Ижкар-3 °C
24 -тӥ тулыспал 2020 Вордӥськон
16+

Школаос пуктон но йӧскалык ӵектосъёсты быдэсъян сярысь вераськизы Удмуртилэн тӧроез но Россиысь просвещениея министр

  • 301
  • 0
Москва / Россия
Школаос пуктон но йӧскалык ӵектосъёсты быдэсъян сярысь вераськизы Удмуртилэн тӧроез но Россиысь просвещениея министр
Туспуктэм: Удмуртиысь тӧролэн но кивалтэтлэн пресс-службазы

Удмуртилэн тӧроез Александр Бречалов но Россиысь просвещениея министр Сергей Кравцов элькунысь дышетон сӧзнэтысь валтӥсь возьматэмъёс но йӧскалык ӵектосъёсты быдэсъян сярысь вераськизы. 12-тӥ тулыспалэ Москваын ортчем пумиськонэ озьы ик улосвыллэсь Кун Думаын депутат Андрей Исаев пыриськиз. Со сярысь Удмуртиысь тӧролэн но кивалтэтлэн пресс-службазы ивортэ.

Александр Бречалов элькун коньдэт чотын быдэсъяськись «Большой ремонт» ӵектослы нимысьтыз саклык висъяз. Со улсын 2019-тӥ арын 198 нылпи садъёсты, 184 школаосты, ватсаса тодон-валан сётонъя 11 юртъёсты тупатъязы, оглом 1 миллиард 300 миллион манет тыр.

Та арлы чакланъёсын – эшшо 23 нылпи садъёсты, 70 школаосты но ватсаса тодон-валан сётонъя 2 юртъёсты тупатъян. Со понна 896 миллион манет висъямын
Александр Бречалов, Удмуртилэн тӧроез

Росси азьмуртэн Владимир Путинэн кичӧлтэм «Демография» йӧскалык ӵектосъя кылем арын Удмуртиын ясли группаосын 28 нылпи садъёс пуктӥзы, куинь аресозь пиналъёслы ватсаса 2 сюрс 205 инты кылдытӥзы.

«Образование» йӧскалык ӵектосъя Ижкарын 825 интылы но Дэри ёросысь Постол черкогуртын 160 интылы школаосты пуктонэз йылпумъязы. Кез каргуртын 500 интылы школаез пуктон ужъёслэн бадӟым люкетсы быдэстэмын ни. Пиналъёслы ӟечлыко ватсаса-тодон валанъёс сётон понна Ижкарын Быгатӥсь нылпиослы улосвыл центрлэсь валтӥсь юртсэ, Калашников академиын кык лабораториос усьтӥзы. «Молодые профессионалы» ӵектослэн грантэзъя Ижкарысь экономикая но технологиосъя колледжын искусство но дизайн ӧръёсъя вить мастерскойёс кылдытӥзы. 23 гурт школаосын спортзалъёсты тупатъязы. Улосвыл азе федерациен пуктэм ужпумъёс быдэстэмын.

Александр Бречаловлэн верамезъя, гурт ёросъёсын мерлыко юртъёслэн тырмымтэенызы герӟаськем ужпумез многофункциональной центръёс пуктыса сэрттыны-пертчыны луысал. Одӥг интые дышетон классъёсты, нылпи садэз, фельдшер-акушер пунктэз, спортлы но лулчеберетлы висъетъёсты огазеяны яра.

Куд-ог интывылъёсты азинтон понна ӵапак комплексной юртъёс пуктыны кулэ шуыса малпаськомы, кылсярысь, «Комплексное развитие сельских территорий» кун программа улсын. Комплексной юртэз пуктон дышетонэз, егитъёслэсь но бадӟымъёслэсь шутэтскон дырзэс радъян ужпумъёсты сэрттыны-пертчыны, калыклы ӟечлыко нырысетӥ эмъюрттэт сётонэз радъяны луонлык кылдытоз
Александр Бречалов, Удмуртилэн тӧроез

Улосвыл тӧролэн сыӵе ӵектонэзлы Андрей Исаев но, Сергей Кравцов но дурбасьтӥзы.

Озьы ик кивалтӥсьёс дышетсконниосын кышкыттэмлыкез радъян но йылпумъян кун аттестациез но огъя кун экзаменэз ортчытон кабинетъёсты радъян сярысь вераськизы. Кенешон бере Александр Бречалов Сергей Кравцовез Удмуртие вуылыны ӧтиз. 

Наши партнеры

Наверх
Вниз