100 лет государственности Удмуртии
Ижкар+17 °C
5 -тӥ инвожо 2020 Удмуртарня
16+

Владимир Путин Ижкаре вуиз

  • 462
  • 0
Ижкар / Удмуртия
Владимир Путин Ижкаре вуиз
Туспуктэм: KREMLIN.RU

Владимир Путин Удмуртие укмысэтӥ ползэ вуиз. Таяз радэ Россилэн азьмуртэз кык предприятиосы вуылыны чакла — «Калашников» концернэ но Ижысь электромеханикая «Купол» заводэ. Нырысетияз кунлэн тӧроез Россиысь машиностроительёслэн огазеяськонзылэн бюроезлэн но Обороная предприятиослы юрттонъя лигалэн кенешоназы пыриськоз, тодосъя но техникая конкурсъёсын но ӵошатсконъёсын вормем егит ӧнерчиосын но дышетскисьёсын пумиськоз. «Куполын» ожгар но граждан вузъёсты поттон технологиен тодматскоз.

18:35 - нырысь ик Владимир Путин Ижкарысь Чапаев проездын куашкан калэ вуэм юртын улӥсьёсын пумиськиз. Отчы мынӥз Удмуртилэн тӧроезлэсь ужзэ огдырлы быдэсъясь Александр Бречалов но.

Кунлэн азьмуртэз тужгес кулэяськись 11 семьяосты 2017-тӥ ар пумозь выль интые поттыны куриз. Александр Бречаловлэн верамезъя, улосвыл программа улсын ужез 2018-тӥ арысен кутскыны малпало.

kremlin.ru

«Толшорозь ми программаез дасяломы, 2018-тӥ арын кутскыса, калыкез куашкан калэ юртъёсысь выжтомы. Татын артэ куинь баракъёс, нош ваньмыз соос дас сизьым. Улон инты нырысь ик сётэмын луоз тужгес кулэяськись дас одӥг семьяослы, кытын нылпиос вань», - вераз Александр Бречалов. 

Нялтас вераса, «меӵак линия» дыръя Владимир Путинлы лукырес коркаез сярысь верам Анастасиялэн 27-тӥ инвожое вордӥськем нуналэз. Кун кивалтӥсь егит кышномуртлы сяськаос но вить муртлы Сочие путёвка кузьмаз.

life.ru

Отысен Россилэн азьмуртэз «Калашников» концернэ мынӥз. 

19:16 - предприятиын Россиысь машиностроительёслэн огазеяськонзылэн но Обороная предприятиослы юрттонъя лигалэн кенешонзы ортче:

«Оборонно-промышленной огъетын вузъёслэсь пӧртэмлыксэс паськытатыны кулэ, та удысэ инвестициослэсь быдӟалазэс будэтоно, со пӧлын кун но ужбергатон ласянь валче вылысь. Эшшо одӥг пол верало – промышленностья но вузкаронъя министерство та ужез кутскиз ни, со ас радлыкезъя мынэ но емышъёс сётэ, но оборонкалэн кужымез тросгес лэсьтыны быгатэ <…>. Солы бадӟымгес саклык висъяны эшшо одӥг пол курисько. Валтӥсь предприятиос пыр гинэ ӧвӧл, тӥляд смежникъёсты, тӥляд партнёръёсты пыр. Соосты егит адямиосын ужаны ӝуткано. Вузъёсын гинэ ӧвӧл, бадӟым классъёсын дышетскисьёсын но. Егитъёслы кулэ усьтӥськон, валче ужаны дасьлык. Со ӧнер бырйыны юрттэ. Кадръёсъя сыӵе шонер политикаез ми, тӥ азьланяз но нуомы. Тодэ вайытом, кунмы World Skills калыккуспо огазеяськон борды итӥськиз, солэн ужпумез – рабочий ӧнеръёслэсь данзэс будэтон, вылӥ кабесъёсты (стандартъёсты) пыӵатон. Машиностроительной предприятиос отчы мыло-кыдогес пыриськыны кулэ», - вераз Владимир Путин. 

Кенешонын Россилэн азьмуртэз кунысь машиностроительной огъетлы юрттонэз азьланьтыны оскытӥз, ивортэ «Интерфакс».

«Кунысь машиностроительёслы юрттыны ми дась, со кӧня ке кун программаосъя мыноз, коньдэтысь шӧдскымон юрттэт висъяломы», - пусйиз Владимир Путин.  

Владимир Путин Ижкарын: «Калашников» концерн

4 фото

19:40 Ростех кун корпорацилэн кивалтӥсез Сергей Чемезов оборнно-промышленной предприятиосын ужасьёсты «выльдон» сярысь вераз.

«Кылсярысь, «Калашников» концернын. Шоро-куспо арлыд 45-36 арес. Егитъёсты кысконын бадӟым инты басьтэ уждунлэн быдӟалаез. Ми асьме предприятиосын солэсь быдӟалазэ ялан будэтӥськомы. Кылем арын шорлыдын 44 сюрс манет пала вал. Промышленность понна со бадӟым шуыны луэ». 

«Промышленностез азинтонын нырысетӥ интые потэ частной акционеръёсты но технологиосъя партнёръёсты кыскон. Туннэ кема дыр ӵоже инвестициос висъяны дась компаниос, нимаз ужбергатӥсьёс вань. Соослы со тунсыко. Вылӥ технологиосъя ужась удысъёсын вакчи дыр ӵоже табыш басьтыны, понэм коньдонзэс ӝог берыктыны уг луы ке но. <…> Кылсярысь эшшо одӥгзэ вераны луэ – «Калашников» концерн, кытын Ростехнологиосын ӵош акционеръёс луо Андрей Бокарев но Алексей Криворучко. «Калашников» концернлэсь акциоссэ нимаз адямиослы сётон компанилы будыны ватсаса луонлыкъёс кылдытӥз. Кылем арын ваньбур поттонъя вить выль объектъёс усьтэмын вал, ваньзы соос табыш ваё. Милемлы тунсыко кунгож сьӧрысь но партнёръёсын ужаны. Сыӵе учыръёс трос…», - пусйиз Сергей Чемезов. 

20:00 - Владимир Путин «Калашников» концернысь егит ӧнерчиосын но тодосъя но техникая конкурсъёсын но ӵошатсконъёсын вормем дышетскисьёсын пумиськиз. 

kremlin.ru

Обороная концерн улосвылын дышетонъя кластер кылдытыны чакла, со предприятилы ужасьёсты школаысен ик дасяны кутскыны луонлык сётоз. Со ужпумез быдэстон понна 27-тӥ инвожое Удмуртилэн кивалтэтэз, «Кванториум» нылпи технопаркъёслэн сӧзнэтсы но «Калашников» концерн валче ужан сярысь тупанкыл юнматӥзы. Россилэн азьмуртэз Владимир Путин азьын кинюртэмъёссэс пуктӥзы Удмуртилэн тӧроезлэсь ужзэ огдырлы быдэсъясь Александр Бречалов, «Калашников» концернлэн кивалтӥсез Алексей Криворучко но «Кванториум» нылпи технопаркъёслэн сӧзнэтсылэн Россиысь федерал операторзылэн – Дышетонэз азинтонъя выль амалъёсъя фондлэн кивалтӥсез Марина Ракова. 

kremlin.ru

20:30 – «Калашников» концерн бере Владимир Путин Ижысь электромеханикая «Купол» заводэ вуылыны малпа. 

21:50 – Владимир Путин Ижкарысь электромеханикая «Купол» заводэ вуиз, отын ожгар удыслы выль продукциез но кунгож сьӧры вузаны чаклам инноваци граждан вузъёсты учкиз. Со сяна, кун кивалтӥсь заводын ужасьёсын вераськиз но предприятилэн кылдэм дырысеныз 60 ар тырмонэн ӟечкылаз. 

Владимир Путин Ижкарысь «Купол» заводын

7 фото



Наверх
Вниз