Ижкар+20 °C
8 -тӥ гудырикошкон 2020 Кӧснунал
16+

Удмуртилэн тӧроез Россиысь ужъя но мерлыко юрттэт сётонъя министрен пумиськылӥз

  • 252
  • 0
Москва / Удмуртия
Удмуртилэн тӧроез Россиысь ужъя но мерлыко юрттэт сётонъя министрен пумиськылӥз

Удмуртилэн тӧроез Александр Бречалов Москваын Россиысь ужъя но мерлыко юрттэт сётонъя министрен Максим Топилинэн пумиськылӥз. Со сярысь улосвыл тӧролэн но кивалтэтлэн пресс-службазы ивортэ.

Элькунлэн кивалтӥсез Росси азьмуртлэсь Владимир Путинлэсь «куартолэзь косэтъёссэ» Удмуртиын быдэсъян, «Демография» но «Производительность труда» йӧскалык ӵектосъёсъя ужан, калыклэн табышъёсыз, калыкез уже интыян, мерлыко контрактъя кун юрттэт сётон сярысь вераз.

Александр Бречаловлэн кылъёсызъя, 2018-тӥ арын элькунын улӥсьёслэн шоро-куспо уждунзылэн быдӟалаез 31 сюрс 800 манет вал, 2017-тӥ арын сярысь 9,7 процентлы тросгес. Та ласянь Удмуртия Приволжск федерал округын куатетӥ инты басьтэ. 2019-тӥ арын толшор-коньывуон ӵоже шоро-куспо уждун 33 сюрс 400 манет луиз.

Кылем ар кутсконлы 32 огазеяськонъёсын 3 сюрс 6 ужасьёс азьын 121 миллион 100 сюрс манет тыр пунэмъёс вал. 2019-тӥ арын 1-тӥ толшорлы пунэмъёс 57 миллион 300 сюрс манетлы кулэсмизы. 870 адями ужам коньдонзэ басьтӥз.

Со сяна, 2017-тӥ арын толэзь ӵоже улыны тырмымон коньдонлэн быдӟалаезлэсь ӧжыт табыш басьто вал 12,2 процентэз элькунын улӥсьёс яке 185 сюрс 100 адями. 2018-тӥ арын лыдпус 12 процентозь кулэсмиз – 181 сюрс 600 адями. Удмуртилэн тӧроез пусйиз, улосвыл тӧрлыкъёс со возьматэтэз 2024-тӥ арлы 6,1 процентозь кулэстыны ужпум пукто.

Озьы ик пумиськонын мерлыко контрактъя кун юрттэт сётон ужпумез ӝутӥзы.

Мерлыко контракт

Мерлыко контрактъя кун мерлыко юрттэт басьтыны быгато элькунын улӥсь ужано арлыдъем кунмуртъёс, кинлэн табышез толэзьлы тырмымон коньдонлэн быдӟалаезлэсь ӧжытгес луэ. Юрттэт басьтӥсьёс контрактын пусъем ужпумъёсты быдэстыны кыл сёто, со пӧлын уж утчан, ӧнерлы дышетскон, подсобной хозяйствоез азинтон, нимаз ужан, озьы ик мукет ужрадъёс, со пӧлын кудӟытӥсь юонъёслэсь куштӥськон. Мерлыко юрттэт сётонъя ёзэсъёс коньдонэн, мерлыко юрттӥськетэн, нуналмысь кулэ луись вузъёсын, дышетсконэн но уже интыяськонэн юрттыны оскыто. Мерлыко контрактъя одӥг пол 30 сюр манетозь яке толэзьлы быдэ тыриськись 7 сюрс манет котыр пособие сётыны чакламын. Тупанкыл куинь толэзьысен одӥг арозь юнматӥське. 2017-тӥ арысен Удмуртия мерлыко контрактлэн ужпумъёсызлы висъяськись коньдонлэсь быдӟалазэ будэтэ

Кылем арын 6 миллион 200 сюрс манет тыр 240 контрактъёс юнматӥзы. Юрттэт 1 сюрс 80 адями басьтӥз. Мерлыко контрактъя ужрадъёсты быдэстыны 2020-тӥ арын Удмуртия федерал коньдэтысь 200 миллион 860 сюрс манет басьтоз. Элькун 47 миллион 100 сюрс манет висъялоз

Со сяна, Удмуртия 2024-тӥ арлы кунмуртъёслэсь зэмос табышсэс будэтонъя но начар улӥсьёслэсь лыдзэс кык поллы кулэстонъя эскерон вылысь ӵектосъёсы пыриське.

Максим Топилин пичи табышен улӥсьёслы нимысьтыз мерлыко юрттэт сётон ласянь Удмуртиысь кивалтӥсьёслэсь ужамзэс умоен пусйиз.

Озьы ик Александр Бречалов трос нылпиё семьяослы транспортлы вытъя 50 процент капчиятон сётон сярысь вераз. Льготникъёслы эмъюмъёс басьтыны 1 миллиард манет висъязы, 2019-тӥ арын сярысь со 313 миллион манетлы тросгес. 1-тӥ южтолэзьысен трос нылпиё вань семьяосысь пиналъёс дышетскон нуналэ одӥг пол дунтэк сиён басьтозы. Та дыре сыӵе луонлыксы начар улӥсь трос нылпиё семьяосысь пиналъёслэн гинэ вань. Со сяна, трос нылпиё семьялэн табышысьтыз ипотекая тыриськонзэс ворсаны сётэм коньдонэз поттозы. Озьы ватсаса 1 сюрс 100 семьялы мерлыко юрттэт (дунтэк мынон-ветлон, эмъюмъёс) басьтыны быгатоз.  



Наверх
Вниз