Ижкар-1 °C
26 -тӥ толшор 2021 Пуксён
18+

Удмуртиын «Можга» йӧ аренаез усьтӥзы

  • 89
  • 0
Можга / Удмуртия
Удмуртиын «Можга» йӧ аренаез усьтӥзы
Туспуктэм: Константин Вознесенских

22-тӥ толсуре Можгаын сыӵе нимын йӧ аренаез сӥё-дано усьтӥзы. Ужрадэ ивортодэтъя «Удмуртия» агентстволэн корреспондентэз но пыриськиз.

Таиз ар Удмуртия понна пусйымон луиз, малы ке шуоно та элькунлэн кунлыкезлы 100 ар тырмон ар. Озьы ик ми туэ пандемиен герӟаськем шуг-секытъёсты ортчим. «Можга» арена возьматэ, ми со шугъяськонъёсты йӧно ортчимы шуыса. Воткаын но Можгаын аренаос пуктӥм, Сарапулын пуктыны кутском. Удмуртиысь котькуд карын та выллем аренаос луыны кулэ. Объектъёс устолыко хоккеистъёсты но мукет спорт амалъёсын вырисьёсты будэтыны юрттозы
Александр Бречалов, Удмуртилэн тӧроез

Озьы ик элькунлэн тӧроез «Можга» йӧ аренаез лэсьтонын юрттэмез понна ужбергатӥсьлы Михаил Гуцериевлы тау кариз.

Можгаын липет улэ пыртэм катоксы та сяна ӧвӧл. Выль спорт огъетэ 450-озь адями пырыны быгатоз. Карын но Удмуртиын улӥсьёс татын хоккеен, фигурной нискыланэн но кёрлинген вырыны быгатозы.

Пусйымон, Можгаын йӧ арена Россиысь хоккейлэн нуналаз усьтӥське. Со ваньмызлы хоккеез яратӥсьёслы кузьым. «Можга» арена удмурт хоккеез выльысь элитае поттыны юрттоз шуыса оскисько
Владимир Мышкин, хоккеен шудонъя олимпи чемпион

Со сяна, спорт огъетын баскетболэн но волейболэн шудонъя 100 учкисьёслы чаклам трибунаосын спортзал, тренажёръёсын зал но гимнастикаен вырыны зал лэсьтӥзы.

«Можга» йӧ аренаез «Демография» йӧскалык ӵектос улсын пуктӥзы. Пӧртэм спорт амалъёсын вырыны луонлык сётӥсь объектъёсты 2024-тӥ арозьлы пуктэм валтӥсь ужпумез быдэстыны юрттоз, со дырлы 55 процентэз элькунын улӥсьёс спортэн ялан вырыны кулэ. 

Тодэ вайытом, та дырозь Удмуртиын искусственной йӧэн тямыс ворсам катокъёс ужало вал.



Наверх
Вниз