Ижкар+17 °C
21 -тӥ инвожо 2021 Вордӥськон
18+

Удмуртиын боеприпасъёс пуштон учырез ожгар следовательёс эскерозы

  • 506
  • 0
Пугачёво / Удмуртия
Удмуртиын боеприпасъёс пуштон учырез ожгар следовательёс эскерозы

Россиысь Следствиосъя комитетлэн Ижкар гарнизонъя ожгар следствиосъя ёзэт 16-тӥ куартолэзе азьвыл 86696 номеро ожгар частьлэн интывылаз боеприпасъёс пуштон учыръя доследственной эскеронъёс кутскиз. Со сярысь ивортэ Россиысь Следствиосъя комитетлэн Ожгар следствиосъя валтӥсь управлениез.

Следовательёс тылпу кысонэз йылпумъям бере ик шимучыр интыез эскерон борды басьтӥськыны дась. Следствилэсь азьвыл эскеронъёсъя процессульной пумкылъян кутозы.

86696 номеро ожгар часть 2011-тӥ арын отын тылпу потэм но боеприпасъёс пуштылэм бере быдтэмын вал. Пуштымтэ снарядъёсты утялтон ужез коммерци огазеяськон ортчытэ, со али но йылаз-пумаз вуттымтэ на. Ужез быдэстэм бере музъемез интыысь тӧрлык ёзэсъёслы сётозы.

Нырысь-валысь ивортонъёсъя, тылпуын но боеприпасъёс пуштон сэрен быремъёс ӧвӧл, юртъёс изъянмон учыръёс озьы ик пусйымтэ.

Ватсалом, азьвыл ожгар частьын кылем боеприпасъёсты быдтонъя предприятилэн, «НПФ специальные технологии» огазеяськонлэн, кивалтӥсез Сергей Михальчук журналистъёслы вераз, боперипасъёсты утялтон 5–7 ар кыстӥськоз на шуыса.

Тодэ вайытом, Пугачёво черкогуртысь азьвыл ожгар частьлэн интывылаз тылпу кысэмын. Нуназе 16-тӥ куартолэзе кӧс турын ӝуаны кутскемен пуштытымтэ снарядъёс «улӟизы». Шимучыр турынэз куронъёсты тӥяса сутэмен сэрен кылдыны быгатӥз. Ожгар городоклэн интывылаз шуэрес югдуръя режим ялэмын.



Наверх
Вниз