Ижкар-4 °C
5 -тӥ толсур 2021 Воскресенье
18+

Сюресъёс вылын пӧйшуръёсын шукрес учыръёс трос луизы Удмуртиын

  • 266
  • 0
Ижкар / Удмуртия
Сюресъёс вылын пӧйшуръёсын шукрес учыръёс трос луизы Удмуртиын
Туспуктэм: Ольга Константинова

Удмуртиын сюресъёс вылын пӧйшуръёсын шукрес учыръёслэн лыдзы йылӥз. Со сярысь «ВКонтакте» мерлыко вотэсысь бамаз элькунысь инкуазь узырлыкъёсъя но инкуазез утёнъя министр Денис Удалов ивортӥз.

Туннэ нуналлы койыкъёсын герӟаськем 82 шукрес учыръёс пусъемын, 67 учырын койыкъёс бырыны сюризы. Шуккиськонын 10 адями вӧсь луиз, соос пӧлын кык нылпиос
Денис Удалов, Удмуртиысь инкуазь узырлыкъёсъя но инкуазез утёнъя министр

Тросэз шукрес учыръёс урамын пеймыт дыръя луо. Соин ик руль бергатӥсьёсты сюресъёс вылын чакласькыны куро. Сюрес вылысь яке сюрес урдсысь койыкез адӟыку, каллен дугдыны, аварийной сигнализациез лэзьыны но сюресэз пӧйшур кошкем бере гинэ азьланьтыны кулэ.

Нош шукрес учыр луиз ини ке, дугдыны кулэ. ГИБДД-ысь ӧнерчиос вуытозь пӧйшурез исаны, котыртӥз ветлыны уг яра, малы ке шуоно вӧсь луэм пӧйшур урдскылӥсь луэ но вӧсь карыны быгатэ. Озьы ик аварийной сигнализациез лэзёно но пус пуктоно, 112 номеръя жингыртоно.

Тодын возёно, пӧйшуръёс кунлэн ваньбурез луо. Соин ик соосты вӧсь карем понна тыриськон чакламын. Машина страховать каремын ке, ыштонэз утет (страховой) компания тыроз. Нош ӧвӧл ке, машиналэн кузёез ачиз 80 сюрс манет тыроно луоз.

Койыкен шуккиськон интыысь пегӟем но сьӧре солэсь шӧйзэ кутэм понна уголовной кылкутон чакламын

Пусъём, сюресъёс вылын койыкъёс потон кышкытлыко интыос «Кыр пӧйшуръёс» пусэн пусъемын. Сыӵе интыосын лыдмет Удмуртиысь инкуазь узырлыкъёсъя но инкуазез утёнъя министерстволэн сайтаз интыямын. 

2020-тӥ арын элькунын кыр пӧйшуръёсын герӟаськем 223 учыр пусйизы. Куинь адями быриз, 20 мурт вӧсь луиз, соос пӧлын ньыль пиналъёс.



Наверх
Вниз