Ижкар-12 °C
28 -тӥ тулыспал 2021 Воскресенье
18+

Шуэрес югдурез куштӥзы Ижкарысь Удмуртской урамысь юртлэн кык секциосысьтыз

  • 415
  • 0
Ижкар / Удмуртия
Шуэрес югдурез куштӥзы Ижкарысь Удмуртской урамысь юртлэн кык секциосысьтыз
Туспуктэм: Николай Кузнецов

Туннэ, 2-тӥ южтолэзе, Ижкарысь Удмуртской урамысь 261 номеро изъянмем юртлэн 4-тӥ но 6-тӥ секциосыз вылысь шуэрес югдур куштэмын. Со сярысь Удмуртилэн шоркарезлэн администрациезлэн пресс-службаез ивортэ. Улӥсьёс патеръёсазы ӵуказе, 3-тӥ южтолэзе, 9 час ӵукнаысен пырыны кутскозы.

Ижкар администрацилэн кивалтӥсезлэн ЖКХ ужпумъёсъя воштӥсез Сергей Чернышев верамъя, патеръёсы пӧсь но кезьыт ву, шуныт, электричество лэземын ни, лифтъёсты эскерон мынэ. Нош чагыр эстӥськонэз тупен-тупен лэзёзы.

Чагыр эстӥськон газовой службаысь ӧнерчиос котькуд патерез эскерем бере гинэ сётӥськоз. Соин ик котькуд улӥсез ми куриськом кӧснуналэ газовикъёсты патеръёсазы лэзьыны
Сергей Чернышев, Ижкар администрацилэн кивалтӥсезлэн ЖКХ ужпумъёсъя воштӥсез

Тодэ вайытом, азьвылгес техникая эскеронъёслэсь йылпумъянъёссэс шараязы. Соосъя, юртлэн быдэс кылем секциосаз улон кышкыттэмлыко шуыса ялэмын.

Удмуртской урамысь юрт 9-тӥ шуркынмонэ 2017-тӥ арын изъянмиз. Следствие малпамъя, шимучыр одӥгез отын улӥсь сэрен кылдӥз. Чагыр эстӥськон пуштэмен коркалэн 5-тӥ секциез куашказ, 7 адями быриз.

Тужгес но зол изъянмем 5-тӥ секциез сэрттӥзы. 4-тӥ но 6-тӥ подъездъёслэсь конструкциоссы юнматэмын вал, кыре кылем борддоръёсты шуныттӥзы. Отчы улӥсьёс 3-тӥ южтолэзе берытскыны кутскозы. 1-3-тӥ подъездъёсты ӧнерчиос улыны ярамонэсь шуизы, соос вылысь шуэрес югдурез 26-тӥ толсуре куштӥзы. Улӥсьёс 27-тӥ толсурысен доразы берытскыны кутскизы.

Куашкам но сэрттэм витетӥ подъездын улӥсьёслы улон инты басьтыны сертификатъёс сётыны кулэ.



Наверх
Вниз