Ижкар+1 °C
30 -тӥ шуркынмон 2021 Пуксён
18+

230 миллион манетлэсь трос коньдонзэс лушказы Удмуртиын улӥсьёслэсь 2021-тӥ арын

  • 435
  • 0
Ижкар / Удмуртия
230 миллион манетлэсь трос коньдонзэс лушказы Удмуртиын улӥсьёслэсь 2021-тӥ арын
Туспуктэм: Руслан Нуриахметов

2021-тӥ арын Удмуртиын улӥсьёслэсь 230 миллион манетлэсь трос коньдонзэс пӧртэм мугъёсын дистанционной амалэн лушказы. Кылем арын та вакытлы ик ыштонъёс 158 миллион манет вал. Со сярысь элькунысь кунпуш ужъёсъя министерстволэн пресс-службаез ивортӥз.

Кунпуш ужъёсъя ёзэсъёсын 2 сюрс 800 адямилэсь куриськонзэс пусйизы. Тросэз вазиськисьёс – шор-куспо арлыдъем муртъёс, 500-лэсь тросэз – пенсионеръёс, 19-эз – быдэ вуымтэос

Тужгес ӵем пумиськылӥсь мугъёс, кудъёсызъя коньдонэз лушказы: катэз тӥяса кредит басьтэмлэсь утиськон понна мукетсэ басьтытон, кинлы ке коньдонэз выжтон. Озьы ик вотэсын вузъёсты басьтон но вузан, банклэсь бонусъёссэ басьтон, биржаын ватсаса коньдон поттон ньӧмен лушкаськонъёс вал.

Удмуртиысь кунпуш ужъёсъя министерство тодэ вайытэ: банк карта вылысьтыды лыдпусъёссэ, пин-кодъёсты, смс-ивортонысь парольёсты нокинлы но вераны уг яра, сое карись адями ассэ банкын ужасен нимаз ке но. Банкъёсын сыӵе юанъёс сётъятэк но тӥ сярысь вань кулэзэ тодо. Коньдондэс счетысьтыды куштӥзы, вылады кредит басьтӥзы шуыса жингыртӥзы ке, эн куалектэ. Картадылэсь баланссэ, кодъёсты но парольёсты юаны кутско ке, вераськонэз соку ик дугдытэ но банклэн ӟырдыт линияз жингыртэ, солэн номерез банк картлэн мышпалаз гожтэмын.

Озьы ик нимысьтыз тодон-валанъёстэк торгъёсы но биржаосы пыриськемлэсь возиськыны куро. Коньдондэс тодмотэм счетъёсы келямлэсь азьвыл, ӧнерчиосын кенеше, со фирма яке биржа сярысь тросгес тодыны тырше.

Йыртэмасьёс киулэ шедиды ке, 02 (мобильнойысь – 102) телефон номеръя полицие жингыртэ яке матысь ёзэтэ вазиське. 



Наверх
Вниз