Ижкар+1 °C
30 -тӥ шуркынмон 2021 Пуксён
18+

Удмуртиысь «Локомотив» предприятиын эм маскаос поттыны кутскизы. Отын 50-лэсь трос адями ужа, соос пӧлын тазалыксыя сюбегатэм луонлыкъёсын муртъёс.

Удмуртиысь вузпӧрез тырмытон понна ми нуналаз 24 час ужаськомы. Али уй-нуналскын 100-120 сюрс маскаос поттӥськомы
Денис Передериев, «Локомотив» предприятилэн кивалтӥсезлэн воштӥсез

Маскаосты поттон пона 27 вуриськон машинаос но ультразвуковой установкаос басьтӥзы.

Али предприяти элькунмылэсь гинэ кулэяськонзэ быдэстэ. 60 процент палазэ эмъюртъёсы келяло, 20 процентсэ - ужъюртъёсы, кытын ӧнерчиос калыкен ужало. Эшшо 20 процентсэ аптекаосы вузаны сёто, отын соосты одӥгзэ 20 манетэн вузалозы.

Выль линиез лэзьыса, ми полотнолэсь ассэ маскаез кылдытыны быгатомы. Вуоно арняысен уй-нуналаз 200-240 сюрс маскаос поттыны быгатом шуыса оскиськом
Виктор Лашкарёв, Удмуртиысь промышленностья но вузкаронъя министр

Со сяна, «Локомотивын» утиськон костюм поттонъя цех усьтыны малпало.

Тодэ вайытом, Удмуртиын кык адямилэсь коронавирус инфекциез шараязы

Удмуртиысь предприятие Россиысь Обороная министерствоен 100 миллиард манет тыр кема дырлы чаклам кык контрактъёс гожтоз. Со сярысь 19-тӥ куарусёнэ Ижкарын оборонно-промышленной огъетъя производственной кенешон азьын Россилэн азьмуртэз Владимир Путин вераз.

Ижкарысь «Купол» завод но Россиысь Обороная министерство куспын оглом ӧжытэзтэк 100 миллиард манет тыр кема дырлы чаклам кык контракт гожтэмын луоз. Соослы луыса 2019-2027 аръёсы «ТОР» зенитно-ракетной комплексъёслэн дивизионной огъетъёссы поттэмын но ожгар кужымъёсы вуттэмын луозы
Владимир Путин, Россилэн азьмуртэз

Кызьы пусйиз кунлэн тӧроез, со контрактъёсты улонэ пыӵатон предприятиосты юнматоз но Россилэсь воздушно-космической кужымъёссэ выль ожгар тӥрлыкен тырмытонэ бадӟым ватсэт луоз.

Тодэ вайытом, азьвыл Россилэн азьмуртэз Ижкарысь выльдэм Шор площаде вуылӥз.

18-19 куарусёнэ Ижкарын Россиысь пыӵал тӥрлык поттӥсьёслэн форумазы 1 сюрслэсь трос адями пыриськоз. Со сярысь Удмуртиысь тӧролэн но кивалтэтлэн пресс-службазы ивортэ.

Форумын оборонно-промышленной огъетысь лэчыт ужпумъёсты эскерозы, со пӧлын предприятиосын ужазинлыкез ӝутонэз но вузпӧрез шырыт радъян амалъёсты пыӵатонэз, озьы ик вузкаронэз паськытатон но кулэяськонэз будэтон понна туала ужан амалъёсты

Ужрадэ тӧрлык ёзэсъёслэн ыстэм муртъёссы, оборонно-промышленной огъетысь предприятиослэн кивалтӥсьёсы но ӧнерчиос, промышленной дизайнъя но туризмъя ӧнерчиос. Форуме Россиысь промышленностья но вузкаронъя министр Денис Мантуров, экономикаез азинтонъя министрлэн воштӥсез Пётр Засельский, Ужазинлык удысын компетенциосъя федерал центрлэн кивалтӥсез Николай Соломон, Кун Думаысь оборонно-промышленной огъетысь огазеяськонъёсты азинтыны эрикрадэн юрттонъя ӧрилэн тӧроез Владимир Гутенёв но мукетъёсыз. Азьвылгес Удмуртилэн тӧроез форуме Россилэсь азьмуртсэ Владимир Путинэз ӧтиз.

Удмуртилэн кивалтэтэз Пыӵал тӥрлык поттӥсьлэн нуналзэ пусъёнлы паськыт ужанрадлык дасяз. Отчы удысъя ужен герӟаськымтэ ужрадъёс но пыризы. Кылсярысь, Ижкарын выльдэм Шор площадез но пиналъёслы М. Т. Калашников нимо технопаркез усьтозы, отчы тӥрлык «Дышетон» йӧскалык ӵектос улсын басьто.

100 ар тырмонэз пусъён улсын карын улӥсьёс но куноос понна Ижкаретӥ «Ижевчанин – Калашников» турмаршрут усьтэмын луоз, со улсын М. Т. Калашниковлэн улонэныз но уженыз герӟаськем пусйымон интыосы вуылон чакламын. Ижкарын 20-лэсь трос пӧртэм ужрадъёс ортчозы, кызьы оборонно-промышленной огъетысь ӧнерчиос понна удысужлыко ужрадъёс, озьы ик карын вань улӥсьёс но куноос понна. Ми тыршимы, Пыӵал тӥрлык поттӥсьлэсь нуналзэ пусъёнэ котькуд адями мед пыриськоз шуыса
Александр Бречалов, Удмуртилэн тӧроез

Чакланъёсъя, Пыӵал тӥрлык поттӥсь нуналзэ пусъён ужрадъёсы оглом 1 миллион 500 сюрс пала адями пыриськоз

Тодэ вайытом, Пыӵал тӥрлык лэсьтӥсьлэсь нуналзэ пусъён улсын Ижкаре вылӥ пилотажъя «Русские витязи» группа вуоз

«Роскосмослэн» кивалтӥсез Дмитрий Рогозин но Удмуртилэн тӧроез Александр Бречалов 29-тӥ пӧсьтолэзе Москваын кун корпорацилэсь но элькунлэсь вачеужанзэс азинтон луонлыкъёс пумысен кенешизы. Со сярысь улосвыл тӧролэн но кивалтэтлэн пресс-службазы ивортэ.

Озьы ик пыриськисьёс элькунысь эшшо 30-лэсь трос компаниосты поставщик луыны быгатӥсьёслэн лыдметазы пыртон ужпумез эскеризы. Ӵектэм вузъёс пӧлын – теплотехника, лазер сварка, пилоттэк лобась арбериос но мукетыз
Удмуртиысь тӧролэн но кивалтэтлэн пресс-службазы

Удмуртилэн тӧроез Михаил Калашниковлэсь 100 аръем юбилейзэ пусъён улсын пыӵал тӥрлык поттӥсьёслэн форумзы сярысь вераз но Роскосмослэсь предприятиоссэ ужрадъёсы пыриськыны ӧтиз.

Пусъём, «Росоксмос» кун корпораци Удмуртиысь оборонно-промышленной огъетысь валтӥсь предприятиосын вачеужа. Поставщикъёс пӧлын Ижысь «Аксион-холдинг» мотозавод, Ижысь радиозавод, Воткаысь завод, Механикая Чупчи завод.

Тодэ вайытом, Пыӵал тӥрлык поттӥсьлэн нуналэзлы сӥзем ужрадъёс Ижкарын 18-тӥ куарусёнэ кутскозы но 22-тӥ куарусёнозь кыстӥськозы. Со нуналъёсы улосвыламы Россиысь пыӵал тӥрлык лэсьтӥсьёслэн форумзы ортчоз. Элькунамы Россилэсь азьмуртсэ Владимир Путинэз возьмало, озьы ик Россиысь промышленникъёслэн но ужбергатӥсьёслэн огазеяськонзылэсь тӧрозэ Александр Шохинэз но 85 улосвылъёсысь удысъя министръёсты. 21-тӥ куартолэзе Иж тымет вадьсытӥ вылӥ пилотажъя «Русские витязи» группа лобалоз.

Удмуртиысь предприятиос ожгар техникая «Армия-2019» калыккуспо форуме пырисько. Со сярысь улосвыл тӧролэн но кивалтэтлэн пресс-службазы ивортэ. Ужрад 25-30 инвожое Москва улосвылысь Кубинка карын ортче.

Форумын «Аксион-холдинг», «Купол», «Концерн Калашников», «Элеконд», ИМК предприятиослэн, Механикая Чупчи заводлэн но мукет компаниослэн ыстэм муртъёссы ужало.

Элькунысь предприятиослэн стдендъёсазы улосвыллэн тӧроез Александр Бречалов вуылӥз.

Милям бадӟым осконъёсмы, соос зэмало. Татын ужъя кусыпъёс юнматон ласянь бадӟым луонлыкъёс, нош со вузкаронэз паськытатыны юрттоз
Александр Бречалов, Удмуртилэн тӧроез

Солэн кылъёсызъя, элькунысь оборонно-промышленной огъетэ пырись 12 предприятиос таяз арын нырысетӥ кварталэ ужпӧрзэс 42 процентлы будэтӥзы. Удмуртиын поттэм но вузам вань вузъёс пӧлысь 14 процентлэсь ятырзэ соос лэсьто. Улосвыл тӧрлыкъёс предприятиослы граждан но ожгар но граждан удысын кутӥськыны быгатӥсь продукцизэс вӧлмытыны юртто.

Асьме оборонщикъёс диверсификациез умой нуо. Туэ нырысетӥ кварталын поттэм граждан вузъёссы, кыллем арысь та вакытэн ик ӵошатыса, 7,4 процентлы будӥз. Со дыр ӵоже ик граждан но ожгар но граждан удысын кутӥськыны быгатӥсь продукцизылэн быдӟалаез 21,2 процент луиз. Со лыдпус Росси азьмуртэн оборонно-промышленной огъет азе пуктэмезлэсь вылӥынгес
Александр Бречалов, Удмуртилэн тӧроез

Солэн верамезъя, элькунысь оборнно-промышленной огъетысь предприятиосын граждан вузъёс поттон туэ ог 10 процентлы будоз. Кылсярысь со Сарапулысь электрогенератор заводэз вераз, отын лифтъёс ёзъёс поттыны кутскизы. Соос кунгож сьӧрын лэсьтэмъёсызлэсь бере уг кылё, Россиысь вузпӧрын та вузлы кулэяськон туж бадӟым. 

Россилэн азьмуртэз Владимир Путин Ижкарын лэсьтэм выль снайперской винтовкаез эскериз. Ыбылӥськон тӥрлык лэсьтӥсьлэн нуналаз, 19-тӥ куарусёнэ, кунлэн тӧроез «Калашников» концернлэн Подмосковьеысь «Патриот» паркын радъяськем адӟытоназ ветлӥз, ивортэ оборонной предприятилэн пресс-службаез.

Владимир Путин выль ожгар тӥрлыкен но техникаен экспозициез учкиз. Озьы ик Россилэн азьмуртэз ыбылӥськон галереяе ветлӥз но Чукавинлэн СВЧ-308 снайперской винтовкаезлэн выль модельысьтыз ыбылӥськиз.

Со сяна, адӟытонын кунлэн тӧроезлы ZALA AERO компанилэсь беспилотникъёссэ но ву улын ветлоно бурдъёсын «Комета 120-М» судноез возьматӥзы.

Удмуртилэн шоркараз туэ нырысетӥзэ радъяськись Ыбылӥськон тӥрлык лэсьтӥсьёслэн форумзэс арлы быдэ ортчытъялозы. 18-тӥ куарусёнэ «Росконгрессэн» со сярысь тупанкылэз элькун вить арлы юнматӥз.

Ыбылӥськон тирлык лэсьтӥсьлэсь нуналзэ усьтон ужрадын Удмуртилэн тӧроез Александр Бречалов ужкагазэс кинюртон сярысь вераз.

Россилэн нокыӵе мукет улосвылэз ӧз сёты сомында изобретениос, сомында ыбылӥськон тӥрлык, сомында легендаос, <…> кызьы асьме элькун, асьме кар. <…> Со милям азинсконмылэн стратегиез. <…> «Росконгресс» — кунмылэн вань валтӥсь форумъёсызлэн но площадкаослэн валтӥсь операторез. Ми ӵошен ортчытом Ыбылӥськон тӥрлык лэсьтӥсьлэсь нуналзэ. Тупанкыл вить арлы, но мон малпасько, со аръёслы, пыраклы, малы ке шуоно Ижкар ыбылӥськон тӥрлык лэсьтӥсьёслэн шоркарзы нимез нуллэ
Александр Бречалов, Удмуртилэн тӧроез

Со пусйиз, таӵе ужрадэз ортчытон понна элькунлы оскымон партнёр кулэ. «Росконгресс» трос бадӟым но ӟечлыко ужрадъёслэн радъясез луэ. Соос пӧлын Санкт-Петербургын экономикая калыккуспо форум, Сочиын форум, «Иннопром».

Таӵе партнёрство асьме площадкалы автоматически дунлык сётэ но сое федерал повесткае поттэ
Александр Бречалов, Удмуртилэн тӧроез

Тодэ вайытом, Ыбылӥськон тӥрлык лэсьтӥсьлэсь нуналзэ пусъёнэз Ижкарысь заводъёсын ужасьёсты данъянэн кутскизы.

2017-тӥ арын Удмуртиысь обороная предприятиос граждан вузъёсты поттонзэс 3,5 процентлы будэтӥзы. Элькунысь промышленностья но вузкаронъя министерстволэн ивортэмезъя, арлы йылпумъянъёсъя, оборонно-промышленной огъетысь предприятиосын поттэм вань вузъёс пӧлысь 26,1 процентэз граждан вузъёс луо, ар ӵоже солэн быдӟалаез 4,1 процентлы йылӥз.

Гражданская продукция на предприятиях ОПК Удмуртии

Озьы элькунын Росси азьмуртэн 2020-тӥ арлы пуктэм ужпумез — 17 процентозь вуттон, быдэстэмын. 2025-тӥ арозь граждан вузлэн быдӟалаез 30 процентозь вуыны кулэ, 2030-тӥ арлы — 50 процентозь.

Удмуртиысь предприятиос Россиысь трос ӧръёсъя граждан вузъёсты лэсьтонын валтӥсь инты басьто. Кылсярысь, элькунын лэсьтӥсько цирконийлэсь но солэн сплавъёсызлэсь 100 процентэз вузъёс, 80 процентэз сверхпроводникъёс, 60 процентэз покчи но шоръёзо классъем беспилотникъёс, 60 процентэз ыбылӥськон граждан тӥрлыкъёс, 60 процентэз конденсаторъёс, 50 процентэз нимысьтыз анданъёс но сплавъёс но мукетыз.

Ужпӧрез будэтон понна Удмуртиысь предприятиос выль вузпӧръёсты эскеро но отчы пыро, инвестициосъя ӵектосъёсты улонэ пыӵато, ужпӧрез выльдо.

Удмуртиысь промышленность понна одӥгез валтӥсь ужпум — оборонно-промышленной огъетысь предприятиосын граждан вузъёсты поттонэз будэтон. 2017-тӥ арын со 10 процентлы йылӥз, ивортӥз журналистъёслы туннэ, 27-тӥ толсуре, элькунлэн нырысетӥ вице-премьерез Александр Свинин.

Асьмелэн оборонно-промышленной огъетысь куд-ог предприятиос 98 процентлы ожгар удыслы вузъёс потто, нош ми тодӥськом, гособоронзаказ арлы быдэ кулэсмоз шуыса, соин ик оборонно-промышленной огъетысь предприятиосын ужанын ми понна туннэ валтӥсь инты басьтэ соослэсь граждан продукцизэс вузпӧре поттон но со вузпӧръёсты шедьтыны юрттон
Александр Свинин

Со понна ик алигес Удмуртилэн тӧроез Александр Бречалов «Огазеям авиастроительной корпорациын» пумиськон ортчытӥз, ватсаз вице-премьер. Отчы улосвылысь обороная 5 предприятиос но Механикая Чупчи заводысь ыстэм муртъёс пыриськизы. Вераськон граждан продукциез азинтон сярысь мынӥз.

Александр Свинин пусйиз, таӵе уж вуоно арын но азьланьтӥськоз. Элькунысь ваньбур поттӥсьёс выль вузпӧръёс мед шедьтозы шуыса, кун корпорациосын, Росси но калыккуспо кун но частной бадӟым компаниосын таӵе пумиськонъёсты кык арнялы одӥг пол ортчытъяны чакламын.

2017-тӥ арлы чакласа, Ижкарысь «Калашников» концернлэн туэ поттэм коньдонэз 40 миллиард манет пала луоз. Со сярысь туннэ, 22-тӥ куарусёнэ, производствоя выль линиез лэзёнын «Ростех» кун корпорацилэн тӧроез Сергей Чемезов ивортӥз.

Солэн верамезъя, «Калашников» концерн — кун промышленностьлэн азинлыкезлэн возьматосэз. Оскыса вераны луэ, концерн туэ 40 миллиард манет пала коньдон поттоз шуыса.

Пусъём, кылем арлы йылпумъянъёс лэсьтыса, «Калашниковлэн» поттэм уксёез 15,7 миллиард манет вал. Озьыен, 2017-тӥ арлы чакланъёс быдэсмизы ке, поттэм коньдонлэн будэмез 155 процент (кык но ӝыны поллы) луоз.

Пыӵал тӥрлык поттӥсьёслэн нуналзы понна концернын туннэ «вуонолэн ужпӧро линиез» («производственная линия будущего») лэземын вал. Озьы ик предприятие технологияя центр но дуриськон ужпӧр усьтӥз.

Удмуртилэн тӧроез Александр Бречалов «Роскосмослэн» кивалтӥсеныз Игорь Комаровен элькунлэн кун корпорациен вачеужанзы сярысь вераськиз. Со сярысь улосвыллэн тӧроезлэн пресс-службаез ивортэ.

Александр Бречалов ялан ужась группа кылдытон сярысь кичӧлтон сётӥз. Отчы «Роскосмосысь», федерал тӧрлыкез быдэсъясь ёзэсысь, элькун кивалтэтысь но предприятиосысь ёзчиос пырыны кулэ. Соос азьын вачеужанлэсь вань ӧръёссэ рос-прос эскерон ужпум сылоз.

Игорь Комаров Удмуртилэсь тӧрозэ Музъемлэсь нырысетӥ спутниксэ лэзем дырысен 60 ар тырмонэз пусйыны ӧтиз. Со 4-тӥ коньывуонэ Кун Кремльлэн дворецаз ортчоз. Нош Александр Бречалов кун корпорацилэн кивалтӥсез матысь дыре Удмуртие вуоз шуыса осконзэ вераз.

Пусъём, Удмуртиын «Роскосмослэн» туж кулэ ужпӧро предприятиосыз интыяськемын.

Ижысь автозаводын LADA Vesta SW но LADA Vesta SW Cross машинаосты тросэн поттыны кутскизы. Нырысетӥосыз выль автомобильёс конвейерысь вордӥськонэ, 11-тӥ куарусёнэ, васькизы. Автозаводын ужасьёсты элькун кивалтӥсьёслэн нимынызы ӟечкылаз Удмуртиысь кивалтэтлэн тӧроезлэсь ужзэ быдэсъясь Ярослав Семёнов.

Удмуртилэн быръем тӧроезлэн Александр Бречаловлэн, Удмуртиысь кивалтэтлэн нимынызы праздникен ӟечкыласько. Выль автомобилез поттыны кутскон выль кораблез ву вылэ лэзёнлы укша. Кузёосызлы — кышкыттэмлыко но каньыл ветлон
Ярослав Семёнов, Удмуртиысь кивалтэтлэн тӧроезлэсь ужзэ быдэсъясь

Тросэн поттыны кутскон азьын выль модельёсты лабораториосын но сюрес вылын эскеризы. Озьы ик «АвтоВАЗ» -40 градусысен +55 градусозь температураен термокамераын эскеронъёс ортчытӥз.

LADA Vesta SW Cross машиналэн кузоваз ватсаса 33 ёзъёс пыртэмын, озьы сое юнгес карыны луиз.

АвтоВАЗлэн вице-президентэз Алеш Братош пусйиз, та нунал Ижысь но Тольяттиысь заводъёс понна туж пусйымон луэ шуыса. Lada Ижевск предприятилэн кивалтӥсез Михаил Рябов заводын ужасьёслы нимысьтыз тау кариз.

«Та автомобилез поттыны кутскон азьын бадӟым но секыт уж быдэстэмын. Тау со понна. Ми асьмедыз одӥг командаен возьматӥмы. Туж умой вуз пӧрмиз, басьяськисьёс ласянь кулэяськон луоз», - вераз Михаил Рябов.

Выль автомобильёсты поттон понна Ижын 79 выль но выльдэм ёзъёсты лэсьтыны кутскизы, сварка, буян но бичан цехъёсын выльдӥськонъёс ортчытэмын. Конвейерын 38 пӧртэм выль операциос кылдӥзы.

LADA Vesta SW но LADA Vesta SW Cross машинаосты 2017-тӥ арын сӥзьыл вузаны кутскозы.

«АвтоВАЗ» Lada Vesta седанлы дунъёсты шараяз, автомобильёсты матысь дыре Ижкарын поттыны кутскозы. Со сярысь ивортэ «Российская газета».

1,8 литр моторен Lada Vesta SW Cross тужгес узыр комплектациен 800 сюрс манетлэсь дуно сылоз. Lada Vesta седанлэн дуныз 550 сюрс манетысен кутске.

«АвтоВАЗлэн» кивалтӥсез Николя Мор верамъя, Lada Vesta универсалъёсты поттон матысь дыре кутскоз, нош вузан — 2017-тӥ ар пумын.

Хими ожтӥрлыкез быдтонъя Россиысь берпуметӥез объект — Кизнерысь завод — таиз арлы ожутиськонъя кун кулэяськонэз дырызлэсь вазь быдэстӥз. Хими ожтӥрлыкез кышкыттэмлыко возёнъя но быдтонъя федерал управленилэн кивалтӥсез Валерий Капашин вылэ чӧлскыса, со сярысь ивортэ «Интерфакс».

Солэн верамезъя, ар кутсконысен Кизнерысь заводын «1387,9 тонна мында усыкмытӥсь ожгар суретъёс быдтэмын, со ожутиськонъя кун кулэяськонлэн 100 процентэз луэ».

Озьы ик со пусйиз, кунын утиськись 40 сюрс тонна мында усыкмытӥсь суретъёс пӧлысь 2017-тӥ арын куарусён пумозь объектын 43,95 тонназэ быдтыны кылиз.

«Кизнер» объектысь коллектив люизитэз быдтонэз дугдылытэк сямен азьланьтӥз, вуоно толэзь шорозь со быдэсак быдтэмын луоз, 2017-тӥ арысь куарусён пумозь ви-икс усыкмытӥсь сурет быдтэмын луоз
Валерий Капашин, Хими ожтӥрлыкез кышкыттэмлыко возёнъя но быдтонъя федерал управленилэн кивалтӥсез

Тодэ вайытом, хими ожтӥрлыкез пусъем дырлэсь вазь быдэстыса, 1 миллиард манетлэсь трос шыръяны чаклало.

Ижкарысь «Калашников» концерн Москваын ГИБДД-ысь ӧнерчиослы чаклам «ИЖ» электромотоциклъёсын тодматӥз. Кызьы ивортэ предприятилэн пресс-службаез, эрикрадэз утисьёс выль транспортлы умой дунъет сётӥзы.

«Туж тунсыко экземпляръёс, экологи ласянь со быдэсак чылкыт транспорт, туж азинлыко. Мон оскисько, та мотоцикл емышъёс ваёз. Дорожно-патрульной ёзэсысь ӧнерчиосмы та мотоциклъёсын ветлыны, соослэсь луонлыкъёссэс валаны быгатӥзы», — вераз Россиысь кунпуш ужъёсъя министерстволэн Москвая Валтӥсь управлениезлэн кивалтӥсезлэн воштӥсез Александр Петриков.

Мотоцикллэн кужымез — 15 киловатт, одӥг зарядкаен 150 иськемозь ортчыны быгатэ. Конценрнлэн кивалтӥсез Алексей Криворучко верамъя, матысь дыре соосты эскерон вылысь уже кутозы.

Нырысетӥоссэ электромотоциклъёсты шоркарысь полицилы гудырикошкон пумын сётозы. Калык техникаез адӟыны быгатоз «Армия-2017» форумын, со Москва улосвылысь «Патриот» паркын 22–27 гудырикошконэ ортчоз.

«Калашников» полицилы чаклам «ИЖ» электромотоциклъёсын тодматӥз


2017-тӥ арлэн нырысетӥ паларезлы йылпумъянъёсъя, LADA Ижевск автозаводын 53 сюрс 164 автомобиль бичамын. Удмуртиысь промышленностья но вузкаронъя министерстволэн пресс-службаез ивортэмъя, кылем арысь та вакытэн ик ӵошатыса, со 15,5 процентлы тросгес.

Оглом элькунысь предприятиос толшорысен инвожоозь 247,7 миллиард манет тыр вузъёссэс вузазы, кылем арысь нырысетӥ палараын сярысь 3,3 процентлы тросгес.

Ватсалом, 24-тӥ пӧсьтолэзьысен 13-тӥ гудырикошконозь АвтоВАЗ отпуске кошке, шутэтскыны потозы Ижысь автозаводын ужасьёс но. Со дыр ӵоже предприятиын тӥрлыкез выльдозы, тупатъян ужъёсты ортчытозы.

Удмуртиысь «Калашников» концернын «Иж» маркаен граждан мотоциклъёсты поттонэз улӟытозы. «Ростех» Кун корпорацилэсь сыӵе косон вуэм сярысь журналистъёслы 13-тӥ пӧсьтолэзе вераз предприятилэн кивалтӥсез Алексей Криворучко.

«Мотоциклъёс сярысь вераськимы ни. Ми но со сярысь малпаськомы… Валамон, луозы азьвыл кадь ик («Иж» маркаен — ред.). Али кӧня ке вазьгес на, ми ужаськомы. Вал ивортодэт — Сергей Викторович Чемезов вераз, милемлы мотоцикл поттонэз улӟытон сярысь косон вань шуыса. Ми со бордын ужаськомы, команда люкаськомы, вань ни нырысетӥ йылпумъянъёс. Гудырикошконэ, дыр, ми со сярысь рос-просгес вераломы — толэзь пумын ожгар техникая «Армия России» калыккуспо форумын, оло», — вераз со.

Тодэ вайытом, азьвылгес ивортэмын вал, Москва улосвылын ортчоно адӟытонын «Калашников» концерн кужымо ёзэсъёс понна «Иж» мотоциклэн тодматоз шуыса.

ВАТСАН

«Иж» маркаен граждан но спорт мотоциклъёсты «Ижмаш» заводын 1929-тӥ арысен 2008-тӥ арозь поттӥзы. Со дыр куспын 11 миллион пала поттэмын вал. Тужгес трос лэсьтӥзы «Иж-Юпитер» но «Иж-Планета» мотоциклъёсты.

Россиысь военно-тактической шудонъёсъя федерацилэн кивалтӥсез Михаил Галустян Ижкарысь «Калашников» концернэ вуылӥз. Со сярысь телеведущий ивортӥз Instagram вотэсысь бамаз.

«Учки ужпӧрез. Пичи дырысеным учкеме потэ, кызьы дунееысь устоосэ „пушкаосты“ лэсьто. Ӵуказе 13 часын ыбылӥськон интыысен меӵак эфир нуо. Выль образецъёсты эскеромы», — гожтӥз Галустян.

Озьы ик актёр предприятиын дыръяз лэсьтэм туспуктэмъёссэ шараяз.


Тодэ вайытом, 2016-тӥ арын толсуре Михаил Галустян но «Калашников» концерн страйкбол, лазертаг но фаертаг шудонъёсын кутон понна ыбылӥськон огъетъёс но тӥрлык кылдытонын валче ужан сярысь тупанкыл юнматӥзы. Ужкагазъя предприяти страйкбол понна шудон тӥрлык кылдытоз, вылтусызъя со АК-74 М автоматлы укшалоз.

Росатомлэн кивалтӥсез Алексей Лихачёв Глазкарысь Механикая Чупчи заводэ вуылӥз но предприятилэсь азинлыко луэмзэ пусйиз. Со сярысь ивортэ ЧМЗ-лэн пресс-службаез.

Кун корпорацилэн кивалтӥсез Удмуртилэн уйпал шоркараз 7-тӥ пӧсьтолэзе вуылӥз. Лихачёв ужбергатонлэсь ядерной луисьтэм ӧръёссэ азинтон понна кылдытэм металлургияя удыс центрлэн азинлыко ӵектосъёсыныз тодматскиз.

«Предприятилэн егит кивалтӥсез, со азяз бадӟым ужпум пуктэ — вить арскын табышез одӥг но ӝыны поллы 22 миллиард манетозь будэтыны но ужасьёслэсь шоро-куспо уждунзэс кык поллы йылтыны. Коллективен вераськыса, кытын озьы ик трос устолыко егитъёс, мон оскисько, заводлэн азинскон понна ужасьёс, технологиос но экономика ласянь усто луонлыкъёсыз», — вераз Алексей Лихачёв.

Со кулэяськонъёслэсь йылэмзэс но выль вузъёсты поттэмез пусйиз, соос предприятилы вузпӧрын огсыр возиськыны луонлык сёто. Чакланъёсъя, ЧМЗ-лэн азинлыко ӵектосъёсыз Глазкарын эшшо 400 пала выль ужан интыос кылдытыны юрттозы.

ВАТСАН

ЧМЗ — Россиын атом удыслы цирконий поттӥсь одӥг гинэ предприяти. Со сяна, 2016-тӥ арын ужпӧрез выльдэм бере, завод титанлэсь трубной прокат поттыны кутскиз, озьы кунгож сьӧрысь лыктӥсь прокатэз воштыны луиз.

21-тӥ инвожое Удмуртилэн тӧроезлэсь ужзэ огдырлы быдэсъясь Александр Бречалов но Россиысь промышленностья министр Денис Мантуров элькунын мувӧй но чагыр эстӥськон кыскон удыслы тӥрлык поттонъя промышленной кластерез азинтон луонлыкъёс сярысь вераськизы. Кызьы ивортэ улосвыл тӧролэн но кивалтэтлэн пресс-службазы, вераськон мынӥз кластерлы кун ласянь юрттон, озьы ик соин кивалтӥсь компанилы федерал министерство ласянь визь-кенешен юрттон сярысь.

Тодэ вайытом, мувӧй кыскон удыслы тӥрлык поттонъя промышленной кластерез кылдытон кутскиз 2016-тӥ арын Воткаын, инъетэз луиз «Тхеновек» завод. Азьвылгес пусъемын вал, отчы Удмуртиысь та удысысь 28 предприятиос пырозы шуыса. Та дырлы азинскон программа но быдэстоно ужъёсын радлык дасямын, озьы ик кивалтӥсь компания пусъемын.

Кластеръёс улосвылэ федерал коньдэтысь уксё кыскыны ватсаса луонлык сёто. Россиысь кивалтэтлэн «Промышленной кластеръёс сярысь» 779 номеро пуктэтэзъя, кластере пыриськисьёс кунгож сьӧрысь вузъёсты воштон ужпӧрын валче ӵектосъёсты быдэстонэ кутэм коньдонлэсь 50 процентозь люкетсэ берыктыны быгато.

Туннэ нуналлы Удмуртиын инновациосъя машинаос лэсьтон кластер но туризмъя но шутэтсконъя «Камский берег» кластеръёс ужало ни. Азьланяз эшшо кыкез кылдытэмын луыны быгатозы — лесопромышленной но агроиндустриальной.

Наверх
Вниз