Ижкар+2 °C
20 коньывуон 2019 Воскресенье
16+

Вавож ёрослэн тӧроез интые кык кандидатъёсты бырйизы

  • 159
  • 0
Ижкар / Удмуртия
Вавож ёрослэн тӧроез интые кык кандидатъёсты бырйизы
Туспуктэм: Елена Перевощикова

9-тӥ коньывуонэ Удмуртиын Вавож ёрослэн тӧроезлэн интыяз кык кандидатъёс бырйизы. Со сярысь журналистъёслы элькун тӧролэн но кивалтэтлэн администрацизылэн кивалтӥсез Сергей Смирнов вераз.

Вожвылъяськонлэн йылпумъян люкетаз потӥзы Вавож ёрослэн тӧроезлэсь ужзэ огдырлы быдэсъясь, со дырозь ёрос администрацилэн тӧроезлэн нырысетӥ воштӥсез Олег Овчинников, со 337 балл люказ, но «Водзимоньинское» муниципал кылдытэтлэн тӧроез Дмитрий Шихов, солэн 270 балл.

Вавож ёрослы тӧроез интыысь депутатъёс 11-тӥ коньывуонэ ортчоно сессиязы быръёзы

Сергей Смирнов вуоно тӧро азьын бадӟым ужпумъёс сыло шуыса пусйиз.

Вавож ёрослэсь аспӧртэмлыксэс уд ваты – со асьмелэн гурт возёсъя одӥгез тужгес кужмоез ёрос
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Быръем кивалтӥсь гурт возёсэз азинтыны но та удысын ужбергатонлы юрттыны кулэ.

Со сяна, матысь аръёсы ёросын кӧня ке бадӟым элькун ужрадъёс ортчозы – 2020-тӥ арын Гербер но 2021-тӥ арын Тол гурт шудонъёс. Кыкез ик, Сергей Смирнов верамъя, рос-прос дасяськемез кулэ каро.

Озьы ик со вожвылъяськон туж аспӧртэм ортчиз шуыса пусйиз. 8-тӥ коньывуонэ вожвылъяськон ӧрие Вавож ёрослэсь дано кунмуртсэ но Кун Кенешлэсь депутатсэ Владимир Красильниковез пыртыны ӵектӥзы. Озьы кандидатъёсты быръёнэ со но пыриськиз.

Ми вань мылкыдъёсты тодыны кулэ
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Вожвылъяськон ӧрилэн ёзчиосыз кандидатъёслэн программаосынызы тодматскизы, озьы ик конкурсантъёсын быръем быдӟым философъёслэсь басьтэмкылъёссэс (цитата) кылзӥзы.

Вавож ёрос тӧролэн интыез понна вожвылъяськонэ сизьым адями пыриськиз. Муниципал кылдытэтлэн тӧроез Николай Чайников ужысьтыз туж куарусёнэ кошкиз.

Тодэ вайытом, 4-тӥ коньывуонэ Дэри ёросысь депутатъёс ас муниципал кылдытэтсылы тӧроез бырйизы.

Наши партнеры

Наверх
Вниз