Ижкар+11 °C
18 -тӥ коньывуон 2021 Вордӥськон
18+

Россиысь пӧртэм кылъёс сярысь кылзонъёс ортчизы Кун Думаын

  • 639
  • 0
Москва / Россия
Россиысь пӧртэм кылъёс сярысь кылзонъёс ортчизы Кун Думаын
Туспуктэм: duma.gov.ru/

29-тӥ коньывуонэ Россиысь Кун Думаын пӧртэм кылъёслы сӥзем парламент кылзонъёс ортчизы («Языковое многообразие Российской Федерации: состояние и перспективы»). Со сярысь «Национальный акцент» портал ивортэ.

Кун Думаысь йӧскалык ужпумъёсъя комитетлэн тӧроез Ильдар Гильмутдинов пусйиз, анай кылъёсты утён ужен ваньмыз вырыны кулэ шуыса.

Анай кылъёсты утёнлэн пайдалыкез со уже кунлэн, оглом обществолэн но котькуд семьялэн нимаз пыриськеменыз герӟаськемын. Озьыен, анай кылъёслы юрттон дышетон, тодос, огъя лулчеберет, ивортодэт вӧлмытон удысъёсын луыны кулэ
Ильдар Гильмутдинов, Кун Думаысь йӧскалык ужпумъёсъя комитетлэн тӧроез

Солэн верамезъя, анай кылъёсты дышетыны но сое уже кутыны мылкыд сётон нылпи садысен кутскыса, Россиысь калыкъёслэн кылъёсынызы вераськисьёс понна лулчеберет продукт кылдытонозь кыстӥськыны кулэ.

Нимысьтыз саклык висъяно дышетон но тодос удысын ужаны ӧнерчиосты дасян сӧзнэтлы. Али асьмелэн нылпи садын кык кылъем нылпиосын ужась визьнодасьёсты дасянъя ӧнер ӧвӧл. Покчи классъёсын анай кылын тодон-валанъёс сётӥсь дышетӥсьлэн ӧнерез ӧвӧл. Йӧскалык кылъёсты дышетон методикая кандидат яке доктор луыны диссертациез утьыны уг луы. Та ӧнеръя сизьым докторъёсты одӥг улосвылысь но ум шедьтэ. Валаны кулэ, уз луэ таӵе ӧнерчиос – уз азинске кылъёс но
Ильдар Гильмутдинов, Кун Думаысь йӧскалык ужпумъёсъя комитетлэн тӧроез

Парламент кылзонъёсын анай кылэз электрон амалэн дышетон сӧзнэтэз пыӵатон, вылӥ дышетсконниослы анай кылъя программаез ортчем абитуриентъёслы баллъёс ватсаны луонлык сётон, пиналъёслэн «Анай кыл» тодметъя бадӟым вормонъёссы понна дышетӥсьёсты пусъён амалъёс, анай кылъёсъя огъяросси олимпиадаосты улӟытон, Россиысь калыкъёслэн йӧскалык литератураоссыя сайт кылдытон, «ӟуч кыл но Россиысь калыкъёслэн кылёссы» программаез паськытатон но мукет ужпумъёсты эскеризы.

Кылонъёслы йылпумъянъёсъя Комитет Россиысь калыкъёслэн кылъёссылы юрттон амалъёсты кутон но быдэстон ласянь ӵектонъёс сётоз.

Ватсалом, Кун Думаын ортчем кылзонъёс улсын Анай кылъёсты утёнъя но дышетонъя фондлэн валтӥсь ужан ӧръёсыз пумысен вераськизы. Тодэ вайытом, Фондэз кылдытон сярысь косэтэз 26-тӥ коньывуонэ Россилэн азьмуртэз Владимир Путин юнматӥз



Наверх
Вниз