Ижкар-13 °C
28 -тӥ тулыспал 2021 Воскресенье
18+

Выль ар азьын «Ель» операция улсын Удмуртиын 360 рейдъёс ортчытӥзы. Катэз тӥяса нюлэсэз коран 16 учыръёсты шараямын, ыштон 1 миллион 500 сюрс манетлэсь трос луиз. Вань материалъёсты эрикрадэз утись ёзэсъёсы келязы. Со сярысь элькунысь инкуазь узырлыкъёсъя но инкуазез утёнъя министерстволэн пресс-службаез ивортӥз.

Со сяна, Дэбес ёросыст гурт возёс ужъёслы чаклам музъемъёс вылын катэз тӥяса выль ар кызъёсты дасян вить учыръёсты шараязы. Эскеронъёс ортчытон вылысь ивортонэз ёрос администрацие лэзизы.

Тодэ вайытом, «Ель» операция Удмуртиын 16-тӥ шуркынмонэ кутскиз но 1-тӥ толшорозь мыноз. Министерствоысь ӧнерчиос эрикрадэз утись ёзэсъёсын ӵош нюлэсъёсты 172 маршрутъёсъя чаклало. Выль ар кызъёсты нуллӥсь транспортэз эскерон понна 25 постъёс кылдытэмын.

Выль арлы матэгес кызъёсын вузкарон интыосты чакланы кутскозы

Писпуэз катэз тӥяса корам понна административной штрафъёслэн быдӟалазы:

- нимаз адямиос понна – 4 сюрсысен 5 сюрс манетозь;
- нимаз ужбергатӥсьёс понна – 40 сюрсысен 50 сюрс манетозь;
- юридик огазеяськонъёс понна – 300 сюрсысен 500 сюрс манетозь.

Ыштонлэн быдӟалаез 5 сюрс манетлэсь трос луиз ке, катэз тӥясез уголовной кылкутон улэ кыскозы.

Пусъём, катэз тӥяса корам писпуосты басьтон, возён, нуллон яке вузан понна 5 сюрсысен 700 сюрс манетозь штраф чакламын.

Нюлэс катрадлыкез тӥям сярысь котькуд адями министерстволэн 56-93-60 меӵак номераз жингыртыны быгатэ.

Тодэ вайытом, Удмуртиын МЧС-ын веразы, тылпулэсь утиськон ласянь Выль арлы кыӵе кызэз пуктыны кышкыттэмгес луоз. 

14-тӥ коньывуонэ Дэри ёрос суд Удмуртилэсь азьвыл тӧрозэ Александр Соловьёвез 10 арлы чурыт режимен ужась колоние пытсэт сьӧры келяны но 275 миллион манет штраф тырыны пукыл кутӥз. Пумкылэз (приговорез) шараянэ ивортодэтъя «Удмуртия» агентстволэн корреспондентэз вуылӥз.

Суд улосвыллэсь азьвыл кивалтӥсьсэ Россиысь Уголовной кодекслэн 290-тӥ ёзэтэзлэн 6-тӥ люкетэзъя («Получение должностным лицом взятки в особо крупном размере») янгышен лыдъяз. Пуктэм кылкутон чотэ следстви но суд мынон дыръя изоляторын но дорын пытсэт улын пукон дыр но мыноз. 

Дэри ёрос судлэн пумкылэз кужымаз ӧз на пыры, со обжаловать каремын луыны быгатэ.

Тодэ вайытом, Удмуртилэсь азьвыл тӧрозэ 2017-тӥ арын 4-тӥ оштолэзе ӝегатӥзы. Сое Кам но Буй шуръёс вамен выжъёсты лэсьтӥсь компаниослэсь 139 миллион манет взятка басьтэмен, коммерци огазеяськонлэсь 2 миллион 700 сюрс манет сылӥсь люкетсэ басьтэмен, озьы ик солы ваньбурен герӟаськем кадастр юрттӥськетэз катэз тӥяса сётӥзы шуыса янгыше уськытӥзы. Судын янгыше уськытӥсь Соловьёвез 13 арлы пытсэт сьӧры келяны но 280 миллион манет штраф улэ кыскыны куриз вал.

2020-тӥ арын кутсконысен Удмуртиын вуын 20 адями быриз. Со сярысь Россиысь МЧС-лэн элькунъя валтӥсь управлениезлэн пресс-службаез ивортӥз.

Шудтэм учыръёс ӵемгес кылдо тупатымтэ интыосын пыласькон но вуэ юэм йырын пырон дыръя. Уяны быгатымтэен но выён учыръёс луо, но со валтӥсез ӧвӧл. Озьы ик кышкыт учыре шедьыны быгато бадӟымъёсын чаклатэк кельтэм пиналъёс. Ми ас ужамы бадӟымгес саклык висъяськом алонлы
Роман Щетников, МЧС-лэн элькунъя управлениысьтыз пичи пыжъёсъя кун инспекцилэн кивалтӥсезлэн воштӥсез

Туэ быремъёс пӧлын 12 аресъем пинал вань.

МЧС-ысь ӧнерчиос ялан рейдъёс ортчытъяло но шутэтскисьёслы кышкытлыкъёс, валтӥсь куронъёс сярысь верало, буклетъёс сётъяло. 

Озьы ик МЧС-ын ужасьёс нюлэскы губияны яке мынӥсьёсты чакласькыны куро

Кылем шутэтскон нуналъёсы, 1-тӥ но 2-тӥ гудырикошконэ, Удмуртиысь нюлэсъёсын сизьым адями йыромиз. Со сярысь Россиысь МЧС-лэн элькунъя валтӥсь управлениезлэн пресс-службаез ивортӥз.

1-тӥ гудырикошконэ Якшур-Бӧдья ёросын куинь адями ышиз шуыса кык ивортонъёс вуизы. Нырысетӥ учырын нюлэскы 1971-тӥ арын но 1979-тӥ арын вордӥськем воргоронъёс йыромизы. Нош кыкетӥяз – 1946-тӥ арын вордӥськем пиосмурт. Ваньзэсты соосты шедьтӥзы. Нырысетӥосыз ГИБДД машиналэн но «Регион18» огазеяськонысь волонтёръёслэн сигналъёссыя потӥзы. Нош арлыдо воргоронэз ӵыжы-выжыосыз шедьтӥзы.

2-тӥ гудырикошконэ нош ик Якшур-Бӧдья ёросын ышемъёс сярысь кык ивортонъёс вуизы. Куинь адями губи бичаны мынэм но берен сюрес шедьтымтэ. Вить час ӵоже котыръяськыса, соос тылпу кысӥсь машиналэн куараосызъя потӥзы. Кыкетӥ учырын 1952-тӥ арын вордӥськем пиосмурт йыромиз. 14 час котырын со нюлэскы губияны мынэм но дораз вуымтэ. 20 час котырын воргорон тылпу кысӥсь машиналэн куараезъя потӥз.

Пусъём, калыкез утчан ужъёс котьку но кунпуш ужъёсъя министерствоын ужасьёслэн кивалтэмзы улсын тылпу кысӥсьёсын, калыкез утчась огазеяськонъёсы пыриськисьёсын, кинологической службаосын но ас мылкыдзыя юрттӥськисьёсын ортчо.

80-90 процентаз учыръёсы арлыдо муртъёс йыромо

Россиысь МЧС-лэн элькунъя валтӥсь управлениез губияны яке емыш бичаны нюлэскы мынӥсьёслы ӵектэ:

  1. Яркыт дӥськут дӥсяны. Соку соосты кыдёкысен яке омырысен адӟыны быгатозы.
  2. Сьӧре сиён басьтыны. Озьы ик пурт, спичка, ву, кулэ луись эмъюмъёс кутыны кулэ. 
  3. Ӵыжы-выжослы ивортоно. Соослы верано, кытчы но кӧня часын мыныны малпаськоды, ку берен потоды. Верам дыре ӧд ке потэ, соос полицие, калыкен утён службае ивортыны кулэ.
  4. Сьӧре одно ик быдэсак зарядэн телефон кутоно. Туала телефонъёслэн геолокацизы вань. Дышетске соин вырыны но ӵыжы-выжыостылы, тужгес ик мӧйыослы, валэктэ.
  5. Йыромиды ке, интыяды сылэ. Геолокацидэс келяны быгатӥды ке, тӥледыз соя шедьтозы. Геолокация, герӟет ӧвӧл ке, 112 номеръя
Читать полностью

Удмуртиын «Россети Центр и Приволжье Удмуртэнерго» огазеяськонысь ӧнерчиос 16-тӥысь 17-тӥ пӧсьтолэзе потон уе куазь шукыръяськонлэсь бервылзэ утялто. Элькунъя 118 адямилэсь но 58 нимысьтыз техникалэсь 57 бригадаос ужало. Со сярысь ужъюртлэн пресс-службаез ивортэ.

Тужгес но шугадӟизы Дэри, Вотка, Пичи Пурга, Можга, Якшур-Бӧдья ёросъёс но Ижкарысь куд-ог ёросъёс. 17-тӥ пӧсьтолэзе ӵукнаозь валтӥсь электротыл сӧзнэтэз тупатӥзы. Та дыре нимаз куриськонъёсъя ужъёс мыно на. 

Умойтэм югдур кылдон учыръёсы вазиськонъёсты «Россети Центр и Приволжье» огазеяськонлэн уе-нуналэн ужась 8-800-50-50-115 телефон номерезъя куто (жингыртон дунтэк).

Удмуртиын ву вылын шудтэм учыръёслэн но быремъёс лыдзы йылэ. Берло уй-нуналскын гинэ кык мурт выйиз но одӥг адями ышиз. Со сярысь Россиысь МЧС-лэн элькунъя валтӥсь управлениезлэн пресс-службаез ивортэ.

9-тӥ пӧсьтолэзе нуназе котыр Вотка тыметын воргоронлэсь мугорзэ адӟизы шуыса ивортон вуиз. Спасательёс бырем муртэ вуысь поттӥзы – тусызъя 70 арес.

Кин луэмзэ но быронэ вуттэм мугъёсты эскеро

Со нуналэ ик нуназе бере Пичи Пурга ёросысь Яган-Докья черкогуртын кык нылкышноос пиосмуртэз вуысь поттӥзы но нырысетӥ юрттэт сётӥзы, собере воргорон шоканы кутскиз. Шугадӟонэ шедем муртэ ӝог эмъюрттэт сётӥсьёс басьтӥзы. 

64 аресъем пиосмурт тыметэ кудӟем йырын пырем

Озьы ик 9-тӥ пӧсьтолэзе тодмо луиз, 7-тӥ пӧсьтолэзе Дулесово гурт палан Кам шуре резина пыжен чорыганы потэм 64 аресъем воргоронэн герӟет ышиз шуыса. Утчан ужрад улсын 400 гектар шурез но 9 иськем ярдурез эскеризы.

Чорыгасез утчан азьланьтӥське

Эшшо одӥг шимучыр 10-тӥ пӧсьтолэзе Дэри ёросысь Вожоййыл гуртысь тыметын луиз. Ӵукна егитъёс пыласькыны малпаллям, 6 час 35 минутэ 17 аресъем нылаш вуысь ӧз поты шуыса валазы. Спасательёс солэсь мугорзэ 9 час 30 минутэ шедьтӥзы.

Ар кутсконысен Удмуртиысь ву вылын 12 адями быриз ни, тямысэз со пӧлысь - пыласькон вакыт кутскем дырысен. 

Удмуртиысь Дэри ёрос суд элькунлэн азьвыл тӧроезлэн Александр Соловьёвлэн ужезъя кенешонэз берлолы выжтӥз. Со сярысь улосвылысь судъёслэн огазеяськемзылэн пресс-службаез ивортэ.

Уголовной ужез эскеронэз суд улэ шедем муртлы 65 ареслэсь трос но хронической висёнъёсыз вань шуыса выжтӥзы. Росси азьмуртлэн Владимир Путинлэн указэзъя но Удмуртилэн тӧроезлэн Александр Бречаловлэн косэмезъя пандемия дыръя 65 ареслэсь бадӟым адямиос но кема кыстӥськись висёнъёсын муртъёс нимаз висъяськыса улыны кулэ.

Судлэн кенешонэз 65 аресъем муртъёс понна сюбегатонъёсты палэнтытозь выжтэмын.

Тодэ вайытом, улосвыллэсь азьвыл тӧрозэ 139 миллион манет взятка басьтэмен янгыше уськыто. Александр Соловьёвез 2017-тӥ арын 4-тӥ оштолэзе ӝегатӥзы. Уголовной ужез Дэри ёрос суд эскере.

Дэри ёрос судын нырысетӥ кенешон дыръя Удмуртилэн азьвыл тӧроез адвокатсэ воштыны куриз. Кылем арын 30-тӥ толшоре янгышатон йылсанкылэз (обвинительное заключение) шаряку кун янгышатӥсь Дмитрий Малыгин вераз, Александр Соловьёв взяткалэсь нырысетӥ люкетсэ улосвыл тӧролэсь ужзэ быдэсъякуз ик куриз. Коньдонэз быръён кампанизэ нуыны малпа вал. Кыкетӥез учыр – Кам но Буй шуръёс вамен выжъёсты пуктон понна луо вайись ужбергатӥсьлэсь взятка курон. 2019-тӥ арын 18-тӥ толсуре Александр Солвоьёвез эмъяськонние нуизы. Нош 19-тӥ толсуре судлэн сотэк ортчем кенегшоназ дорын арест улсын возёнэз 2020-тӥ арысь 20-тӥ оштолэзёзь азьланьтон сярысь пумкылъян кутӥзы. 

Следовательёс удмурт тодосчилэн Альберт Разинлэн улонысь кошкемезъя уголовной ужез дугдытӥзы. Со сярысь журналистъёслы Россиысь Следствиосъя комитетлэн элькунъя управлениезлэн кивалтӥсез Рустам Тугушев ивортӥз.

Уголовной ужез дугдытон сярысь пумкылъян кутэмын, угось Разинлы пумит кыӵе ке криминальной ужъёс шараямтэ
Рустам Тугушев, Россиысь Следствтосъя комитетлэн Удмуртиысь следствиосъя управлениезлэн кивалтӥсез

Тодэ вайытом, шудтэм учыр 2019-тӥ арын 19-тӥ куарусёнэ луиз. Тодосчиен люкиськон 12-тӥ куарусёнэ йӧскалык театрлэн юртаз ортчиз.  

Можгаысь 7 номеро коррекционной школаысь дышетӥсьёслэн умойтэм радъям ужзы ДЦП висёнэн курадӟись нылпиез кулонозь вуттӥз. Сыӵе йылпумъянэ вуизы Можгаысь ёроскуспо прокуратураысь ӧнерчиос, ивортэ Удмуртиысь прокуратуралэн пресс-службаез.

13 аресъем пияшез нуналлы быдэ, покчиарняе сяна, дораз дышето вал. 29-тӥ шуркынмонысен дышетӥсьёс пиналлы урокъёс ӧз ортчытъялэ, малы ке шуоно квартираязы пырыны ӧз быгатэ.

Ортчытымтэ урокъёс сярысь дышетӥсь кивалтӥсезлы 4-тӥ толсуре ивортӥз. Коррекционной школалэн кивалтӥсез Быдэ вуымтэослэн ужъёссыя ӧрие но Можгаысь дышетонъя управление учыр сярысь дыраз ивортыны ӧз быгаты, соин валче 1999-тӥ арын 24-тӥ инвожое кутэм 120 номеро Федерал катлэсь «Об основах системы профилактики безнадзорности и правонарушений несовершеннолетних» 9 номеро ёзэтсэ тӥяз

Быдэ вуымтэ нылпилэсь мугорзэ квартираез усьтэм бере 6-тӥ толсуре шедьтӥзы.

16-тӥ толсуре прокурор куронъёсты тӥянэз палэнтон сярысь представлениез Дышетонъя управленилэн кивалтӥсезлы сётӥз. Али сое эскеро.

Ужоскето адямиосты кылкутон улэ кыскон сярысь ужпумез эскеро

Тодэ вайытом, пияш кулэмен валче уголовной уж жутӥзы. Эрикрадъёсты утись ёзэсэ пиналлэн дышетӥсьёсыз вазиськизы.

Азьвылгес Удмуртилэн тӧроезлэн Александр Бречаловлэн косэмезъя нимысьтыз штаб кылдытӥзы. Со сӧсыр нылпилэсь но анаезлэсь кулон учырзэс эскериз. Кенеше Дышетонъя но тодосъя министерствоысь, Тазалыкез утёнъя министерствоысь но мер службаысь ӧнерчиос пыризы.

Можгаысь пияшен но анаеныз келяськыны 70-лэсь ятыр адями люкаськиз. Ватонэз кар администрация ас вылаз басьтӥз.

Удмуртиысь мерлыко политикая министр пияшлэн анаез эмъюртын учётын уг сылы вал шуыса ивортӥз. 

Можгаын улонысь кошкем 13 аресъем сӧсыр пияшен но солэн анаеныз люкиськыны 70-лэсь трос адями лыктӥз. Ватон ужрадэз ас вылаз кар администраци басьтӥз. Со сярысь, Можгалэн тӧроез Михаил Трофимов вылэ чӧлскыса, Удмуртиысь тӧролэн но кивалтэтлэн пресс-службазы ивортэ.

Муниципал огазеяськонъёс ватон ужез, озьы ик кисьтонэз ортчытыны юрттӥзы. Можгаысь предприятиос транспорт сётӥзы. Черкын вӧсяськон радъямын вал
Михаил Трофимов, Можгалэн тӧроез

Кар кивалтӥсьлэн верамезъя, келяськонэ бускельёссы, тодмооссы, муниципал ёзэсъёсын ужасьёс, карын улӥсьёс лыктӥзы.

Тодэ вайытом, ДЦП-ен курадӟись пияшлэн быремезъя уголовной уж ӝутӥзы. Озьы ик шимучырез Удмуртиысь кивалтэт бордын нимысьтызы кылдытэм штаб эскероз. Штабен элькунысь премьер-министр Ярослав Семёнов кивалтэ, отчы дышетонъя но тодосъя, тазалыкез утёнъя министерствоослэн но мерлык ёзэсъёслэн ыстэм муртъёссы пыризы. 

Можгаын 13 аресъем пинал но солэн анаез кулон пумысен уголовной уж ӝутӥзы. Со сярысь Россиысь Следствиосъя комитетлэн Удмурт Элькунъя следствиосъя управлениезлэн пресс-службаез ивортэ.

Следовательёс тодӥзы, кышномурт висись нылпиеныз кыназы уло вылэм. 6-тӥ толсуре эрикрадэз утись ёзэсъёсы дораз дышетскись пиянлэн дышетӥсьёсыз вазиськиллям. Соослэн верамзыя, кышномурт кӧня ке нунал ӵоже ни ӧсэз уг усьты. Ӧсэз усьтэм бере патерысь нылкышнолэсь но пияшлэсь шӧйёссэс шедьтӥзы. Улэпен соосты берлозэ 30-тӥ шуркынмонэ адӟылӥллям.

Нырысь-валысь чакланъёсъя, пинал кынмыса 5-тӥ толсуре кулӥз, нош анаез арня солэсь азьвыл улонысь кошкиз. Мугзэ эскеро

Уголовной уж Россиысь Уголовной кодекслэн 293 ёзэтэзлэн 2-тӥ люкетэзъя ӝутӥзы («Халатность, повлекшая по неосторожности причинение тяжкого вреда здоровью или смерть человека»).

Ватсалом, Удмуртилэн тӧроез Александр Бречалов улосвыл кивалтэтлэсь тӧрозэ Ярослав Семёновез но пиналлэн эрикрадъёсызъя ужоскетчиез Ольга Авдееваез шимучыр кылдонэз эскерыны куриз. 

Дэри ёрос суд Удмуртилэн азьвыл тӧроезлэн Александр Соловьёвлэн ужезъя янгышатон ласянь туконъёсты (доказательствоосты) эскеронэз йылпумъяз. Со сярысь, элькунысь судъя департаментлэн управлениезлэн пресс-службаез вылэ чӧлскыса, «Интерфакс» ивортэ.

Суд 123 адӟисьёслэсь юалляськиз, гожтэм но ваньбур туконъёсты (вещественные доказательства), оперативно-розыскной ужъя материалъёсты, со пӧлын аудио- но видео гожтэмъёсты, эскериз.

Александр Соловьёвлэн адвокатэз судэ нырысь ик утись ласянь адӟисьёсты вайыны мылкыдзэ вераз – 31-тӥ коньывуонэ суд кыксэ кылзоз.

Тодэ вайытом, улосвыллэсь азьвыл тӧрозэ 139 миллион манет взятка басьтэмен янгыше уськыто. Александр Соловьёвез 2017-тӥ арын 4-тӥ оштолэзе ӝегатӥзы. Уголовной ужез Дэри ёрос суд эскере.

Дэри ёрос судын нырысетӥ кенешон дыръя Удмуртилэн азьвыл тӧроез адвокатсэ воштыны куриз. 30-тӥ толшоре янгышатон йылсанкылэз (обвинительное заключение) шаряку кун янгышатӥсь Дмитрий Малыгин вераз, Александр Соловьёв взяткалэсь нырысетӥ люкетсэ улосвыл тӧролэсь ужзэ быдэсъякуз ик куриз. Коньдонэз быръён кампанизэ нуыны малпа валКыкетӥез учыр – Кам но Буй шуръёс вамен выжъёсты пуктон понна луо вайись ужбергатӥсьлэсь взятка курон. Туэ куарусён кутсконын улосвыллэсь азьвыл тӧрозэ эмъяськонние выжтӥзы

Кужмо тӧл сэрен 15 ёросъёсын электротыл кысӥз Удмуртиын 28-тӥ коньывуонэ

Сильтӧллэсь бервылзэ утялтыны 74 бригадаос потӥзы

Коньывуонлэн берпуметӥ арняез Удмуртиын кужмо тӧласькемен кутскиз, тӧл секундскын 25 метрозь пельтӥз. Вордӥськонэ, 28-тӥ коньывуонэ, 15 ёросъёсысь 90 гуртъёсын 23 сюрслэсь трос адями электротылтэк кылиз. Со сярысь улосвыл тӧролэн но кивалтэтлэн пресс-службазы ивортэ.

Сильтӧллэсь бервылзэ утялтыны 74 бригадаос потӥзы, оглом 148 адями.

«Удмуртэнерго» огазеяськонлэн пресс-службаез ивортэмъя, та дыре электротыл вань юртъёсы вуэ ни. 

Коммунальной ёзэсъёс пограм писпуосты, тӥяськем вайёсты утялто, усьылэм сюрес пусъёсты пуктыло. 

Росси азьмурт бордын ужась Граждан мерлыкез азинтонъя но адямилэн эрикрадъёсызъя кенешлэн ёзчиез но Йӧслык кусыпъёсъя кенешлэн ёзчиез Александр Брод 10-тӥ куарусёнэ Удмуртиысь Кун Кенеш азьын луэм шимучырез, куке арлыдо пиосмурт ассэ ӝуатӥз, чакласа возёз. Эрикрадэз утисьёс соин артэ сылӥсь егит муртъёсты ӝегатӥзы, ивортэмын Эрикрад но суд ивортодэтъя росси агентстволэн сайтаз.

Шимес учыр луиз, куректэмме верасько. Мугъёссэ эскерыны кулэ. Воргорон тодосчи, мер ужась, гажамон адями шуыса тодмо. Мон элькун тӧрлыкъёсын, эрикрадъёсты утись ужъюлтошъёсыным герӟаськи. Вань ивор, со вӧзын тодмотэм егит адямиос сыло вал шуыса. Соос ӝегатэмын, Следствиосъя комитет эскерон нуэ. Со егитъёс со адямилы мар ке вераны быгатӥзы
Александр Брод, Росси азьмурт бордын ужась Граждан мерлыкез азинтонъя но адямилэн эрикрадъёсызъя кенешлэн ёзчиез, Йӧслык кусыпъёсъя кенешлэн ёзчиез

Йӧскалык кылэз утён сярысь гожтэмъёсын сылэ вылэм Альберт Разин (берлогес эмъюртын кулӥз - ред.).

Эрикрадъёсты утисьлэн верамезъя, со югдурез чакласа улоз но Следствиосъя комитетэн кусып возёз.

Берло дыре сыӵе чутрак акциос ӧй вал, соослы мугъёс но ӧвӧл. Со кинэн ке юри малпаса лэсьтэм провокация луыны быгатэ
Александр Брод, Росси азьмурт бордын ужась Граждан мерлыкез азинтонъя но адямилэн эрикрадъёсызъя кенешлэн ёзчиез, Йӧслык кусыпъёсъя кенешлэн ёзчиез

Удмуртиысь йӧскалык политикая министр Лариса Буранова учырез улосвылысь кылъя югдурен уг герӟа. Солэн верамезъя, берло аръёсы пӧртэм ёзъёсын рос-прос уж нуиське, со пӧлын егитъёслы тунсыко луись амалъёсын кылэз утён ласянь но, ивортэ йӧскалыккуспо журналистикая гильдилэн «Национальный акцент» сайтэз.

Мон понна со валантэм. Туж вӧсь. Ми ваньмы, кин сое умой тодэ вал, али валаны тыршиськомы, мар солы сыӵе мылкыд сётӥз, мар ӝутӥз сое сыӵе вамыш лэсьтыны
Лариса Буранова, Удмуртиысь йӧскалык политикая министр

Россиысь калыкъёслэн ассамблеязылэн кивалтӥсез Светлана Смирнова верамъя, кылъя политика Удмуртиын умой пуктэмын.

Мар сое донгиз сыӵе вамыш лэсьтыны? Уг быгатӥськы вераны
Светлана Смирнова, Россиысь калыкъёслэн ассамблеязылэн кивалтӥсез

Со пусйиз, удмурт кылэз школаосын дышето, «Бадӟым удмурт диктант» ужрад паськыт ортчытъяське, озьы ик удмурт кыл паськыт вӧлме интернетын.

Куректэмзэ вераз фольклор кырӟанъя но эктонъя «Айкай» театрлэн кивалтӥсез Пётр Данилов но.

Нырысь ик, мыным туж жаль, мон туж куректӥсько… Ми ӵем пумиськылӥм но вераськылӥм, мон туж кемалась сое тодӥсько. Со удмурт лулчеберет ужпумъёс понна пыр сюлмаськылӥз, туж висьылӥз со понна, мон шуысал, мултэссэ но. Но сыӵе ужез номырин валэктыны уг луы, со сюлмаськытӥсь ужпумъёсты утён амал ӧвӧл. Йӧскалык ужпум, кылъя ужпум сокем урод ӧвӧл озьы дауртон понна
Пётр Данилов, «Айкай» театрлэн кивалтӥсез

Шимучыр пумысен аслэсьтыз мылкыдзэ Росси азьмурт бордын ужась Йӧскалык кусыпъёсъя кенешлэн президиумезлэн ёзчиез Владимир Зорин но шараяз.

Секыт учырез элькунын вӧсь но валантэм мылкыдын пумитазы, уката ик сыӵе амалэн пумитъяськонъёс удмурт калыклэн азьветлӥсезлы Альберт Разинлы но, учыр кылдэм улосвыллы но уг тупа. Бен, анай кылъёсты утён но юрттон ужпумъёс йӧскалык политикаын тужгес лэчыт сыло, соос вань Удмуртиын но, Россиысь мукет улосвылъёсын но, мукет кунъёсын но. Но Удмурт Элькунын со ужпумъёсты адӟо но сэрттыны-пертчыны тыршо
Владимир Зорин, Росси азьмурт бордын ужась Йӧскалык кусыпъёсъя кенешлэн президиумезлэн ёзчиез

Со пусйиз, удмурт кыл ӟуч кылэн артэ элькунлэн кун кылэз луэ, удмурт кылъя учебникъёс федерал лыдметэ пыртэмын, Удмуртилэн палэназ улӥсь удмуртъёс анай кылзэс дышетыны быгато шуыса. Удмурт кылъя курсъёс Москваын но вань.

Анай кыллэсь данзэ будэтон ласянь бадӟым уж нуиське, Брангурт песянайёс удмурт кылэз быдэс Европалы тодмо каризы, со туала эстрадае, интернетэ, огяросси лулчеберетэ пыӵаз. Кылдэм югдурлэсь мугъёссэ росс-прос эскерыны кулэ, йылпумъянъёс лэсьтыны дыртоно ӧвӧл шуыса малпасько. Оскисько, эрикрадэз утись ёзэсъёс вань мугъёсты эскерозы но соослы эрикрадъя дунъет сётозы
Владимир Зорин, Росси азьмурт бордын ужась Йӧскалык кусыпъёсъя кенешлэн президиумезлэн ёзчиез

Югдурез Следствиосъя комитет эскере.

Россиысь следствиосъя комитетлэн Удмуртиысь управлениез процессуальной эскеронъёсты кичӧлтӥз
Рустам Тугушев, Россиысь следствиосъя комитетлэн Удмуртиысь управлениезлэн кивалтӥсез

Солэн кылъёсызъя, эскеронъёс куинь нуналысен одӥг толэзёзь кыстӥськыны быгатозы. 

Ватсалом, 10-тӥ куарусёнэ Удмуртиысь Кун Кенешлэн сессиез ортчыны кулэ вал, шимучыр сэрен сое 24-тӥ куарусёнлы выжтӥзы.

Новости

Шаркан черкогуртысь Шаркан шурын куать аресъем нылаш выйиз. Воткаысь следствиосъя ёроскуспо ёзэт Россиысь Уголовной кодекслэн 109-тӥ ёзэтэзлэн 1-тӥ люкетэзъя (чакласькымтэен сэрен быронэ вуттон) уголовной уж ӝутӥз. Со сярысь Россиысь Следствиосъя комитетлэн Удмурт Элькунъя управлениезлэн пресс-службаез ивортэ.

Шудтэм учыр 16-тӥ пӧсьтолэзе 17 час котырын луиз. 6-9 аресъем ньыль пиналъёс чакламтэ интыын огназы пыласькыны пыриллям

Уголовной ужез эскерон улсын шудтэм учыр кылдон мугъёсты эскерозы. Кылсярысь, малы ёрос администраци но бадӟымъёс пиналъёслэсь шутэтскон дырзэс ӧз радъялэ. 

Новости

Удмуртиын мушъёс тросэн быронэз пусйизы. Со сярысь элькунысь Ветеринарияя валтӥсь управленилэн пресс-службаез ивортэ.

Мушъёс бырон учыръёсты Вавож, Пичи Пурга, Вотка но Шаркан ёросъёсын шараязы. Али отын пробаос басьтозы но соосты паласькись висёнъёслы но векчи нумыръёслы эскерозы. Озьы ик ветеринарияя управление токсикологичесокй эскеронъёс ортчытыны быгатӥсь лабораториосты чакла.

Муш вордӥсьёсты мушъёссы тросэн бырон яке висьыны кутскон учыръёс сярысь соку ик ветеринарияя ёзэсъёсысь ӧнеричослы ивортыны куро, телефонлэн номерез: 8-800-22-21-716

Тодэ вайытом, 14-тӥ куарусёнэз Удмуртиын Мушкасьлэн нуналэныз ялӥзы.

Россиысь Следствиосъя комитетлэн Удмуртиысь следствиосъя управлениезлэн Эгра ёросысь следствиосъя ёзэтэз Красногорск ёросысь 17 аресъем пияш выем пумысен уголовной уж ӝутӥз. Со сярысь элькун управленилэн пресс-службаез ивортэ.

Эскеронъёслы йылпумъянъёсъя, туэ 23-тӥ инвожое Красногорск ёросысь огысьтыз школаысь 11-тӥ классэз йылпумъясьёс анай-атайёсынызы ӵош школаез быдтэмзэс пусйыны Эгра ёросысь Мялягурт котырысь «Глухомань» шутэтскон интые вуизы. 15 час котырын огез быдэ вуымтэ пияш тыметын пыласькыны малпаз но выйиз. Солэсь мугорзэ ярдур палась ву пыдсысь шедьтӥзы
Россиысь Следствиосъя комитетлэн Удмуртиысь следствиосъя управлениезлэн пресс-службаез

Учыръя Россиысь уголовной кодексысь 109-тӥ ёзэтлэн 1-тӥ люкетэзъя (чакласькымтэен сэрен адямиез быдтон) уголовной уж ӝутэмын. 

Нырысь-валысь эскеронъёсъя, тымет Эграысь лесхозлэн тылпу кысонлы чаклам тыметэз луэ. Та дыре шимучыръя эскерон ужъёс нуисько. 

2019-тӥ арын Удмуртиысь нюлэсъёсын оглом 4,9 гектар вылын 19 тылпуос пусъемын. Со сярысь элькунысь Инкуазь узырлыкъёсъя но инкуазез утёнъя министерстволэн пресс-службаез ивортэ.

Одӥг тылпулэн шоро-куспо быдӟалаез 0,26 гектар луэ

2-тӥ инвожоысен 1-тӥ куарусёнозь Удмуртиысь нюлэсъёсын тылпулэсь утиськонъя нимысьтыз радэс (режим) ужа. Со вакытэ тылскылыны лэзьымтэ.

Катэз тӥям понна штрафъёс чакламын:

- 4-5 сюрс манет нимаз адямиослы;

- 20-40 сюрс манет ужоскето муртъёслы;

- 300-500 сюрс манет юридик огазеяськонъёслы.

Тылпулэсь утиськон куронъёсты тӥямен сэрен нюлэсын тылпу потэ ке, уголовной кылкутон чакламын.

Ватсалом, кылем шутэтскон нуналъёсы нюлэсъёсты омырысен эскеризы. 5 час ӵоже самолёт 900 иськем пала ортчиз. Тылпуос ӧвӧл пусъемын. 

Удмуртиысь Эра ёросын 16 аресъем пияш выйиз. Шудтэм учыр 10-тӥ куартолэзе луиз. Со сярысь улосвыл тӧро дорын ортчем аппарат кенешонын Россиысь МЧС-лэн элькунъя валтӥсь управлениезлэн кивалтӥсез Пётр Фомин ивортӥз.

Куинь пиналъёс споръяськыса уяса потыны малпаллям, одӥгез выйиз. Пияшлы 16 арес вал
Пётр Фомин, Россиысь МЧС-лэн Удмурт Элькунъя валтӥсь управлениезлэн кивалтӥсез

Солэн кылъёсызъя, коттеджъёсын посёлок дорын пыласькись быдэ вуымтэосты бадӟымъёс адӟиллямтэ, соин ик пиналъёсты алӥсь ӧй вал.

Улон коркаосты, мерлыко, промышленной юртъёсты, транспорт но мукет инфраструктураез вутудӟонлэсь утён кужымъёс но тӥрлык сю процентлы дась луыны кулэ. 11-тӥ оштолэзе Удмуртиысь кивалтэтлэн тӧроезлэн Ярослав Семёновлэн нимыныз сыӵе гожтэтъёс элькунысь вань муниципал кылдытэтъёслэн кивалтӥсьёссылы лэземын, ивортэ улосвыл тӧролэн но кивалтэтлэн пресс-службазы.

Удмурт Гидрометцентрысь куазез эскерисьёслэн чакламзыя, матысь кык нуналъёсы – 11-тӥ но 12-тӥ оштолэзе – элькунын температура шуак ӝутскоз: уйин +3,+8, нуназе +12,+16 градусозь. Соин валче лымы ӝог шунаны кутскоз но тудву кошкон ласянь секыт югдур кылдыны быгатоз
Удмуртиысь тӧролэн но кивалтэтлэн пресс-службазы

Кышкытлык шуръёс но тыметъёс ласянь гинэ ӧвӧл. Алон ужрадъёсты кутытэк, шуак шуныт кариськон дыръя тулыс ву шимучыръёсы вуттоз: улон коркаослэн, ужан юртъёслэн повалъёсазы, ву басьтон пуктӥськемъёсы, гумыос кошкон интыосы ву пырыны быгатоз.

Одӥгез валтӥсез ужпум – муниципал кылдытэтъёслэн администрациосазы, предприятиосын но ужъюртъёсын югдур понна кылкутӥсьёслэсь уен-нуналэн ужзэс радъян, электроезъёсты, ву сётон но пож вуэз поттон сӧзнэтъёсты чаклан.

Тодэ вайытом, тудву сэрен секыт югдур кылдонлы, тылпу потонлы кышкытлык будэмен валче 15-тӥ оштолэзьысен Удмуртиын шимучыръёсты алонъя но бервылзэс утялтонъя улосвыл сӧзнэт понна вылӥ дасьлыкъя радэс (режим) кужымаз пыроз. Со улсын калыкез шимучыръёслэсь утёнъя ватсаса ужрадъёс кутыны косэмын.

Наверх
Вниз