Ижкар-13 °C
28 -тӥ тулыспал 2021 Воскресенье
18+

Удмуртиысь Вылӥ суд Ижкарын корка пуштон учыръя уголовной ужез эскерыны кутскиз

  • 437
  • 0
Ижкар / Удмуртия
Удмуртиысь Вылӥ суд Ижкарын корка пуштон учыръя уголовной ужез эскерыны кутскиз
Туспуктэм: Удмуртиысь судъясьёслэн дэменлыксылэн пресс-службаез

Удмуртиысь Вылӥ суд чагыр эстӥськон пуштэмен сэрен Ижкарысь Удмурт урамысь 261 номеро юртлэн подъездэз куашкан учыръя уголовной ужез эскерыны кутскиз. Со сярысь ивортэ элькунысь судъясьёслэн дэменлыксылэн пресс-службаез.

Туннэ, 8-тӥ коньывуонэ, судлэн нырысетӥ кенешонэз ортчиз. Янгыше уськытӥське 27 аресъем воргорон. Шугадӟонэ шедемен уголовной ужъя 459 адями лыдъяське. Ужъя материалъёс 60 томе люкамын.

Александр Копытов трос калыклы кышкытлык ваись амалэн адямиосты быдтэмен но муртлэсь ваньбурзэ быдтэмен яке изъянтэмен янгыше уськытӥське.

Воргорон психолого-психиатрической эскеронъёсы келямын. Соку шараяськиз, Копытовлэн психичиской висёнэз вань шуыса. Озьы йылпумъян лэсьтэмын, со аслыз но, мукет адямиослы но кышкытлык вайыны быгатэ, соин ик кун ласянь янгыше уськытӥсь Копытовез кужмысь эмъяны лэзьыны ӵектэ.

Психической висёнэныз сэрен катэн чаклам эрикрадъёссэ быдэсъяны быгатымтэеныз валче, суд уголовной ужез ачизтэк эскерыны пуктӥз.  

Тодэ вайытом, следствие тодӥз, 2017-тӥ арын 9-тӥ шуркынмонэ лымшор котырын Копытов газ плиталэсь гумызэ ишкалтӥз но дорысьтыз кошкиз. Вить час ортчыса, ужась холодильникысь тылгизьы люкаськем газэз пуштытӥз.

Шуэрес учыр сэрен укмыс этажъем коркалэн одӥгез подъездэз куашказ. Отын 7 адями быризы, пӧлазы 2 нылпиос. Эшшо 11 мурт сӧсырмыны шедиз.

Янгыше уськытэм адямиез мукет нуналаз ӝегатӥзы. Психической висёнзэ шараям бере, сое следствиосъя изоляторысь эмъюртэ выжтӥзы.

Уголовной ужъя кенешонъёс судын нуналлы быдэ сямен ортчылозы.



Наверх
Вниз