Урал ёзэтысьтыз Эскеронъёсъя удмурт федерал центрлэн Историяя, кылъя но литературая удмурт институтысьтыз тодосъя ӧнерчиос 1941-1945 аръёсы Быдӟым Атыкай ожын Вормонлы 75 ар тырмонлы сӥзьыса монография поттӥзы. Со сярысь ужъюртлэн пресс-службаез ивортӥз.

Книгалэн авторез – истори тодосъя кандидат, Удмуртиысь тодос удысысь дано ужась Николай Родионов, тодосъя редакторез – Центрлэн кивалтӥсез воштӥсез, истори тодосъя доктор Людмила Бехтерева

Архивысь ужкагазъёс, кунысьтымы но кунгож сьӧрысь авторъёсын поттэм ужъёс, Историяя, кылъя но литературая удмурт институтысь тодосъя ӧнерчиослэн эскеронъёссы вылын нырысьсэ туж мур возьматэмын, кыӵе инты басьтӥз Удмуртия Быдӟым Вормонын.

Тодосчиос азьын ужась луэменыз но ассэ жалятэк тыршеменыз, Шаерзэ яратэменыз асьмелы тупа улон но эрик ваем калыклэн подвигез сярысь тодэ ваёнэз утён ужпум сылӥз.

Тодэ вайытом, азьвылгес Ижкарын «Книга года на родине П. И. Чайковского» улосвылкуспо фестивальын-вожвылъяськонын вормисьёсты пусйизы

Наверх
Вниз