100 лет государственности Удмуртии
Ижкар+12 °C
1 -тӥ инвожо 2020 Вордӥськон
16+

Александр Бречаловен Удмуртилэн тӧроелэсь ужзэ огдырлы быдэсъясен сямен тодматӥзы

  • 354
  • 0
Ижкар / Удмуртия
Александр Бречаловен Удмуртилэн тӧроелэсь ужзэ огдырлы быдэсъясен сямен тодматӥзы
Фото: ИА "Удмуртия"

Удмуртиысь кивалтэтлэсь ёзчиоссэ но Кун Кенешысь депутатъёсты улосвыл тӧролэсь ужзэ огдырлы быдэсъясен Александр Бречаловен тодматӥзы. Выль кивалтӥсен нимлыко пумиськон кивалтэтлэн юртаз 5-тӥ оштолэзе ортчиз. Александр Бречаловен тодматӥз Росси азьмуртлэн Приволжск федерал округъя ужоскето муртэз Михаил Бабич.

«Гажано ужъюлтошъёс, толон Удмуртилэсь тӧрозэ отставкае келязы <…>. Александр Соловьёвез кӧня ке пол алылӥзы, но со номыр ӧз вала. Тӧролэн рйтингез ог 23 процентлы усиз. Удмурт Элькунлэн кун пунэмез йылӥз. Со ас табышлэсь 96 процентэз луэ. Росси Федерациысь коньдон ужпумъёсъя министерствоен тупанкылъя таяз арын азьвыл чакламтэ радлыкъя 14 миллиард 700 миллион манетэз ворсаны кулэ», — пусйиз Михаил Бабич.

Озьы ик со вераз, 2017-тӥ арын Удмуртиын элькунлы тӧроез быръёнъёс ортчозы шуыса. Соин ик «со быръён кампаниез умоен ортчыны» кулэ.

«Азьмуртлэн пуктэмезъя, монэ Удмурт Элькунлэн тӧроезлэсь ужзэ огдырлы быдэсъясе юнматӥзы. Со бадӟым вызов. Сое ӵошен, командаен гинэ вормыны луоз. Мон туж оскисько, асьмеос команда луомы шуыса. Удмуртия — аспӧртэм но тунсыко элькун, бадӟым луонлыкен, быдӟым историен но лулчеберетэн. Валтӥсь ужпум — азьмуртлэсь куартолэзе шараям куронъёссэ быдэстон. Ваньмыз соос улонэз умойгес карон вылысь пуктэмын. Солы ми саклык висъялом», — вераз Александр Бречалов.

Нялтас вераса, пумиськонын вал Ижкарысь но Удмуртиысь Викторин митрополит, озьы ик улосвылысь валтӥсь муфтий Фаиз-хазрат Мухамедшин.

Тодэ вайытом, Александр Бречаловез интыуже юнматон сярысь пуктэтэз Россилэн азьмуртэз Владимир Путин 4-тӥ оштолэзе кутӥз.

Александр Бречалов улосвылэн кивалтоз быръёнъёс дорозь, соос куарусёнэ кура сётонъя огъя нуналэ ортчозы.

ВАТСАН

Александр Владимирович Бречалов вордӥськиз 1973-тӥ арын 18-тӥ шуркынмонэ Адыгея автономной улосвылысь Тлюстенхабль каргуртын.

1994-тӥ арын Краснодарысь армилэн генералэз Сергей Матвеевич Штеменко нимо вылӥ ожгар училищеез (ожгар институт) горд дипломен йылпумъяз.

1999-тӥ арын Москваысь Олег Емельянович Кутафин нимо кун юридик академиез йылпумъяз.

1994–1996-тӥ аръёсы — Чкаловской гарнизонысь режимъя ёзэсэныз кивалтӥсьлэн воштӥсез (нимысьтыз ужъёсъя авиационной дивизия).

1996–1999-тӥ аръёсы — «ТВ-6 Москва» акционер огазеяськонын юрисконсульт.

1999–2000-тӥ аръёсы — «Альфа-Банк» акционер огазеяськонын юрисконсульт.

2001–2002-тӥ аръёсы — «Юниаструм Банк» (ООО) коммерци банклэн юридик ёзэтэн кивалтӥсез.

2002–2003-тӥ аръёсы — «Юниаструм Банк» (ООО) коммерци банклэн юридик департаментэзлэн кивалтӥсез.

2003–2006-тӥ аръёсы — «Юниаструм Консалтинг» огазеяськонлэн кивалтӥсез.

2006–2013-тӥ аръёсы — «ВБО Консалт» огазеяськонлэн президентэз.

2007–2014-тӥ аръёсы — «Юниаструм Банк» (ООО) коммерци банклэн Кивалтӥсёсызлэн кенешсылэн ёзчиез.

2012–2014-тӥ аръёсы — пичи, но шор ужбергатонъя «Опора России» Росси мер огазеяськонлэн президентэз.

2014-тӥ арын — пичи, но шор ужбергатонъя «Опора России» Росси мер огазеяськонлэн нырысетӥ вице-президентэз.

Мер удысын ужамез:

2009-тӥ арысен — пичи, но шор ужбергатонлы юрттэт сётон амалъёс сярысь ивортодэт вӧлмытӥсь, но ужбергатӥсьёс понна «Бизнес-Успех» Росси конкурс ортчытӥсь «Опора кредит» медиа-холдинглэн учредителез.

2013-тӥ арысен — Росси калык фронтлэн шор штабезлэн ёзчиез.

2013-тӥ арысен — Росси калык фронтлэн шор штабезлэн одӥгез тӧроез.

2014-тӥ арысен — Калыклэсь мылкыдъёссэ тодон-эскеронъя Росси центрлэн (ВЦИОМ) кивалтӥсьёсызлэн кенешезлэн ёзчиез.

2014-тӥ арысен — Росси Федерациысь Мер палаталэн секретарез.

2015-тӥ арысен — коррупцилы пумитъяськонъя Росси Федерацилэн Азьмуртэз бордын ужась кенешлэн ёзчиез.

2016-тӥ арысен — азинскон стратегияя, но валтӥсь ӵектосъёсъя Росси Федерацилэн Азьмуртэз бордын ужась кенешлэн ёзчиез.

2017-тӥ арысен — Россиысь Триатлонъя федерацилэн (ФТР) попечительской кенешезлэн тӧроез.



Наверх
Вниз