Ижкар+2 °C
27 -тӥ коньывуон 2020 Пуксён
18+

Ижкарлы тӧрое Олег Бекмеметьевез бырйизы

  • 460
  • 0
Ижкар / Удмуртия
Ижкарлы тӧрое Олег Бекмеметьевез бырйизы
Туспуктэм: Григорий Фомин

Ижкарлэн тӧроез луиз азьвыл Глазкарлэн кивалтӥсез 50 аресъем Олег Бекмеметьев. 18-тӥ коньывуонэ Удмуртилэн шоркарезлы тӧрое сое бырйизы Кар думаысь депутатъёс азьвыл чакламтэ сессиязы.

Олег Бекмеметьев понна куаразэс сётӥзы 37 депутатъёс. Виктор Шестаковлы 1 адями дурбасьтӥз. Куара сётонэ ваньмыз 38 депутат пыриськиз. 

Ижкарлэн выль тӧроез ужоскетъёссэ ӵуказеысен, 19-тӥ коньывуонысен, быдэсъяны кутскоз. 

ВАТСАН

Олег Николаевич Бекмеметьев 3-тӥ южтолэзе 1968-тӥ арын Глазкарын вордскиз. Ижкарысь механикая кун институтэз («Инженер-технолог» ӧнеръя) но Кунсьӧр вузкаронъя огъяросси академиез («Англи кылэз тодонэн дунне экономика» ӧнеръя) йылпумъяз. 1986-1988 аръёсы ракетной войскоосын служба нуиз, 1993-2015 аръёсы Механикая чупчи заводын (инженер-технологысен кивалтӥсез воштӥсёзь) ужаз. 2015-тӥ арын куарусёнэ Глазкарлэн кивалтӥсез интые быръемын.

Тодэ вайытом, Удмуртилэн шоркарезлы кивалтӥсе кандидатъёсты быръёнъя конкурслэн ӧриез 19 ӵектэм муртъёс пӧлысь 15-тӥ коньывуонэ кык адямиез пусйизз, соосты депутатъёслы куара сётон понна дэмалалозы. Вожвылъяськонын тужгес трос балл (592) люказ Глазкарлэн тӧроез Олег Бекмеметьев, собере 535 баллэн мынэ Сарапуллэн администрациезлэн тӧроезлэн мерлыко удысъя воштӥсез Виктор Шестаков.

20-тӥ гудырикошконэ Ижкарлэн Кар Думаез Удмуртилэн шоркарезлы выль тӧро бырйыны ӧз быгаты. Соку Константин Сунцов понна 17 депутатъёс куара сётӥзы, Михаил Черемных понна – 10, эшшо куатез бюллетеньёс ярантэм луизы. Вормисьлы 22 депутатлэсь куаразэ люкано вал.

Пусъём, Константин Сунцовлэсь но Михаил Черемныхлэсь кандидатураоссэс Кар Думалы вожвылъяськон ӧри 10-тӥ гудырикошконэ ӵектӥз. Конкурсэ ваньмыз 13 адями пыриськиз. Константин Сунцов 491 балл люказ, Михаил Черемных – 418 балл.

Ижкар тӧролэн интыужез куартолэзе Юрий Тюрин кошкем бере буш кылиз. Собере муниципалитетлэн кивалтӥсез луон понна вожвылъяськон ялӥзы. Нырысь ик интыуж понна 14 кандидат вожвылъяськыны мылкыд кариз, берлогес одӥгез соос пӧлысь палэнтӥськиз. 



Наверх
Вниз