ЦИК: Владимир Путин Удмуртиын 76 процентлэсь трос куараосты люка

Удмуртиысь Быръёнъёсъя валтӥсь ӧрилэн нырысь-валысь йылпумъянъёсызъя, Россилы азьмуртэз быръёнъёсын элькунамы Владимир Путинлы дурбасьтӥз 571 сюрс 600 адями яке 76,23 процентэз куара сётыны лыктэм бырйисьёс.

Кунлэн али кивалтӥсезлы дурбасьтӥсьёс тужгес трос пусъемын Шаркан (83,79 процент), Юкаменск (82,49 процент) но Вавож (80,88 процент) ёросъёсын. Со понна тужгес ӧжыт куара люкамын Камбарка ёросын (69,43 процент), Можгаын (69,75 процент) но Глазкарын (70,99 процент).

Удмуртиын кыкетӥ инты басьтэ Павел Грудинин (11,33 процент), куинетӥ — Владимир Жириновский (6,78 процент). Мукетъёсыз кандидатъёс 2 процентлэсь ӧжыт куара люказы: Ксения Собчак — 1,54, Борис Титов — 0,83, Максим Сурайкин — 0,71, Григорий Явлинский — 0,69, Сергей Бабурин — 0,66 процент.

Нырысь-валысь чотанъёсъя Удмуртиын куара сётонэ 63,23 процентэз бырйисьёс пыриськизы.

Оглом кунын 99,81 процентсэ бюллетеньёсты эскерем бере Владимир Путин 76,67 процент куараосты люказ (56 миллион 179 сюрс адями). Кыкетӥ инты басьтэ Павел Грудинин (11, 79 процент), куинетӥ — Владимир Жириновский (6,66 процент).