Ижкар+18 °C
9 -тӥ куартолэзь 2021 Воскресенье
18+

Александр Бречалов Удмуртилэн кунлыкезлы 100 ар тырмонлы сӥзем кун приём ортчытӥз

  • 123
  • 0
Ижкар / Удмуртия
Александр Бречалов Удмуртилэн кунлыкезлы 100 ар тырмонлы сӥзем кун приём ортчытӥз
Туспуктэм: vk.com (Александр Бречалов)

6-тӥ шуркынмонэ Калыкъёслэн эшъяськон юртазы Удмуртилэн тӧроез Александр Бречалов Калыкъёслэн огазеяськон нуналзылы но Удмуртилэн кунлыкезлы 100 ар тырмонлы сӥзем кун приём ортчытӥз. Улосвыллэн кивалтӥсез кун данъетъёс сётӥз. Со сярысь элькун тӧролэн но кивалтэтлэн пресс-службазы ивортӥз.

Та праздник арняе асьмеос Росси улосвылъёсысь но пӧртэм кунъёсысь ӟеч но шуныт кылъёс басьтӥськом. Россилэн азьмуртэз Владимир Путин телеграммаяз пусйиз, «асьме улосчиосмы Атыкай музъеммылэн ож историяз умой пытьы кельтӥзы, экономикаез, тодосэз, дышетонэз азинтонэ, трос пӧртэм йӧслыкъем калыкмылэсь историзэ, лулчеберетсэ но лулпуш кылёсбурзэ утёнэ бадӟым ватсэт пыртӥзы» шуыса пусйиз. Гажано эшъёс! Россилэсь сюрессэ но солэсь азинлыксэ Удмуртитэк син азе пуктыны уг луы, озьы вал но вань
Александр Бречалов, Удмуртилэн тӧроез

Александр Бречалов Удмуртилэн Дано кунмуртэз луэмзы сярысь нимысьтыз лентаос Удмуртпотребсоюзлэн кенешезлэн тӧроезлы Рауф Каримовлы но элькунысь Дышетонэз азинтонъя институтлэн кивалтӥсезлы Наталья Судариковалы сётӥз. Озьы ик элькунлэн Дано кунмуртэз Удмуртиысь Вылӥ Судлэн отставкае потэм тӧроез Юрий Суханов луиз. Со сяна, туэ вылӥ элькун данъетэз Кун Кенешлэн тӧроелэн нырысетӥ воштӥсезлы Надежда Михайловалы но тодмо автогонщиклы Владимир Гольцовлы сётӥзы вал ини.

Рауф Каримов тыршемзэ дунъямзы понна тау кариз но сыӵе дано ним басьтон туж бадӟым кылкутон шуыса пусйиз.

Ноку ӧй малпа вал мынэсьтым нуналмысь тыршемме тазьы дунъялозы шуыса. Куке ужаськод, данъет сярысь уд малпаськы, пайдалыкез сярысь. Вормонъёс басьтыны огъя командаен гинэ луэ. Мон вань ӵош ужась эшъёсылы, ужасьёсылы, коопераци огазеяськонъёсын кивалтӥсьёслы тау карисько
Рауф Каримов, Удмуртпотребсоюзлэн кенешезлэн тӧроез

Озьы ик Александр Бречалов Данъян пул вылэ пыртэм кунмуртъёслы но коллективъёсын кивалтӥсьёслы свидетельствоос сётӥз.

Данъян пул вылэ сяме пыӵамъя 50 кунмуртъёслэсь но 13 коллективъёслэсь нимзэс пыртӥзы

Сӥё-дано ужрад улсын залын Удмуртиысь крезьгурчиослэн, соос пӧлын Пётр Чайковскийлэн но, крезьгуръёссы чузъяськизы.

Дуно эшъёс, мон тау карисько тӥледлы тыршемды понна. Азяды секыт но бадӟым ужпумъёс пуктыны уд кышкаське шуыса. Ас тыршеменыды, быгатонлыкъёсыныды бадӟым вормонъёс басьтӥськоды, Удмуртиез кужмогес но чебергес кариськоды
Александр Бречалов, Удмуртилэн тӧроез

Пусъём, ужрад пандемиен сэрен кышкытлыклэсь утиськонъя вань куронъёсты чакласа ортчиз. Ужрадэ вань пыриськисьёс нунал азьвыл коронавируслы тест сётӥзы но висёнзы шараямтэ шуыса ужкагаз басьтӥзы. 



Наверх
Вниз