Ижкар-4 °C
5 -тӥ толсур 2021 Воскресенье
18+

Удмуртиысь школаосын кышкытлыклэсь утиськон ужрадъёсты кужмоятозы

  • 277
  • 0
Ижкар / Удмуртия
Удмуртиысь школаосын кышкытлыклэсь утиськон ужрадъёсты кужмоятозы
Туспуктэм: Григорий Фомин

11-тӥ куартолэзе Казаньысь школаын шукрес учыр бере, Удмуртиысь школаосын но нылпи садъёсын кышкытлыклэсь утиськон ужрадъёсты кужмоятозы. Со сярысь элькун тӧроен Александр Бречаловен ортчытэм оперативной кенешонын улсын вераськизы.

Казаньысь огаз школаын ыбылӥськон усьтэмен сэрен кӧня ке пиналъёс но дышетӥсьсы бырыны сюризы

Удмуртилэн тӧроез Александр Бречалов мур куректэмзэ вераз но элькунамы дышетон ужъюртъёсын кышкыттэмлык понна кылкутӥсь вань службаослы ужрадъёссэс кужмоятыны косӥз.

Росгвардия ыбылӥськон тӥрлык возисьёсты эскерон ужез ас вылаз басьтӥз.

Дышетонъя но тодосъя министр Светлана Болотникова элькун тӧролэн косонэз дышетонъя управлениосын но школаосын, нылпи садъёсын, шор ёзо ӧнер дышетсконниосын, школа-интернатъёсын кивалтӥсьёслы вуттэмын ини шуыса пусйиз.

Классъёсын кивалтӥсьёслы пиналъёслэн чатъёсын гожъяськемзылы но мылкыдъёссылы саклык висъяны косэмын
Светлана Болотникова, Удмуртиысь дышетонъя но тодосъя министр

Дышетон ужъюртъёсын пырон-потон режим кужмоятэмын, ужасьёсын ватсаса инструктаж ортчытэмын, ӝог юрттэт ӧтён кнопкаос, видеокамераос эскеремын луозы. Со сяна, котькуд куинь часлы быдэ школаез но школа котырез кышкытлык вайыны быгатӥсь арбериослы чаклало. 



Наверх
Вниз